¹ Niaku ku pa’ar mereredeiy witu en tampa tetegha’angku wo rumedeiy tumaga’ witu em pewale, niaku ku pa’ar melelales wo ma’ena’la sapa e laa i penenuwu’-Nala wia niaku, wo sapa e laa i wingkot-Na witu e rerapotku. ² O laa si TUHAN si miningkot niaku, en tuana: “I patikola em pineleloo’ i ti’i wo i lumi mola i tu witu e loh-loh, rio se tou kasuatan melangkoiy se toro maca nyi’a. ³ Karengan em pineleloo’ i ti’i e mengena-ngena’pe’ e nedona, ta’an nisia si minakarengan matorome eng kesampetanna ampit e reiy’ male’ekok; sakawisa mengere-ngerer, pa’ena’enola i tu, karengan e ni’itu e nuli-ulit laa meiy wo e reiy’ laa lumeken. ⁴ Eng kaulitna, sitou male’arla em be’ewer, e reiy’ teren e natena, ta’an sitou ulit i ti’i si laa tumou kaa e nemanena. ⁵ Tou tingkeiy wo le’ekok wiles sia si mesawa’, ta’an nisia si reiy’ laa mena-ena’ wia; sia si ngimangala en sumana tanu eng kaoatan ne tou minate wo si reiy’ mawesu-wesu tanu e maut, i ka’ayo se reiy’ sa mina’asa suku bangsa se nierurnala wo se reiy’ sa mina’asa bangsa se kina’ampetnala.” ⁶ Reiy’ ku’a re’en em pekasana ni’itu e laa masotla em peribaasa mari’awutla nisia, wo eng kekantaren sesero’-sesero’ ma’an en sesindir i yi’i: Cilaka mouw sitou si meka’arut i wee en touna sapa e reiy’ kapunya’anna – pirape’ eng keure kasi? – wo si mamuatla en touna ampit em barang neiy i eram. ⁷ Reiy’ ku’a re’en se laa tumo’or ampit e limo’osit i te nisea se makiki nikoo, wo laa mawongke nisea se simenge’la nikoo, i ka’ayo koo mamuali barang kinaat i wee nisea? ⁸ Karengan nikoo koo rimemu’ mola se kelaker suku bangsa, takar se bangsa-bangsa neiy i katele’u se laa rumemu’ nikoo, karengan e raa’ ne tou neiy i katoa’ i ti’i wo karengan eng kaketean witu em banua, eng kota wo se minapekasa pendudukna i ti’i. ⁹ Cilaka mouw sitou si maedo e nuntung reiy’ halal i wee em pemandungen em balena, kaa laa metetampala en sala’na waki tampa kerakek, ampit e maksut mewewayami en touna waki rongkeman eng kacilaka’an! ¹⁰ Nikoo koo timiro’ mola e walang mea witu natas em balemu, eng katoroan nikoo nu mekemaksut mekeka’apula se kelaker bangsa; ampit en tuana nikoo koo minakadosa mouw witu en toumu nuesa. ¹¹ Karengan em batu e mengale-ngaleiyi waki beton wo en salawako e mawingkoti nyi’a waki rangkang em bale. ¹² Cilaka mouw sitou si rimedeiyla eng kota witu natas e raa’ wo rimeta’la en to’otolan em benten witu natas eng kareiy’adilan. ¹³ Eng kaulitna, reiy’ ku’a re’en e waki si TUHAN em pakasa’an alam e nasalna, kaa se bangsa-bangsa se minapedi-pedis i wee e napi wo se suku-suku bangsa se memedu-medu i wee e reiy’ sipenoron? ¹⁴ Karengan em bumi e laa mawuta ampit en tine’u tanume eng kamulia’an ni TUHAN, tanu en dano timutuwla en to’otolan en tasik. ¹⁵ Cilaka mouw sitou si mawee kumoo’ si kasuatna nu tou sinewok e nupi’, awes tare tumoekla nisia kaa laa metetu’us e nauratna. ¹⁶ Winesumu mola en toumu ampit en sesero’an sawel eng kaorematan. Kumoo’ mouw kangkasi koo wo mapedo-pedo mouw. Wia nikoo e laa merami em piala waki lawas lele’os ni TUHAN, wo e walang wangko’ e laa lumi’ikerla eng kamulia’annu. ¹⁷ Karengan eng kaketean witu eng kuntung Libanon e laa tumutuwla nikoo wo em papunengan se tekapen-tekapen e laa sumenge’la nikoo, karengan e raa’ ni tou neiy i katoa’ i ti’i wo karengan eng kaketean witu em banua, eng kota wo se minapekasa pendudukna i ti’i. ¹⁸ Sapa ku’a re’en eng ka’ara’anna si patong pina’at, si pina’at ni sumesiwo nisia? Sapa ku’a re’en eng ka’ara’anna si patong tinoa’, si mengengajar en towo i ti’i? Karengan si sumesiwo nisia si ma’emanla si siniwona, e nulitna se berhala-berhala wowo’ waya se siniwona. ¹⁹ Cilaka mouw sitou si meila’ wia siesa nga ketor kayu: “Mawongke mouw!” wo wia siesa watu wowo’: “Tumo’orouw!” Ma’an tu’una nisia i ti’i si mawee teturu’? Memang nisia si sino’okepla e mas wo em perak, ta’an e roh eng kasa reiy’la witu eng goremna. ²⁰ Ta’an si TUHAN si witu eng gorem em bait-Na kudus. Makapenesola en tou witu en sinaru-Na, ee pakasa’an em bumi!