¹ Ghenangenola si Simiwo nikoo witu e masa mudamu, nu reiy’pe’ neiy i ka’ayo e nendo-nendo kabelot wo tumawi en te’un-te’un neiymu i lila’la: “Reiy’la sikasenaangan i wee niaku witu e nyi’a!”, ² nu reiy’pe’ siendo wo en terang, sumedot wo se sumesena’-sumesena’ mareiydem, wo e linaak-linaak mineiy sumeup nu reiy’ mouw e naro, ³ witu e nedo se tumetayur-tumetayur em bale nu matenggo’ogho’, wo se tou-tou ente’ se minengkur, wo se wewene-wewene gumegiling nu minena’ karengan kinareu’an eng kelakerna, wo se maloo’omi waki teteboan em baya nea se minakewur, ⁴ wo em pepalen-pepalen witu e li’ilik lalan e minakusi, wo legu’an em pagilingan e minalewea’, wo en suara minamuali tanu e name’an ni wara, wo em baya ne kumekantar wewene se timu’utuk, ⁵ o kangkasi sitou si mineide’ mererakek, wo kineide’an witu e lalan, nakana em badam e minungang, kompo’ se makeong en touna ampit eng kasa pedis wo en serit mekaan e reiy’ mouw mete’u to’oreni kasi – karengan sitou si minea waki e walena ke’ekel wo se mengengarip-mengengarip se memoya-moya wia lalan, ⁶ nu reiy’pe e rante perak rinangkutla wo em barung mas pinete’la, nu reiy’pe’ en tampayang e rinimu’umukla tawi eng kembu’an wo e wola en tetimba en tinerila witu natas em parigi, ⁷ wo e riawu minareng minamuali tana’ tanu eng ketareanna wo e roh minareng wia si Empung si kimaruniala nyi’a. ⁸ Reiy’ sipenoron witu e reiy’ sipenoron, pokeiy ni Pengkhotbah, e reiy’ sa mina’asa wo’o sapa nyia’ mouw e reiy’ sipenoron. Kesampetan e lelila’an ⁹ E walinana ni Pengkhotbah nu makahikmat, nisia si maweela teturu’ kangkasi wia se umat i ti’i en tine’u. Sia si memili-miling, meuji wo rimansun kelaker e amsal. ¹⁰ Pengkhotbah si me’inakut maka’ato e lelila’an-lelila’an makasenaangen wo matik e lelila’an-lelila’an eng kaulitan eng kenaramen redeiy. ¹¹ Lelila’an-lelila’an ne tou makahikmat tanu eng kuasa wo e nieruran-nieruran e nyi’a tanu em paku-paku neiy i kepa’asek, neiy i weela ni esa rumerawir. ¹² Awes kangkasi, oki’ku, tumeghamouw! Sumiwo laker buuk e reiy’ laa wawean sikesampetanna, wo laker metete’u e makawedun e nouwak. ¹³ Kesampetan e lelila’an waki e reiy’ sa mina’asa e lininga nyi’a mouw: meide’ mola si Empung wo tumiboiy mouw witu em perenta-perenta-Na, karengan e nyi’i eng kawajiban ne susur tou. ¹⁴ Karengan si Empung si laa mali susur em pasiwo-siwon mea waki paadilan em pepaken witu e reiy’ sa mina’asa wo’o sapa neiy i kakirong, aandi i tu le’os, aandi i tu lewo’.