¹ Sesombayangen ni nabi Habakuk. I ki’it e nada na’aripen. ² TUHAN, e liningaku mola nabar en tanume Nikoo, wo em pepa’ayengen-Nu, ee TUHAN, ni’i keide’kula! Tounola ni’itu witu e leasan en te’un, i papaloo’o-loo’o mola ni’itu witu e leasan en te’un; witu e nupi’ ghenangenola e nupus o rendem! ³ Empung si waki wanua Teman o meiy wo Si Kasakudus waki kakuntungan Paran. Si’isip Kewangko’an-Na en timutuwla em pakasa’an e langit, wo em bumi tu’u e wuta ampit e lo’or wia-Nisia. ⁴ Wawean e riap tanu en terang, sena’ terang waki siri’-Na wo witu mouw neiy i kali’iker eng kaente’an-Na. ⁵ Mareriorla-Nisia makelang e rumara menganup wo e nanar e maki’itla nenus-Na. ⁶ Sia rumedeiy, takar em bumi en siniwo-Na maoghe; Sia maloo’ maledong, takar se bangsa-bangsa se siniwo-Na kimompo’ i kasenge’, makemu eng kuntung-kuntung em bia mouw rengane’ eng kasa ketareanna, kimumeng eng kakenturan-kakenturan mainaka aba-abat; ni’itu mouw em pakela-kelangan-Na minaka aba-abat ⁷ Niaku ku limoo’ en dasing-dasing ne tou eng Kusyan neiy i keubel, roko’-roko’ en tenda’ tana’ Midian e mangho’ogho’. ⁸ Witu se so’oso’an-so’oso’an ku’a re’en, ee TUHAN, witu se so’oso’an-so’oso’an ku’a re’en e nupi’-Mu timo’or? Ka’apa witu si tasik ku’a re’en eng kaupi’an-Nu i ka’ayo Koo mengalila si kawalo wo eng kareta kamenangan-Nu? ⁹ Em borang-Mu em binuka’-Mu mola, em pinumpunan-Nu mola ampit sioki’na em pana. Si’isip Nikoo koo kimewe’ em bumi minamuali so’oso’an-so’oso’an; ¹⁰ lumoo’ Nikoo, eng kuntung-kuntung en tumenggo’ogho’, e rano ampuan e maarut lumangkoiy, lawanan wangko’ e minapalingala en suarana wo mayat e lawasna. ¹¹ Siendo, sumedot si minena’ witu en tampa paena’anna, karengan en sena’na ne oki-oki’ em pana-Mu se maperar karepet, karengan e riapan en tetura’-Mu e makerap. ¹² Witu eng kasa meupi’ Nikoo koo kime’ang limease em bumi, witu e nupi’ Nikoo koo timope se bangsa-bangsa. ¹³ Nikoo koo kimelang maju kaa laa melelawirla se umat-Mu, kaa laa melelawirla se tou ni’isu’-Mula. Nikoo koo rimimu’umukla e weteng atas em bale ne tou-tou kasa wu’ul wo Koo muka’ en to’otolanna i ka’ayo e watu kasa kesampetan. Si’isip ¹⁴ Nikoo koo timude’ ampit sioki’ em panana nuesa si kapala laskarna, si merangu kaa laa mesesarakanla niaku ampit e merio-rio, en tanu mokan nisea se nime’enep sitou neiy i kalotoiy eng kenaramen neiy i kakirong. ¹⁵ Ampit si kawalo-Mu, Koo lime’ek en tasik, tawunan en dano masewu. ¹⁶ Eng katoroan niaku nu liminga nyi’a, tumenggo’ogho’ mouw e nateku, liminga e legu’anna, tumingku’uku’ mouw en sumpingku; e ruiy-ruiyku tanu mokan e ghinoremla e reawa’, wo niaku ku matenggo’ogho’ witu en tampa niaku nu rimedeiy; ta’anouw ampit e limpon e laaku pa’ena’anla e nendo kasusa’an, e laa lumalesi se bangsa se mareo-reokan marego nikeiy. ¹⁷ Ma’anouw tu’u e nakana ara e reiy’ minungang, nakana e nanggor e reiy’ minee wu’ana, wua’na e nakana en zaitun e reiy’ minapateu-teula, ma’anouw tu’u em penguma’an-penguma’an e reiy’ minua’la bahan kekaanen, membe’ domba se neiy i keure’mi waki kinurungan, wo e reiy’la si lembu sapi witu eng kalero, ¹⁸ ta’anouw niaku ku laa merio-rio witu si TUHAN, melaya-laya’ witu si Empung limawirla niaku. ¹⁹ EMPUNG Tuhanku i ti’i si kaente’angku: Sia si simiwo e ne’aku tanu e ne’a ni rusa, Sia si minayala niaku mee nenus waki kakenturan-kakenturangku. ( I wee se ma’aka-aka ne biduan. Ampit em pema’ayangan kecapi )