PAWL KOWI FESTA CHET PE TARA MI1
Nami pren kowi Festa uang towmmi sum ni kung kowi Sizar hownia Jerusalem kowi kow kowi khai.
2
Hanow Uama langkrimi uüa hai Juda lawngtanguüa dow aia tut-e Pawl lawnguan laiklow dow angak pra kowi hawt patuk pa taah khai.
3
Pawl kowi Jerusalem kowi na kow pawlah kownmi aia sanara kaneuma hawt lü büah khai. Tiama rawng kowi na hawt pawmah hanow na paw pe asak kown mi tuak büah khai.
4
Nachenganchepaw Festa dow, Pawl mih Sizar thawngrum kowi uowi; ang paw nakowi na kow kowi ngengche kown pape.
5
Naiawng rakowi nami maru dow angakmi uowi khai hanow enni pungma dawng kowi alow ka mi sarui mih ang kung pacham tawi lah, aia kow angak pacham phuang büah lah, pahai klangah khai.
6
Now amatni pungma dawng kowi raiat hownia hamüt ni klen uowi la now Sizar kowi kow kowi khai bowt; auai ni khe tara chetra nanra kowi aia chowm now Pawl kowi na uang paw la pe kown mi alow peah khai.
7
Aia uang iowng hanow Jerusalem hownia kow uang mi Judauüa dow tavirlut uang iowng now aia luikkowi adik akraingma mi laiklow ahuma tek büah khai, nachenganchepaw auan tarapche dow tawngpaw nowngia tüng büah dowi chekhai.
8
Now Pawl dow aia awngcha laiklow tek khai, Judauüa rirow lawnguan kowi ün, Thurai chupkim laiklow ün, Sizar lukkowi paw angak matawng sia paw ang chang dowi chekhai pakhai.
9
Nachenganchepaw Festa dow Judauüa tut-e ming iung nau khai rakowi Pawl tut-e, Jerusalem kowi ang kowi khe ang pur kowi maün mi nachet en e en nau bow? Padow klangah khai.
10
Pawl tarapche dow, Sizar tara chetra nanra pur kowi na chet ang tara kownmi ang iowng khai chaw, makowi na chet ang tara kownmi chekhai. Judauüa lukkowi matawng lup paw ang tawita dowi, nami dow achangma enni paw tuk chekhai.
11
Maru ngak ang na khai mi hai nakowng la kown pat mi lupngak ang chang khai hanow, nakowng kownmi paw ang üa dowi chaw; nachenganchepaw ma ün mi chawktowk ang mi atut matawng paw uowi dowi hanow amiaiawngmi paw amatni tut-e nowngia ap ang dowi tham; mami dow Sizar tut-e ang na apah kown pakhai.
12
Now Festa dow aia tara chetiua hai ki tatowngpang kung kowi dow, Sizar tut-e en apah khai; Sizar tut-e en na kow kowi kown padow klangah khai.
MANG AGRIPPA PUR KOWI PAWL AWNGCHAH LAIKLOW13
Now ni akrama kung kowi dow mang Agrippa hai Berniki iüah dow Sizar kowi uangting iüah khai, Festa kowi peah achup iüah khai.
14
Akrama nakowi dow uowi büah khai now mang Festa tut-e Pawl lawnguan dow kow tek khai, Felik mi maru lowkia kowi thawng kowi tatow la khai.;
15
Jerusalem kowi ang uowi rengtak khe uama langkrimi hai Juda lawngtanguüa dow aia laiklow lawnguan kowi tek ang büah khai, na kuakah asum kownmi lü ang büah khai.
16
Ang matia dow amatni tut-e, amia iawngmi kowi chow angak bekah hanow sing uowi mowr dow chawktowk miuüa hai hang pa cham taiua uowi lah, peah khowkmi angak lawnguan kowi awngcha laiklow tekla kownmi akhin iaka dowi bowt chekhai, nami iawng dow maru kowi na lawtah kown mih Rawm kowi kow maru rirow mi na dowi padow ang klangah khai.
17
Amatni uüa mami ra e uang ting büah now akhin kra dowi kowi auai rau tara chetra nanra kowi ang chowm hanow nami maru kowi na uang pawla kownkow alow ang peah khai.
18
Now chawktowkah büah miia uüa iowng büah khai, ang mingah miiawng aia lukkowi angak lawnguan hing tek büah dowi.
19
Amatni kawngmu ari arow ün hai Isu maru lowkia kowng khowk mi, Pawl dow, kutplan sing khai iawk chekhai pa dow tek khai, naiawng tek khai rakowi aia lukkowi paw pe tara mi na khai rowtmi uang na khai rowt chekhai.
20
Ang dow naün mi laiklow ün kowi dow atuak acha mapaw ang ka pe dowi chekhai, now aia tut-e, ma ün mi lawnguan kowi Jerusaalem kowi na chet en edow en nau na dowi bow? Padow ang lün taah khai.
21
Nachenganchepaw Pawl dow mangkri na chet pe kown mi lü khai, naiawng rakowi Sizar tut-e ang na nowngia chinah dowi rawn dow na khetah kownkow thawng kowi na towah kown alow ang peah khai.
22
Agrippa dow Festa tut-e, ang paw nami maru laiklow ta kown ang nau chekhai pakhai. Now Festa dow, tharau khe en na nowngia ta kown pakhai.
AGRIPPA PUR KOWI PAWL IOWNG MI23
Nahanow Agrippa hai Beniki dow tawnguat akraingma hai uang iüah hanow athawngia powngmi siphaiuüa hai marow kowi kow maru kriuüa hailawm tara chetra kowi uang kup khai, now Festa low hai Pawl kowi pa uang pakupah büah khai.
24
Nami khin kowi Festa dow, aw mang Agrippa hai mami ra e kow aia pungma kowi kow uowimi maru uüalow, enni bowk bowk aia kowi enni khi khowk, aia lawnguan kowi Judauüa maiow hai Jerusalem kowi kow uüa na plan kut sing dowi kownkow mami ra e atünma haw büah khai pakhai.
25
Nachenganchepaw na kowng la pat kown mi lup matawng paw aia chang mi ang khi dowi pakhai. Aiamat mi mangkri tut-e na kow ting kown mi tuak khai rakowi ang kow chinah mi chekhai.
26
Nachenganchepaw mangkri tut-e ruiah kown mi alwng auan matawng paw ang hing tuk dowi chekhai. Naiawng rakowi enni bowk bowk pur kowi hai ahmalüngma mang Agrippa en matia pur kowi ang uang lang paw la en rowt mi chekhai, lüntaah kung kowi matawng ün chünchü na ruiah kownmi ang na ka la kownkow.
27
Kla thawngmi maru, aia lukkowi chawktowkah mi angak lawnguan sarui na tuk bowk kown hau khai pami ang tuk chekhai rakowi pakhai.