¹ Daud si minerurla waki Yerusalem se reiy’ sa mina’asa pemangko’ ne Israel, nyi’a i yi’i em baya ne kapala suku, em baya se ma’aka-aka e rewok ne tou-tou se melayanla si raja, em baya se kapala pasukan esa nga riwu wo se kapala pasukan esa nga atus, ma’an em baya ne kapala eng harta benda wo ne ternak kapunya’an ni raja wo ne oki-oki’na; mewali-wali nisea kangkasi em baya se pegawai istana wo em baya ne perwira wo em baya ne pahlawan waraneiy. ² Laa o rumedeiy mouw si raja Daud wo lumila’: “Linganouw, heiy patuari-patuariku wo ee bangsaku! Niaku ku mekemaksut laa mereredeiyla wale paena’an i wee en tabut teta’aran ni TUHAN wo i wee eng kontoiyan e ne’a ni Empung ta; o kangkasi niaku ku simadia mola laa mereredeiyla nyi’a. ³ Ta’an si Empung si minee mola nuwu’ wia niaku: Nikoo koo reiy’ laa rumedeiyla wale i wee e ngaran-Ku, karengan nikoo i yi’i koo esa perajurit wo koo timoa’ mola raa’. ⁴ Ta’anouw si TUHAN, Empung Israel, si minelengola niaku waki elet ne pakasa’an e walakku kaa laa mamuali raja witu se Israel eng keure-urena; karengan Nisia si minelengola si Yehuda minamuali ma’aka-aka, wo e walakku waki elet ne kaum Yehuda, ⁵ wo waki elet ne oki-oki’ ni ama’ku Sia si minepa’arla wia niaku kaa laa mepepopo niaku tanume si raja witu se minapekasa Israel. ⁶ Sia si minee mola nuwu’ wia niaku: Salomo, oki’mu, nisia mouw si laa rumedeiyla em bale-Ku wo em pores-Ku karengan Niaku ku minelengola nisia minamuali oki’-Ku wo Niaku ku laa mamuali ama’na. ⁷ Wo Niaku ku laa tume’etepla eng keraja’anna i ka’ayo eng keure-urena, sa sia tumentem matuanala e reiy’ sa mina’asa perenta wo e natorang-Ku tanu en teakan i yi’i. ⁸ Takar en teakan, witu en sinaru em beren ne minapekasa Israel, jema’ah ni TUHAN, wo ampit em palingan ni Empung ta, niaku ku lumila’me wia nikoo: Piaranouw wo kiweenouw e reiy’ sa mina’asa perenta ni TUHAN, Empungmu, rio kouw minena-ena’ rumuberla em banua e le’os i yi’i wo meela nyi’a i ka’ayo eng keure-urena wia se oki-oki’mu ee sangari. ⁹ Wo nikoo, oki’ku Salomo, sine’unouw si Empung ni ama’mu wo rumaghesouw wia-Nisia ampit e makauli-ulit wo ampit eng kepa’aran e nate, karengan si TUHAN si masoisapla e reiy’ sa mina’asa ate wo mangarti e reiy’ sa mina’asa eng kepa’aran wo narapan e nate. Sa koo sumero Nisia, Takar Nisia si mepa’ar atonnula, ta’an sa koo tumele’ula Nisia takar Nisia si laa tumea’ nikoo i wee eng keurena. ¹⁰ Ghenangenola maka le’os en teakan, karengan si TUHAN si minelengouw nikoo kaa laa mereredeiyla e nesa wale mamuali tampa kudus. Ente’enola e natemu wo tuananola ni’itu.” ¹¹ O laa si Daud si simarakanla wia si Salomo, oki’na, e rencana pebebangunan waki balai em Bait Suci wo e woang-woangna, waki penu’utu-nu’utulanna, eng kamar-kamar atas wo eng kamar-kamar ghoremna, ma’an e waki woang i wee em pepenet em pedamean. ¹² Tumodongla nyi’a e rencana waki reiy’ sa mina’asa eng ginenangnala tanume em pores em bale ni TUHAN, wo e ruragh-ruragh witu esa nga kaledong nyi’a, tanume em penu’utu-nu’utulan – penu’utu-nu’utulan em bale ni Empung wo em penu’utu-nu’utulan – penu’utu-nu’utulan em barang kudus; ¹³ tanume se rewok-rewok em baya ne imam wo em baya ne tou Lewi wo en tanume e reiy’ sa mina’asa pepa’ayangen i wee e raghes witu em bale ni TUHAN wo e reiy’ sa mina’asa pakakas i wee e raghes witu em bale ni TUHAN. ¹⁴ O kangkasi sia si mineela e mas kawuter em pemandungen i wee e reiy’ sa mina’asa pakakas witu en susur e raghes; wo neiy i weenala em perak kawuter em pemandungen i wee e reiy’ sa mina’asa pakakas perak witu en susur e raghes, ¹⁵ nyi’a i yi’i eng kelakerna e mas i wee en sesoloan-sesoloan mas wo en solo-solona e mas o siwon, kawuter em pemandungen susur en sesoloan wo en solo-solo nyi’a, wo em perak i wee en sesoloan perak kawuter em pemandungen em perak i wee e nesa sesoloan wo en solo-solona, minatoroan ampit em pemakean susur en sesoloan witu e raghes. ¹⁶ Kamurian e neiy i weenala eng kelakerna e mas i wee e meja-meja roti sesakeiyan, meja o meja, wo em perak i wee e meja-meja perak o siwon; ¹⁷ tumodongla nyi’a e masa tulen i wee em porek-porek wo em bokor-bokor paserewan wo eng kure’- kure’ mas kawuter em pemandungen i wee susur em piala, wo em perak i wee em piala perak kawuter em pemandungen i wee susur em piala; ¹⁸ o kangkasi e mas en sinucila i wee e mezbah patunuan e nukupan kawuter em pemandungen wo e mas i wee em pesesiwoan eng kareta e minamuali tine’upan e rua kerub, e minitarla eng kale’ekewna kasuatan minorongla en tabut teta’aran ni TUHAN. ¹⁹ Em baya nyi’a i ti’i e niato witu em patikan neiy i tena’mi ni TUHAN wia niaku, e makapumpun en teturu’ tanume e reiy’sa mina’asa petetuana’anla e rencana i ti’i. ²⁰ Laa o lumila’ mouw si Daud wia si Salomo, oki’na: “Ente’enouw wo te’etepenola e natemu, wo tuananola ni’itu; te’a mouw meide’ wo te’a mouw tewang e nate, karengan si Empung TUHAN, Empungku, si rumapitla nikoo. Sia si reiy’ laa mayala wo tume’eula nikoo i ka’ayo e reiy’ sa mina’asa pepa’ayangen i wee e raghes witu em bale ni TUHAN sumampet. ²¹ Eng kaulitna, e rewok em baya ne imam wo em baya ne tou Lewi se wia kaa laa metetuanala e reiy’ sa mina’asa raghes witu em bale ni Empung, wo wawean se pirala sukarelawan se kasa sigha’ witu en susur e lukar se toro sumawang nikoo. O kangkasi em baya ne ma’aka-aka wo se minapekasa rakyat i yi’i em baya nisea se witu wawa’ em perentamu.”