LANGHAWAH MIUÜA UOWI KRANG PRING HAWI LAWNGUAN ¹ Pawl Thurai kowh nar hai Isu Krista kowh chintakmi, Thurai langrui ah mih owmmiuüa powmiawng hai ringkaw krang iawng, chanlai anowmma mih powngiawng, ang lang sakrau ah mih chapa Tita kowi rui pe mih chasak chekhai. ² Chanlaira mih nami anowm chownglawng kowi sakowmra tatawm mih, lusa thawpdowi rawn khe hownia Thurai, aia tek lai dai dowi mih, aia dow mami chownglawng nape kownka kham khai, ³ Akhin uang tachi khe Thurai dow aia kowh laiklow mih uang phuang khai; a i kowh lawngmiia Thurai kowh ana powmiawng tawng ngai chow phuangla kown mih nami alow/ana dow pe ang khai. ⁴ Krista kowi ang hownka owmra akatsang na khowk mih dow nami ang kowh chapa sinma mih Tita chekhai. Pa Thurai hai a i lawngmiia Krista Isu hownia sanara hai thaulangra pacham uowi lah. ALUCHAH NACHOWNG KOWNMIUÜA LAWNGUAN ⁵ Ang Kriti süngdum kowi naiawng rakowi tatowla mih chekhai, lup ia chang dowi mih uowi mih, nami en nathikla kownka hai tawngiawng chow ang pe en ana mih powmiawng marow towng kowi aluchowuüa na chowngla kownka rui ah diah. ⁶ Lowkia lawngtangchah nachowng kown mih dow masi lowkia chowh nauowi kown mih chekhai, chauuüa uüa paw Krista owm mih naown kown chekhai, tawngiawng paw kaah angak dowi mih hai üa lai dowi mih naown kown chekhai (niawng mih mru kowi dow ruiah diah). ⁷ Thurai kowh lupchang mih maru powmiawng hown, lawngtangcha naown kown mih dow, mia paw aia kowi kaah prawngren dowi mih; uowi naklak dow mih, krow den dowi mih, puapuk dowi mih, tek naklak dowi mih irsi ngakma tangka pawisa lawpha dowi mih pacham na lah. ⁸ Nahanow pinsüa kowi thakuak mih, anowmma sakrau mih, nowngtown kowh mih, tara nowm tuk chet mih, tachi tanawmma mih hai nowngtow khati mih naown kown taklah. ⁹ Nami klenkowi lai nowm tek mih kaah aku mük mih mru aia naown kown takla, nami dow chap kawm mih lai mak tuk pe mih hai miaiawng mih chow kingküa mih kowi paw amatia kowh aprek nowng khüm pe mih naown kown mih chekhai. ¹⁰ Tawngplawngka chow maru kawmma laiüama mih uowi, miaiawng mih chow (asung uowi dow mih/kasialawng klowk dowi mih) laiklow tek mih hai puanlama chereng mih, Khampha uanpik hia kowika peching nownowm miuüa; ¹¹ naiawng ün mih maruuüa kowh nawr pitta pe kown takla, tawngplawngka amatni dow angak maratra asang hau dowi mih hown matawngkhe chünchü dow amaisang kimchak hing chumta büah khai. ¹² Amatni kowh powchak risi lowkia tek mih, ‘Krit kowika maruuüa dow dai achapma chekhai, rangpranma mih asadua, asilikma, lawnlama’ pakhai. ¹³ Mami dow lai nowm chekhai; niawng rakowi en mi amatni kowi dow asipma hown hawi ah mawm ah diah; nahanow amatni dow owmra hown aiungma paia uowi lah, ¹⁴ Judauüa kow sangchia lai awh hai anawngnia hownia kowh talah mih maru kowh alow pek prakowi hang pacham pe ching lah. ¹⁵ Achih anawmma mih maru tut-e bowk bowk mih achih anawmma chekhai; natarapchedow asür lawkmi hai owm dowi miuüa tut-e dow tawngpaw nachimsai kowi nadowi chekhai; nami klen kowi amatni kowh saktuah hai tuakra mih paw tasür talawk bowk chekhai. ¹⁶ Amatni takham mih dow Thurai kowi amatni tuk, tawkchedow alup hown dow tuk aia dowi chekhai; amatni dow suiiai mih tataing khai nami hai chün lai dowi mih hai tawngiawng mih lup chang kowi kaah atawngkeng dowi mih chekhai.