ALAWNG 2
LAWNGTANG, LKANGUÜA HAI NAR MATEN TUT-E LAIMAK
1
Natarapchedow en aiungma mih tüngsangra lahawm taka mih lai dow tek diah.
2
Lawngtanguüa kowi tekpe diah, amatni dow amatni kowhkowi pacham tatow khati lah, khatima hai owmra, tasakraura nowng hown nowng chawngmi owmra aiungma pacham own lah.
3
Naiawng mih lawngtang masiuüa uüa kowi tekpe diah, amatni kowh chowmkrang uowi krang hownia ringkawma mih taingiawng dow pacham uowi lah, akeng mih masiuüa kowi prawngren dowi hai pua pukma hang pa own lah, aiung aiung uan kaah asang iawng dow amatni mih pacham na lah;
4
Amatni mih dow malauuüa uowi krang nowng town kowh kown iawng hai pacham uowi lah, nahanow amatni mih ahua hai chama chapauüa kowi pacham sakrauah lah,
5
nowngtown kowh, tachitanawmra, kim kowika luk kowi saktuak uowi mih, sanara uowi mih hai aiamat hua nim krüa kowi uowi kown, naiawng hown dow Thurai ming nip dowi kowi naown kown.
6
Now klanguüa uüa kowi paw naiawng hown klanguüa paw nanowng town kowh kownka peah sangürra diah.
7
Nahanow pangmatia kowh lowra mih auan kowi aiungma lup kowi tüngah diah, en sang ah mih auan kaah to dowi iawng, nowngchawngma hai aseruowk uowi dowi, asürlawk uowi dowi mih laiklowh uowi mih,
8
nahanow kingküa mih maru miuüa dow amatni dow pacham ka rukrai lah, amatni dow angak rakowi tawngpaw tek kown mih uowi dowi.
9
Nar miangai chow amatni kowi dow tekpe diah, amatni kowh chakramang kowi ringkawma pacham uowi lah, now lowra mih kowi sangürma pacham chang lah now alalowma hown hang pa üa lai lah,
10
tawngpaw hang pacham paw hang pacham ku lah, tawngplawngka amatni kowh tachitanawmra pacham tatüng lah, nahanow amatni mih a i lawngmiia Thurai kowh lawnguan kowika sangah mih dow klangiungma na nowng tüng kown.
KRISTA AWR PÜN MIH HAI PLAN UANG DOWM KOWN MIH IUNGRA
11
Thurai sanara kowi aprek hownia ka lawngra khowk mih dow bowk bowk maru tut-e taphuang hown uowi khowk.
12
Nami dow sang a i khowk, ringkaw dowi hown a i uowila dowi kownka hai lusa kowika naura irra kowi na naula dowi kownka, nowngtownkow, chimsai hai ringkaw mami akhin kowi chownglawng dow uowiah diah,
13
nami klen kowi langkri mih Thurai lawngmiia Isu Krista kraingra uangtüng kown mih ni, nami ni a i nami awmrawmra dow sakowmra khawtma uowila kownka sangürma hown chawngah diah.
14
Aia dow a i uüi kowi aia uang tape khai, nami sung hown tachitanawm dowi miuüa kowh bowk bowk aprek hownia lawngta khai nami klen kowi pamatia maru vüi pamatia maruuüa kowi, lup iung kowi prüami maruüa kowi pachimsaiah khai.
15
En mami laiklow bowk bowk dow tek pe diah, now ana kümma hown tüngsangah diah, nami klen kowi hawiah ripah diah; en kowi miapaw nowng prawng nowng ren dowi kownka.