¹ থুম কধা ইয়ান, ভেইলক, আমাত্ত্যাই তবনা গোজ্যো; য্যেন যে বাবত্তে গুরি গোজেনর কধা তমা ইদু যাদিমাদি ছিদি পুচ্ছ্যে, সে বাবত্ত্যেগুরি গোজেনর কধা আরো ছিদি পড়ে আ বাঈনী পাই, ² আ আমি য্যেন দারিত আ বজং মানুচনোত্তুন মুক্তো থ্যেই পারিই; কিয়া বেক্কোনোর যে বিশ্চেজ আঘে, সিয়ান নয়। ³ গোজেনে অলদে বিশ্চেজ বল্লা; তেয়োই তমারে বলবল্লা গুরিবো আ শদানত্তুন বাজেব। ⁴ আ তমা পৌইদ্যেনে নানু যীশু ইদু আমার বজমান বিশ্চেজ আঘে, আমি তমারে যিয়ানি যিয়ানি পালেবাত্য়েই কোইয়েই, সিয়ানি বেক্কানি পালর্ আ পালেবা। ⁵ নানু যীশু তমা মনানরে গোজেনর হোচপানার পধেদি আ খ্রীষ্টর ধোজ্যর পধেদি নেযোক। মুত পৌইদ্যেনে কধা ⁶ ভেইলক, আমি আমা নানু যীশু খ্রীষ্টর নাঙে তমারে এ উগুম দোঙর, তমা কন ভেই ‍যুনি আলসি অয় আ তুমি আমাত্তুর যে সিকখে পেইয়ো, সে দগে দগে ন-চলে, সালেন তা লগে ন-মিললো; ⁷ কিয়া কিদেক্ক্যেন গুরি চলা পুরিবু, সিয়ান তুমি হবর পঅ; তমা লগে এলঙে লক্ক্যে আমি আলসি ন-এলঙ; ⁸ আ মাগানা কারত্তুন খানাপিনা ন-হেই, বরঙ তমা ইদু য্যেন লেন্জর ন-ওই, সেনত্ত্যাই দিনরেত হাদত্যেয় আ দুগ কাম গোজ্যেই। ⁹ আমার যে তমাত্তুন ইয়ানি পেবার উত্তোমুত্তো নেই, সিয়ান নয়; মাত্তর তমা ইদু আমি ইয়ান দেঘেবার চিয়েই য্যেন তুমি নাঙ ইনি পারঅ, আমারে আদেই পারঅ। ¹⁰ তমা ইদু এলঙে লক্কে, তমারে এ কধাগান কদং, ‍যুনি কেয়ো কাম গুরিবার ন-চায়, সালেন তে নইয়ো হোক। ¹¹ এনেইয়ো আমি ইয়ান শুনির, তমাত্তুন কেয়ো-কেয়ো আলসি গুনি চলদন, কাম -ন-গুরিই বোইদে বোইদে হাদন। ¹² তারারে আমি নানু যীশ খ্রীষ্টর নাঙে উগুম আ উবদেচ্ দির্, তারা য্যেন দোলে কাম গুরি নিজো কামেয়্যেল্লোই খানাপিন হান। ¹³ ভেইলক, তুমি গম কাম গত্ত্যে মন ন-মাজ্যো। ¹⁴ আ কেয়ো ‍যুনি এ চিদিগানর লিককে কধাগানি ন- মানন্, সালেন তারারে চিনি রাগেইয়ো, তারা লগে ন-মিললো, ¹⁵ য্যেন তে লাজত পরে; মাত্তর তারে শত্তুর মনে ন-গুরি সদর ভেই মনেগুরি তারে চেদন দুয়ো। থুম কধা ¹⁶ সানতি দিয়্যে নানু যীশু নিজে তিবুজ্যে বেক্কানিত্ তমারে সানতি দুয়োক। নানু যীশু খ্রীষ্ট তমা লগে তোক্। ¹⁷ এ মঙলবল্লা কধা মুই পৌল নিজো আদে লিখ্যোং। চিদিবাগানে ইয়ানই চিহ্ন; মুই এবাবত্ত্যেগুরি লেঘঙ। ¹⁸ আমা নানু যীশু খ্রীষ্টর মেয়্যে তমা বেক্কোনো লগে লগে তোক্।