¹ Takar witu en te’un kasiouw waki paperenta’anna, witu en sumedot kamapulu’, witu en tanggal sepuluh sumedot ni’itu, meiy mouw si Nebukadnezar, raja Babel, ampit se reiy’ sa mina’asa surarona rumego e Yerusalem. Sia si dimasing kimepung nyi’a wo rumedeiyla em beton pakepungan eng kaledongna. ² Tuana mouw eng kota i ti’i kinakepungan i ka’ayo en te’un kamapulu’ o esa en zaman ni raja Zedekia. ³ Witu en tanggal sembilan en sumedot kaepat, katoroan eng kelalenan e minakalela’ mola witu eng kota i ti’i wo e reiy’ mola kasi kekaanen witu se rakyat em banua i ti’i, ⁴ takar kewe’enouw ne tou em beton eng kota i ti’i wo em baya ne suraro se timingkasla en tou wewengian timorola em pepalen leloangan e nelet e rua beton em bitu en tawi en taman ni raja, ma’anouw tu’u se tou eng Kasdim se kimepung eng kota i ti’i esa nga kaledong. Nisea se matingkas matorome mengea Araba-Yordan. ⁵ Ta’an se suraro Kasdim se mekeki’it si raja waki muri wo mina’ayola nisia waki kepataran Yerikho; se reiy’ sa mina’asa surarona se minesesera mouw timele’ula nisia. ⁶ Nisea se simikop si raja wo mali nisia wia si raja Babel waki Ribla, si mineela ukuman witu nisia. ⁷ Se tou se rimeret se oki-oki’ ni Zedekia witu en saruan em berenna , kamurian e rinapanala em beren ni Zedekia, laa o sia ranten ampit e rante tambaga wo alin waki Babel. ⁸ Witu en sumedot e kalima witu en tanggal tujuh sumedot e ni’itu – ni’itu mouw en te’un kamapulu’ o siouw en zaman ni raja Nebukadnezar, raja Babel – meiy mouw si Nebuzaradan, kapala ne pasukan pateper, pegawai ni raja Babel, mineiy waki Yerusalem. ⁹ Sia si rimengis em bale ni TUHAN, em bale ni raja, wo em baya em bale waki Yerusalem; em baya em bale ne tou-tou sela en tinununa ampit e napi. ¹⁰ Beton esa nga kaledong eng kota Yerusalem neiy i ronga’la em baya ne suraro Kasdim se witu mewali-wali ampit si kapala pasukan pateper i ti’i. ¹¹ Tele’u-tele’u ne rakyat se neiype’ i katele’u witu eng kota i ti’i wo em baya ne sumese’epang se limewete waki weteng ni raja Babel wo se tele’u-tele’u ne tou kelaker se neiy i atere witu em pasea’an ni Nebukadnezar, si kapala pasukan pateper i ti’i. ¹² Se pira i tela tou miskin waki wanua i ti’i se neiy i tele’ula ni kapala pasukan pateper i ti’i kaa laa mamuali maweresi-weresi e numa anggor wo mengenguma-mengenguma. ¹³ O kangkasi em pa’asek-pa’asek tambaga em bitu em bale ni TUHAN wo eng kareta patobol wo en “tasik” tambaga em bitu em bale ni TUHAN em pinete’la ne tou eng Kasdim wo en tambaga neiy i ater nea mea waki Babel. ¹⁴ Kure’-kure’, sesodo-sesodo, pai’-pai’ wo eng kower-kower wo e reiy’ sa mina’asa pakakas tambaga em pepaken kaa laa mesesiwola kabakti’an, e niedo nea, ¹⁵ o kangkasi em pewaa’an-pewaa’an wo em bokor-bokor pasereuwan, le’os e waki reiy’ sa mina’asa e mas o siwon ka’apa waki e reiy’ sa mina’asa em perak o siwon, e niedo ni kapala pasukan pateper i ti’i. ¹⁶ Sapa tare e rua pa’asek, en “tasik” e nesa i ti’i, eng kareta patobol en siniwo ni Salomo i wee em bale ni TUHAN, reiy’ katimbangan en tambaga witu e reiy’ sa mina’asa pakakas i yi’i. ¹⁷ Mapulu’ o uwalu hasta eng kerakekna em pa’asek esa, wo witu natasna e wawean sengkang tambaga; kerakek en sengkang i ti’i en telu hasta wo em pure’eket-pure’eket wo e wu’ana-wu’ana en delima em bitu natas en sengkang i ti’i esa nga kaledong, em baya nyi’a i ti’i en tambaga. Wo en tanu ni’itu kangkasi em pa’asek karua, e rinapitla em pure’eket-pure’eket. ¹⁸ O laa si kapala pasukan pateper i ti’i si simikop si Seraya, imam kapala, wo si Zefanya, imam ransun karua wo se telu tou tumetayur em pepalen. ¹⁹ Waki kota i ti’i sinikopna siesa pegawai istana si pinopo kumapalala se suraro, wo se lima tou pelayan pribadi ni raja se niato witu eng kota i ti’i, wo si panitera panglima ne suraro si minoghela se rakyat em banua minamuali suraro, wo se enem nga pulu’ tou waki se rakyat em banua se niato witu eng kota i ti’i. ²⁰ Nebuzaradan, si kapala pasukan pateper, si simikop nisea wo mali nisea wia si raja Babel, waki Ribla. ²¹ O laa si raja Babel si rimeo munu’ nisea waki Ribla, waki tana’ Hamat. Tuana mouw se tou Yehuda nu neiy i atere witu em pasea’an waki tana’na.

²² En tanume se rakyat se maena’pe’ waki tana’ Yehuda e neiy i tele’ula ni Nebukadnezar, raja Babel, poponna mola witu nisea si Gedalya bin Ahikam bin Safan. ²³ Katoroan em baya se panglima ne suraro ampit se tou-touna nu liminga kaa si raja Babel si minopo mola si Gedalya, takar mea mouw sea wia si Gedalya, waki Mizpa, nyi’a i ti’i si Ismael bin Netanya, Yohanan bin Kareah, Seraya bin Tanhumet, tou e Netofa i ti’i, wo si Yaazanya, oki’ niesa tou Maakha, mewali ampit se anak buahna. ²⁴ Laa o tumiwa’ mouw si Gedalya wia nisea wo se anak buah nea, pokeiyna wia nisea: “Te’a mouw kouw meide’ wia se pegawai-pegawai tou eng Kasdim i ti’i;mena’mouw wia em banua i yi’i wo tu’utukouw wia si raja Babel, takar eng ka’ada’annu e laa mamuali le’os.”