¹ Tetotoren kaempungan witu em pineleloo’ ni nabi Habakuk. Nga’angal ni nabi karengan eng kareiy’lale’an ² Pirape’ eng keure kasi, TUHAN, niaku marekeiy, ta’an e reiy’ palingan-Nu, niaku ku maaleiy wia-Nikoo: Palotoiyan!” ta’an reiy’ tulungen-Nu? ³ Ka’a Koo minapaloo’ola wia niaku eng kalewo’an, i ka’ayo aku timu’us eng kawengi’isan? Yon, en siasa wo eng kaketean em bitu en saruan em berenku; em pesesede’an wo em pe’isingan e minamuali. ⁴ Ni’itu mouw eng karenganna e nukum eng kinaliongan eng kaente’anna wo e reiy’ ma’an mekasa modol eng ka’adilan, karengan se tou lewo’ se kimepung se tou ulit; ni’itu mouw eng karenganna eng ka’adilan e minodol neiy i kepasu’i. ⁵ Loo’onouw witu e nelet ne bangsa-bangsa wo weeanola ghenang, mamuali mouw ma’erang wo i kenganga-nganga, karengan Niaku ku timuanala e nesa pepa’ayangen witu en zamannu e reiy’ laa emanen niouwla, sa i susuiyla. ⁶ Karengan, eng kaulitna, Niaku mouw si timo’orla se tou eng Kasdim, se bangsa lela’ wo lali’iket i ti’i, se limease eng kapenar e werotna em bumi kaa laa mereruberla en tampa paena’an, reiy’ kapunya’an nea. ⁷ Bangsa i ti’i se hebat wo mekeide’en; ka’adilanna wo eng kerakekanna e nasal wia nisia nuesa. ⁸ Kawalona si lebe repet ta’an si macang ti’itikan, wo si lebe lela’ ta’an si serigala witu e nedo wengi; pasukan mesake-sake kawalona se mineiy menge’ang, waki wa’akat sea meiy, tumelew tanu si rajawali sumear si pengaanen. ⁹ Se minapekasa bangsa i ti’i se mineiy kaa laa metetuanala eng kaketean, regoan ne pasuka reriorna tanu e reghes sedangan, wo nisea se merurla se tinaang tanu eng kelakerna e neris. ¹⁰ Raja-raja se sinero’annala wo se makua-kuasa – makua-kuasa se minamuali keke’eke’enna. Ni’i pake’eke’nala susur en tampa makarereen, i tawunnala en tana’ wo ro’obitenna en tampa i ti’i. ¹¹ Takar tumingkasouw sea, tanu e reghes wo maoghe reiy’ siena’na, en tuana mouw nisea nu simelok ampit e maopo’la eng kaente’anna. Waki wisa ku’a re’en eng ka’adilan ni TUHAN? ¹² Reiy’ ku’a re’en Nikoo, ee TUHAN, wakipe’ eng ketareanna Empungku, Si Kasakudus? Reiy’ laa mate keiy. Oh TUHAN, neiy mouw i tataap-Mula sia kaa laa me’ukumla; ee Kuntung Watu, neiy mouw i tantu-Mula sia kaa laa sumiksa. ¹³ Em berennu en talous suci kaa laa lumoo’ eng kalewo’an wo Nikoo koo reiy’ mete’u tumu’us eng kawengi’isan. Ka’a Koo matu’usla se tou-tou masiwo e le’ekok wiles i ti’i wo Nikoo koo minakapenes en tou, sakawisa se tou wu’ul eng kalakuan se nume’enep se tou lebe ulit ta’an nisia? ¹⁴ Nikoo koo simiwola sitou i ti’i tanu si sera’ witu en tasik,, tanu se tekapen-tekapen maoyouw se reiy’la si maperentana? ¹⁵ Em baya nea se niadetna mea waki atas ampit e nopas, sinikop ampit em puketna wo nierurla ampit en tetenemanna; ni’itu mouw eng karenganna nisia si mepa’a-pa’ar wo merio-rio. ¹⁶ Ni’itu mouw eng karenganna i papasempenala en tetule i wee em puketna wo tinununa en tetule i wee en tetenemanna; kaa eng karengan em pakakas-pakakas i ti’i em peka’atoanna mewah wo em bene’na e meloko-lokon. ¹⁷ Karengan e ni’itu ku’a re’en nisia si reiy’ maena-ena’ mesawut en santina wo mawunu’ se bangsa-bangsa ampit e reiy’ makasine’u en tongkoupusen?