¹ Nakhe, Akrippa dow, Pawl tut-e tekpe mih dow, “enmat pra vüi awngcha laiklow alow enkowi peta khowk” pape khai. Nakhowk khe Pawl dow awrphar rut hanow, aiamat vüi awngcha laiklow tek khai. ² Aw mang Akrippa Judauüa chawktowk ang mih maiow hai nami kingküara kowi awngcha laiklow ani mih en purkowi ang natek kown mih khin iung kara kowi, ang matia kowi awmrawm khin atekma uowi pamih ang katuak khai. ³ Mamih chekhai, ang langnau mih dow, Judauüa pungma dawngkowi ari-arow mih hai tara maiow alawng auan kowi en kaneuma natuk kown, naiawng rakowi akhamsum ma hown en nasünta ang kownkowh anglü en khai. ⁴ Auown khe kowh ang ngeuuüa khe kowh hown ang chenchap pungma dawng kowi hai nami kung kowi Jerusalem marow kowi kow ang chownglawng uowi krang mih Juda maiow dow tuk büah chekhai. ⁵ Ni ahuma hownia kow ang kowi mih tuk büah chekhai, naiawng anging kow kawngmu apowng paw iu mih owmkrang Pharisai ming hown ang uowi ün mih hai Pharisai chownglawng krang iawng ang uowi mih ün dow, amatni nauah khai panü dow, saksi miiawng tawi tek ang kown chekhai. ⁶ Now, Thurai mih uang prek uangche ang mih uüa tut-e laikham lakhai, ang sakowmra tow hai laiklow kowi mami ra-e akawmat ang napaw pe tara kownkow iowng khai chaw. ⁷ Ang krungchak laipre chap mih, nini uar uar Thurai tut-e kanechow takua hown towplawng towsakma hai hanow, nami laikham tachi hown khi kown mih sakowm büah reng, aw mangkri, nami sakowmra laiklow rakowi dow Judauüa chawktowk hown me ang büah mih na chekhai chaw. ⁸ Thurai dow, kowng miuüa kowi awr krüngah khai pami matawng plawng kachow aowm uowi dowi chekhai pami enni tuakah khai? ⁹ Ang matia ngengche paw owmreng mih chadiah, Nazaret Isu ming kowi kingküa pra alup ahuma changta khai mih dow, nami maiow ang kowi paw chang kown lahawm chekhai. ¹⁰ Nahanow, nami iawng dow Jerusalem marow kowi paw ang changreng khai now, uama langkri mih uüa tut-e hownia alow ang ka hanow, maru achim asaima miuüa pungma dawng kowi maru akawmma thawngrum kowi paw ang klungah reng chekhai hanow, amatni kowi asak pawpe thüm khin khe paw, amatni kingküa prakowi saksi tawipe hown tawi tangi reng khai. ¹¹ Now, takuara kim towng kowi atung ma ang krawi towkah ngare reng chekhai, Isu laiklow natek dowi kownkow ang hangah krap khai; amatni luk kowi lainowm ma ang rang khai, akeng pren kua towng kowi pat paw ang krawi changah anowng apowng reng khai. ¹² “Naiawg nachangla kownkow uama langkri mih uüa alow hai amatni ana ang pawla hanow, Damaska marow kowi kowkowi khe. ¹³ Mangkri, nakhowk khe ang kakowi thüm khe nihawm chak khin chekhai, mukuang hownia matawng mih anowi kraingma chünchü sat lak-e lang nowi rowt, ang matia hai ang laiah miuüa ria kowi anowi mih anging khi khai. ¹⁴ Now, anging bowk bowk krawng kowi tim khai, ang tami Hebrai lai hown maiawng chaw tek ang khai, “Sawl, Sawl matawng plawng kachow en mih ang lukkowi chang anowng apowng khai mih chow? Achu uowi mi müa hown pamatia kowi tabawp e pamatia taih nadowi bow nalang sum kown?” ¹⁵ “Nakhe, ang tekpemi dow, CHAKRAMANG en miaiawng mih chow?” pape khai. ¹⁶ CHAKRAMANG tekpe khai, “ang Isu, enmi miaiawng mih kowi chow anowng apowng chang khai, kawmat dow awrrü hanow, en khawk kür hown iowng diah, Thurai kow chintak mih nar hai tawi tuk tawi tamih saksi powmiawng en kowi napaw kown rakowi en tut-e ang tatüng khai. Ang kowi tawng iawng chow en ang khi khai mih, mamih natüng en kown mih akeng miuüa tut-e en natek kown chekhai.” ¹⁷ En matia maru maiow hai Jentailuüa rut hownia ang mih, en kowi nalawng natang en kown chekhai. ¹⁸ Nahanow, amatni mik nathowila kown mih rakowi hai aiu hownia anowi pra kowi nadang hanow, setan alow kowi uowila mih hownia Thuria pra kowi nauang plangpawla kown rakowi ang mih amatni tut-e en kowi chinah mih chekhai, angak mih lawtra nakala kownkow hai ang luk kowi owmbüah mih rakowi Thurai lawnguan miaiawng mih kowi chow langtowah khowk, namih achimasai mamiuüa pungma dawng kowi alow naka la büah kownkow pape khai. ¹⁹ Mang Akrippa, naiawngra kowi mukuang hownia kowh mamih uang tatüng pungma dawng hownia ang kowi tawng chow tek khai, nami chündowi hown uowi dowi chekhai. ²⁰ Auown khe Damsaka marow kowikow maruuüa tut-e, nami kung kowi dow Jerusalem marow kowikow maruuüa tut-e ün, Juda pren towng kowikow maruuüa tut-e ün, Jentail uüa tut-e ün paw ang satangiung phuang khai angak hownia natarip hown Thurai pra kowi amatni uang plan kown lahawm khai hanow, alup mih lahawmma chang mih rahown amat kaah khai amatni tarip mih chekhai. ²¹ Nami rakowi chekhai, Judauüa mih Thurai chup kim kowi khüm ang hanow napaw ta ang asak kownmi tuak khai mih. ²² Nachenganchepaw Thurai tut-e hown akhowng akura angka khai rakowi ani mowr patmi, maru asowmcha hai maru iukma uüa tut-e laiklow napa tuk napa taah kown ang uowi khai tak mih, risi uüa hai Mosi rirow auan na uang ting kown pabüah mih laiklow chataih klen kowikow dow, akeng mih laiklow ang tawng paw tek dowi chekhai. ²³ Nami laiklow dow mami chekhai, Krista dow ngare nakhamla hanow, kowng mih pungma dawng hownia nauang kutplan awrrü iawk hai mih rakowi aia mat chenchap maru maiow hai Jentail uüa tut-e paw anowi parik khi kown mih naown kown pah laiklow tek büah mih, pakhai. ²⁴ Now, naiawng mih aia awngcha laiklow aia tekthüm khe Festa dow, aklow atün mahai tekpe khai, “Pawl, en thumi chekhai; en chasang hulai rakowi pethu en mih chekhai,” pape khai. ²⁵ Nakhe Pawl tekpe mih, “ringkaw lang uowimi, Festa, ang thu mih nadowi; laiklow anowm mahai laiklow anama achanlaima achima mih ang tekmih chekhai rowt chaw. ²⁶ Maün mih laiklow maiow mang dow tuk hai aia mat kowi sak kraingma iawng ang tek khai chaw hanow, mami laiklow ang tuk ngengche chaw, mami tawngpaw aia mik thowi dowi, tawngplawng mami auan akrang maiow alup matawng khe paw uangting dowi chekhai rakowi. ²⁷ Aw mang Agrippa Risiuüah laiklow en owm bow? En owm pami ang tuk chekhai pakhai. ²⁸ Nakhe Agrippa dow, Pawl tut-e tekpe khai, “nawngchowh mih khin kowi en nadep ang hanow, Krista kowi nathawp ang kown en tuak mih chekhai chaw” pape khai. ²⁹ Pual dow, tekpe mih, “nawngchow mih khin chepaw ahuma mih khin chepaw, en malowk chowh ang pami nadowi, ani kow ang laiklow tawituk tawita mih maiow uüa mih paw ang matia powmiawng tuk kownkow Thurai tut-e ang lümi chekhai, lawngha leng tarap chedow tawi krua dowi iawng” pakhai. ³⁰ Nakhe, langkri mih mang hai prenpowng mih Festa hai Belniki hai miaiawng mih chow amatni hown katsang tawichowm miuüa hailawm awrrü bowk büah khai. ³¹ Nami kungkowi amatni namih kim towklak hai chammang chowlowk kowh büah hanow, chamta tek khai, “mami maru mih nakowng kown mih ngare kakown mih hown thawngrum kowi na uowi iawngmi tawngpaw chang dowi” pakhai. ³² Agrippa dow, Festa tut-e tekpe mih, “mami maru mi sizar kowi uang tang pe tara dowi panü dow nalawt kown tai diah,” pakhai.