¹ ও ভেইলক, আমা নানু যীশু খ্রীস্ট এবঅ আ তা ইদু আমারে নেযেব এ পেীইদ্যেনে মুই তমারে হুজুলি গুরি কঙর; ² ”যীশু এবার অক্তবো লুম্বেগি” এ কধাগান কন আত্মার কধায়, বা কারকধায় বা আমা লেঘা মনে গুরিনে কন চিদির কধায় বিশ্বেজ যেনেই তুমি তমা থিদেবর মনান উলোজলো ন-গোজ্যে; ³ কেয়োই তমারে য্যেন সবাই ভোলেই ন-পারন; কিয়া সে দিন্নো এদ নয় যেদক্কন সং পল্যে পাপর পধে নেযেয়্যে মানুচসো ভচ্ নেযেয়্যে পুয়োবো ফগদাঙ ন-অয়। ⁴ তে নিজোরে গোজেন নাঙে নাঙ ফদেব আ মানজে গোজেন বিলি মাননদে বা তপনা গরন্দে সিয়ানির বেক্কানি উগোরে নিজরে দাঙর কলেব আরোও গোজেনর ধর্ম ঘরত বোইনেই নিজরে গোজেন বিলি ফগদাঙি গুরিবো। ⁵ মুই আগেদি যক্কে তমা ইদু ইলুং, সেক্কে তমারে এ কধাগানি কোইয়োং, তমার কি ইদোত আঘে? ⁶ আ তে য্যেন তা অক্তত তে ফগদাং অয়; সেনত্ত্যাই তারে কিল্লোই মানা গুরি রাগা উইয়ে, সিয়ান দ তুমি হবর পঅ। ⁷ কিয়া অধর্মর গুমোরো বল এজসং কাম গরের্; মাত্তর যিবে তারে মানা গুরি রাগেয়্যে,তে সুরি ন-যানা সং মানা গরানাত থেব। ⁸ সে জেরেদি সে পাপিত্ববো ফগদাঙ অবঅ,মাত্তর নানু যীশু খ্রীস্ট তা মুয়ো নিজেজসাননোই সে দারিত্তরে ভচ্ নেযেব আ তার এজানার তেজে পাপিত্বববোর বলান শেজ গুরি দিবো। ⁹ সে পাপিত্ববো শদানর বল নিনেই এবঅ, বেক আমক মিজে কামত আ বেক আমক চিহ্নত ¹⁰ আ যিগুনে ভচতর পধেদি যাদন তারা ভিদিরে শদানর বলান পুদি উদিবো; কিয়া তারা উদ্ধোর অবাত্ত্যাই অক হোচপানাগান ন-চিনোন। ¹¹ আ সেনত্ত্যাই গোজেনে তা রা ইদু ফাগারা কাম পাদেই দে, য্যেন তারা সে মিজেয়াানি বিশ্বেজ যান , ¹² য্যেন গোজেনে তারা বেক্কনরে বিচেরত দুজি গুরি পাারে,যিগুনে সত্যগানরে বিশ্বেজ ন-যান মাত্তর পাপ পানিলোই হুজি থেদাক। গোজেন লগে থিদেবর থানা ¹³ ও ভেইলক, মর হোচপিয়েগুন, আমি তমাত্ত্যাই তিবুজ্যে গোজেন ইদু ভালেদি জানেই: কিয়া গোজেনে পল্যেত্তুন ধুরি সুদ্ধো আত্মাল্লোই আ সত্যের বিশ্চেজে উদ্ধোরান পেবাত্ত্যাই তমারে বেঈ লোইয়্যে; ¹⁴ আ আমা গম হবরানিলোই তমারে ডাগনিয়ো দি, য্যেন তুমি আমা নানু যীশু খ্রীষ্টর মহিমানর ভাগি ওই পারঅ। ¹⁵ কাজেই, ও ভেইলক, তুমি থিদেবর থাগঅ আ আমা কধায়ানিত্তুন বা চিদিয়ানিত্তুন যেক্কানি সিকখে পেইয়ো, সিয়ানি ধুরি রাগঅ। ¹⁶ আমা নানু যীশু খ্রীষ্ট নিজে আ আমার বাপ গোজেন, যিবে আমারে কোচপিয়ে আ মেয়্যেলোই উমোরত্ত্যেই বুচ্ আ দোল আজা দি রাগেইয়্যে, ¹⁷ তে তমা মনানিরে বুচ্ দোক আ বেক্ বাবদর গম কধা আ গম কামে থিদেবর গুরি রাগোক্।