¹ Nu reiy’ mouw si Ahab nu minate, takar rumangu mouw si Moab witu si Israel. ² Witu e nendo mekasa ka’anu momi si Ahazia waki ansouw eng kamar atasna em baki Samaria, laa o merara’an. Kamurian i papa’alina mola se tetoke-tetoke ampit e nower: “Mea mouw, kumiwee mouw teturu’ wia si Baal-Zebub, empung waki Ekron, sapa ku’a re’en niaku ku laa male’osi waki rumara i yi’i,” ³ Ta’an mee mouw nuwu’ si Mala’ekat ni TUHAN wia si Elia, tou en Tisbe i ti’i: “Tumo’orouw, mae mouw matola se tetoke-tetoke ni raja Samaria, wo i lila’la wia nisea: Sapa ku’a re’en e reiy’la si Empung waki Israel, i ka’ayo nikouw i yi’i kouw minea kaa laa mekekiwee teturu’ wia si Baal-Zebub, empung waki Ekron? ⁴ Kaa ni’itu en teinti’i mouw e nuwu’ ni TUHAN: Nikoo koo reiy’ mouw laa tumo’ori kasi waki tetekelan, witu e wisa nikoo nu limo’or, karengan nikoo koo tantu mouw laa mate.” Laa o mea mouw si Elia. ⁵ Nu reiy’ mouw se tetoke-tetoke i ti’i nu minareng wia si raja, lumila’ mouw sia wia nisea: “Ka’a kouw minarengi?” ⁶ Wingkot nea wia nisia: “Wawean siesa tou mineiy matola nikeiy wo lumila’ wia nikeiy: Mea mouw, marengouw wia si raja si rimeo momi nikouw, wo i lila’ mola wia nisia: Teinti’i mouw e nuwu’ ni TUHAN: Sapa ku’a re’en e reiy’la si Empung waki Israel, i ka’ayo koo rumeo kumiwee teturu’ wia si Baal-Zebub, empung waki Ekron? Kaa ni’itu koo reiy’ mouw laa tumo’ori kasi waki tetekelan witu e wisa nikoo nu limo’or, karengan nikoo koo tantu mouw laa mate.” ⁷ Laa o mueiy mouw sia wia nisea: “Kumura ku’a re’en e rupa ni tou si mineiy mouw matola nikouw i ti’i wo si limila’la e lelila’an i yi’i wia nikoo?” ⁸ Wingkot nea wia nisia: “Siesa tou minake e labung wola, wo e ne’ereten kuli’ neiy i kewa’akes witu e rereenanna.” Takar lumila’ mouw sia: “Ni’itu si Elia, tou en Tisbe!” ⁹ Nu reiy’ mouw i tu i reona mola wia si Elia siesa perwira ampit se lima nga pulu’ anak buahna. Tou i ti’i si simosor matola si Elia si kasuatan rimuber witu natas en toka kakenturan. Lumila’ mouw sitou i ti’i wia nisia: “Heiy abdi ni Empung, raja si minee titah: “Merosouw!” ¹⁰ Ta’an si Elia si miningkot, pokeiyna wia si perwira i ti’i: “Sa ulit niaku abdi ni Empung, ma’anouw tu tumumpami e napi waki langit kumaan nikoo ma’apu ampit se lima nga pulu’ anak buahmu.” Takar tumumpa momi e napi waki langit kumaan nisia mina’apu ampit se lima nga pulu’ anak buahna. ¹¹ Kamurian si raja si rimeo kasi siesa perwira walina ampit se lima nga pulu’anak buahna. O laa sitou iti’i si limila’wia si Elia: “Heiy abdi ni Empung, teinti’i mouw en titah ni raja: Makarenganouw meros!” ¹² Ta’an si Elia si miningkot nisea: “Sa ulit niaku abdi ni Empung, ma’anouw tu tumumpami e napi waki langit kumaan nisia ma’apu ampit se lima nga pulu’ anak buahna. ¹³ Kamurian si raja si rimeo kasi siesa perwira katelu ampit se lima nga pulu’ anak buahna. Laa o sumosorouw si perwira katelu i ti’i wo nu neiy mouw i ka’ayola, kumururouw sia witu en sinru ni Elia, ma’an maaleiyla en tongkoupusen wia nisia, pokeiyna: “Ee abdi ni Empung, ma’anouw satorona e nyawaku wo e nyawa ne lima nga pulu’ tou se hamba-hambamu i yi’i e maka arga witu em berennu. ¹⁴ Reiy’ ku’a re’en e napi en timumpa momi waki langit eng kimaan mina’apu se rua perwira rerior ampit se lima nga pulu’ anak buah nea? Ta’an en teakan ma’anouw e nyawaku e maka arga witu em berennu.” ¹⁵ Takar mee mouw nuwu’ si Mala’ekat ni TUHAN wia si Elia: “Merosouw mewali-wali nisia, te’a mouw meide’ wia nisia!” Laa o tumo’orouw si Elia wo meros mewali-wali nisia sumaru si raja. ¹⁶ Lumila’ mouw si Elia wia si raja: “Teinti’i mouw e nuwu’ ni TUHAN: Eng karengan nikoo koo minapa’ali mola se tetoke-tetoke kaa laa mekekiwee teturu’ wia si Baal-Zebub, empung waki Ekron, tanu mokan e reiy’la si Empung wia Israel laa pewewueiyala e nuwu’-Na, takar eng karengan e ni’itu nikoo koo reiy’ mouw laa tumo’ori kasi waki tetekelan, witu e wisa nikoo nu limo’or, karengan nikoo koo tantu mouw laa mate.” ¹⁷ Takar mate mouw si raja minatoroan ampit e nuwu’ ni TUHAN neiy i lila’la ni Elia. Takar si Yoram si minamuali raja simawelela nisia witu en te’un karua en zaman ni Yoram bin Yosafat, raja Yehuda, Karengan si Ahazia si reiy’ makapunya oki’ tuama. ¹⁸ Esa nga lebena waki na’asaren ni Ahazia, sapa en tinuananala, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Israel?