¹ Tou em Filistin se maseke’ mesaru se tou Israel. Tou-tou Israel se timingkasi en tou waki sinaru ne tou em Filistin wo kelaker se minate kinawunu’an waki kakuntungan Gilboa. ² Tou em Filistin se reiy’ maena-ena’ mekeki’it si Saul wo se oki-oki’na wo minatela si Yonatan, Abinadab wo si Malkisua, se oki-oki’ ni Saul. ³ Kamurian e makawuterola em paseke’an i ti’i i wee si Saul; em baya ne mememana se minatola nisia wo minali’la nisia. ⁴ Laa o lumila’ mouw si Saul wia si mengengali en senjatana: “Sawutenouw en santimu wo kuekenouw aku, rio te’a meiy se tou-tou reiy’ makasunat i yi’i tumuanala niaku tanu se pepa’ayangen.” Ta’an si mengengali en senjatana si so’o, karengan nisia si kasa ormat. Kamurian si Saul si minedo en santi i ti’i wo mepeka’anula en touna witu natas nyi’a. ⁵ Katoroan si mengengali en sejatana nu limoo’, kaa si Saul si minatemouw, sia tu’u mepeka’anula en touna witu natas en santina, laa o mate. ⁶ Jadi si Saul, se telu oki’na wo se pakasa’an ne me’urangna se mewali-wali minate. ⁷ Katoroan linoo’ ne miapekasa tou Israel se waki kewong, kaa se suraro se timingkasola en tou, wo kaa si Saul ma’an se oki-oki’na se minate mouw, takar sea tumele’ula eng kota-kota nea laa o tumingkasla en tou kangkasi; kamurian meiy mouw se tou em Filistin wo mena’ maname. ⁸ Katoroan e nendo kawo’odoanna se tou em Filistin se mineiy kumaatla wia se tou-tou minate kinawunu’an i ti’i, kina’atoan neala si Saul wo se oki-oki’na se neiy i keta’ater waki kakuntungan Gilboa. ⁹ Sea se kimaatla wia nisia wo medo eng kokong ni Saul wo en senjata-senjatana, laa o rumeo tou lumedong waki wanua ne tou em Filistin kaa laa ma’ayola e nabar i ti’i wia se berhala-berhala nea wo wia se rakyat. ¹⁰ Kamurian sea meela en senjata-senjata ni Saul witu eng kuil ni empung nea, ta’an en tereuka’ eng kokongna neiy i paku neala witu em bale ni Dagon. ¹¹ Katoroan se minapekasa Yabesh-Gilead nu liminga tanume e reiy’ sa mina’asa en tinuana mola ne tou em Filistin wia si Saul, ¹² takar tumiro’ mouw se pakasa’an tou waraneiy, laa o mea medo e mayat ni Saul wo e mayat ne oki-oki’na. Nisea se minali nyi’a mea waki Yabesh wo kumuburla e ruiy-ruiy nea waki wawa’e nakana wangko’, waki Yabesh. Nu reiy’ mouw i tu moso mouw sea pitu nga endo eng keurena. ¹³ Tuana mouw si Saul nu minate karengan em pasiwo-siwonna reiy’ lale’ wia si TUHAN, eng karengan nisia si reiy’ timiboiy witu e nuwu’ ni TUHAN, wo kangkasi eng karengan nisia si kimiwee mouw teturu’ waki se imukur ne minate, ¹⁴ wo si reiy’ kimiwee teturu’ ni TUHAN. Kaa ni’itu si TUHAN si minunu’ nisia wo simarakanla en jabatan raja i ti’i wia si Daud bin Isai.