2 Daud si rimeo merurla se tou-tou wo’oseiy se witu em banua ne tou Israel, laa o i tampanala se meneniwo-meneniwo kaa laa lumumi em batu-batu pepa’aten e laa pepepaken kaa laa mereredeiyla em bale ni Empung. 3 Tumodongla nyi’a si Daud si simadiala ka’asa’an em besi pesesiwon paku-paku i wee em pepalen leloangan wo i wee en tontanga’-tontanga’, o kangkasi ka’asa’an en tambaga reiy’ kinatimbangan eng kawuterna, 4 wo eng kayu aras e reiy’ i keila’ eng kelakerna, karengan se tou en Sidon wo se tou en Tirus se minali eng ka’asa’an eng kayu aras i wee si Daud. 5 Karengan eng genang ni Daud: “Salomo, oki’ku, si mudape’ wo reiy’pe’ awes eng kinelangani, wo em bale e lewo’ sa reiy’ i redeiynala i wee si TUHAN e lewo’ sa reiy’ mouw luar biasa eng kaselana i ka’ayo mamuali mekengaran wo kasa kasine’uan waki e reiy’ sa mina’asa wanua; kaa ni’itu le’osouw aku sumadiala i wee nisia!” O laa si Daud si simadiala eng ka’asa’an nu reiy’pe’ sia nu mate. 6 Kamurian si kineretna si Salomo, oki’na, wo wineeanna perenta sia kaa laa mereredeiyla em bale i wee si TUHAN, Empung Israel, 7 pokeiy ni Daud wia si Salomo: “Oki’ku, niaku nuesa ku mekemaksut laa mereredeiyla wale i wee e ngaran ni TUHAN, Empungku, 8 ta’an e nuwu’ ni TUHAN mineiy wia niaku, en tuana: Neiymu mouw i toa’la ka’asa’an e raa’ wo koo timuana mola em paseke’an kasa wangko’; nikoo koo reiy’ laa rumedeiyla wale i wee e ngaran-Ku, karengan lakerouw e raa’ neiy i toa’mula witu en tana’ witu en sinaru-Ku. 9 Eng kaulitna, siesa oki’ tuama si laa i patoula i wee nikoo; nisia si laa mamuali esa tou si kinaruniala eng ka’amanan. Niaku ku laa kumaruniala eng ka’amanan wia nisia waki se reiy’ sa mina’asa kesaruna waki esa nga kaledong. Sia si laa mekengaran Salomo; sejahtera wo en santosa e laa-Ku i weela witu se Israel witu en zamanna. 10 Nisia mouw si laa rumedeiyla wale i wee e ngaran-Ku wo nisia mouw si laa mamuali oki’-Ku wo Niaku ku laa mamuali Ama’na; Niaku ku laa tume’etepla en takhta keraja’anna witu se Israel i ka’ayo eng keure-urena. 11 Takar en teakan, heiy oki’ku, TUHAN satorona si rumapitla nikoo, i ka’ayo koo mua’ rumedeiyla em bale ni TUHAN, Empungmu, tanu neiy i nuwu’-Nala en tanume nikoo. 12 Ta’an i te, si TUHAN satorona si meela wia nikoo akal budi wo em pangartian wo sumiwo nikoo mamuali matibo-tiboiy em perenta witu se Israel, rio koo miara en Taurat ni TUHAN , Empungmu. 13 Takar nikoo koo laa mua’, sa koo tumuanala ampit e lale’ eng katataapan-katataapan wo e nukum-ukum neiy i perentala ni TUHAN wia si Musa i wee se tou Israel. Ente’enla wo te’etepenola e natemu, te’a mouw meide’ wo te’a mouw tewang e nate. 14 Eng kaulitna, ma’anouw tu’u witu eng kasusa’an, niaku ku simadia mola i wee em bale ni TUHAN i ti’i esa nga atus nga riwu talenta mas wo esa nga yuta talenta perak wo eng kasa ka’asa’an en tambaga wo em besi, i ka’ayo eng kawuterna e reiy’ kinatimbangan; o kangkasi niaku ku simadia mola eng kayu wo em batu. Ta’an e le’osouw koo mawesla nyi’a kasi. 15 Awes kangkasi nikoo koo makapunya ka’asa’an se memema’ayang, nyi’a i yi’i se memema’at-memema’at em batu, se meneniwo-meneniwo em batu wo eng kayu wo se tou-tou kasa sigha’ witu e reiy’ sa mina’asa pepa’ayangen 16 e mas, em perak, en tambaga wo em besi, e reiy’ karekenan eng kelakerna. Muleiy mouw ma’ayang! TUHAN satrona si rumapitla nikoo!” 17 Wo si Daud si minee perenta wia se reiy’ sa mina’asa pemangko’ ne Israel i ti’i kaa laa mee sesawang wia si Salomo, oki’na, pokeiyna: 18 Reiy’ ku’a re’en si TUHAN, Empungmu, si rimapitla nikouw wo kimarunia mola eng ka’amanan wia nikoo mea waki e reiy’ sa mina’asa ruuna. Nulit, Nisia si simarakanola se penduduk em banua i yi’i witu lawasku, i ka’ayo em banua i yi’i en tu’utuk witu en sinaru ni TUHAN wo wia se umat-Na. 19 Takar en teakan, i papatoro mola e nate wo imukurmu kaa laa sumero si TUHAN, Empungmu. Muleiy mouw rumedeiyla en tampa kudus ni TUHAN, Empung, rio en tabut teta’aran ni TUHAN wo em pakakas kudus ni Empung en toro alin ghumorem witu eng gorem em bale neiy i redeiyla i wee e ngaran ni TUHAN.”