ANA PEK IUNGMI MATEN NACHANG KOWNMI ¹ En amatni kowi pe tuk ah diah mingkhetmiuüa hai chintakmiuüa kowi ringkaw ma hai nachün pe kownka, bowk bowk mih lup tia kowi changla kownka kamrütra pauowi lah, ² miaiawngmi kowi hang pa nichak lah nowng khamma hai hang pa tanga lah, bowk bowk maru hown ringkawma pataklawp taiua lah, ³ tawngplawngka achük khe apawpma, lai iüama, samuma, lowra mih suiiaima mih kowi awmrawm lah nami klen kowi piawpa nar kowi, ngowrowma hai angakma khin uowita khai, suiiaima iawng uowi khai, now lowkia lowkia kowi tangowrow khai. ⁴ Nachenganchepaw tawngnam hownia chow a i kow lawngmiia Thurai chimsai mami kiangkrang hai lusa maru lukkowi sakraura natüng kown. ⁵ Nami khin khe a-i tachitanawmra kowi nadowi, natrapchedow a-ia saksing sanara kowi chekhai, asar hown dia rakowi a i kow sak asaima sauta khai bowt hanow lümla sai hown asar hown uang lawng a i khai bowt. ⁶ Lawngmiia Isu Krista hownia name lümla dow aküm angima uang pe a i khai. ⁷ Nahanow aia sanara kowi tachitanawm ma hai achowngma singra sakowmra dow a-i na ia powng kown chekhai. ⁸ Mami lai dow achihma chekhai; now ang nau mih dow maiawng chekhai, maiawng ün maten lawnguan kowi en mih akhawtma tekpe lai diah; amiangai chow Thurai prakowi owm khowk mih, amatni lup iung nachowng kown mih patuak lah. Maiawng ün mih dow maru vüi kowi iungra hai maratra uowi mih chekhai. ⁹ Nachenganchepaw en mi dow taking tasangra uowi dowi mi krungchak nakhai. Taranra hai rirow kowi taüa hownia alakma kowi lang tahen diah; nami rakowi asumra klen kowi matawngpaw maratra uowi dowi. ¹⁰ Thum piakmi maru kowi, presumkat hangah kung kowi naprütah kown; ¹¹ matah reng diah, naiawng mih maru dow chanlaira uowi dowi rakowi aia dow chang angak aprek reng khai, pamatia kowi dow tape aprek khai. ACHUR LAIMAK ¹² En tut-e Artima nadowi hanow Tukhi kowi ang nauang chin mih khin khe, nami khin kowi en Nikpawli marow kowi ang tute alenma uang, tawngplawng chungrau khin khe nakowi ang nauowi kownmi khowmta hüa chekhai. ¹³ Rirow sara Sina kowi hai Apalul kowi klangiungma hown uang chin diah, amatchi kow tawngiawng paw akhawr uowi dowi pat. ¹⁴ Now a i kow maruuüa paw takla powmiawng dow lup iung nachang kown ka sangah now nami iawng pamatia kowi pacham tatawng takengah lah, tawngplawng uih dowi iawng mi hang pacham na lah. ¹⁵ Ang auiuauüa bowk bowk mi pe en kiowri khai. Owm rah hai lawm sakrau anging miuüa, amatni kowi dow tekpe kiowri lai diah. Sanara dow enni luk kowi pacham reng uowi lah. Amen.