Sosiau we Hinontarai we Hisahau Hioruta Roi Wewawu ¹ . Yesus tito naria we hioru, ro sosiau pehi mesainto, ² . Mananu ro rora iwo parariape babahio we riu mananu we tei song roi we wawu – we neromawa ppau. ³ . Kong samiha ne woming pahioru hinda hisabau hinontarai wu roi wawu wawei a, mena hindama wa. ⁴ . Impamora babaihopai samiha nari newoming peha hioru naria muna me tito wehioru, “Minampaya wehioru minarainto, minandea, yau piana yong roweang peia sura neto. Pinahai tei minarang munampa, lembu mawangkong piaung we himbaba pitau peiti piana himuni himparei ma sura neto, minandama minandato roi wawuneima. ⁵ . Mena, hindoa howa me hindawaru hua, ehi riato romiwaneia, ehinaria riato mariwa nengwane, ⁶ . Kong eha wau hioruwo hintapu babaiho wawei ne woming moru. ⁷ . Impamora mananu baba wawei kihiou, impamora samirha ne pimamuna pa hioru himung hinontarai we himung babaihopai newoming pa hioru kong himpare ine bendari pai. ⁸ . Interi titowe newoming pa hioru mesainto, “roi wawu pei piana tei sara neto, mena hinontarai we ikamang we hioru pe hindawa. ⁹ . Impaina mandato raying wanea kong mampaya hinontarai we pau we manda ariu hioru ro rayang mo minampaya we hioru to roi neima. ¹⁰ . Impamora, babaihopai new woming pa hioru hirong pararia. Hinda Hinduri kui hinontarai we himbi hebiyeng ko we himarawa. Impaena manu roiwawei ria sihang. ¹¹ . Mena interi babaihowawei rima hiua wu roi wawei ma tei reho nemarandang werima wawei reho hinontarai pehi rorawane, we hisung hasung hawa ro manu roi pai. ¹² . Tito we hinontarai yampei me sainto, “Maneta toperehane kainteri ruma hirato rane mane me husung hasung roi peha wa ? kong hinontarai yampei aihirei. ¹³ . Interi babaihopai titowe newoming pa hioru me sainto, “Minangkare warangpa kong aempa, kong minasowei to weberarong we ro wondi wanea. Rorawane ingkai wioria rirora. ¹⁴ . Tutu, mandupehi tasahawi, mena ingkai wewe tariri hioru wau hioru wo himpauwa” Babaiho ro Yerusalem tei Hisane wau Yesusi ¹⁵ . Interi hinontarai we hindoa ho Yesusi wapa hioru hinda himpandu hioru imbaromi hintato wau Yesusi ro piwe himpayawau. ¹⁶ . Kong hiramiha netapa hioru wu Yesusia, hingko himontarai Herodian. Hintato me hiranto, “We wanyau pa au andehoto auwo hanemurarong pai mihi kong Guanyau Allai nerayampa ro we mahi tato. Auwo mutaiwe ehiwa tutu auwo remuho hinontaraiwa. ¹⁷ . Tei toperawau mora, tuto tatoata wehanemu toata weantoro. Renemo anambai hawaweri ne taraiwe Kaisarie ete imbae ?” ¹⁸ . Mena Yesusi rebahu hisane rarong we marawawauto impaina tito mesainto “Pinahai sonane tei minasane wau yaune, hinontarai we minanu aho Allaiwa nemintoru ? ¹⁹ . “Minaranyawa we Yau Hawaweri we Minarebai Pajaki Pai ” impamora hintuwa hawaweri dinar pehi wureia. ²⁰ . Kong, interi titowe hioru sainto, “Matei rekami we wataro hawaweri ranei?” ²¹ . Hintato we Yesusi, mehiranto “Kaisari” Interi Yesusi tito we hioru me sainto, “ Toperaumo, Mimbai wurape Kaisari pinahai kaisari nempa, Kong wewe Allai nempa Minarona wu Allaia “ ²² . Hintara tuwa Yesusi tito torawau pamora hiroha hisane hahera hioru, me interi hindawaru Yesusi. Hinontarai Saduki Wehisnewau Yesusi ²³ . Ro haraweito hinontarai Saduki pa hioru, wehintato me hirainto tongkaria mo tantawaha, hindawu Yesusi ma hirautanei. ²⁴ . Hirainto, “Wewanyaupa awene Musai tito topeno tei hinontarai mawang pehi Kiria mo ne romawa mawang pehiwa, mo mawang we kiriampai netapei witnari wawing kabong pai imbaromi sawing riwang neta we kiriampai. ²⁵ . Impaena ranemo anembe itu. We bibapai, wiwa me kirianto neromawa pehi wami me wawim pai wu netapai nariamuna. ²⁶ . Topeampe huru koiru pai, botorupai, rointaho boitupai. ²⁷ . Topeampa wawimpa hioru hingkaria tato. ²⁸ . Ro hawe hintawa wane, wawing rawawei ingkai matei ti neipa ? tutu himbu kuirei” ²⁹ . Mena Yesusi titowe hioru me sainto “ Minando reto “ Minasiwiai weraung mamarangnei kong Allai ne mambrine wato. ³⁰ . Tutu, hawe hintawa waruhi kairiang wane, mo disiwiai ho himbu hioru towane wato, tuntu himparari Manatau ro rora. ³¹ . Mena wehingkaria me hintawaha, minaratora wae ro piye Allai titoa we mintorupa. ³² . Yau wenanto Allai Abraham, Allai Ishaki, Allai Yakup ? I’wo Allai we kirianawa, I’wo Allai we wihyeng tina. ³³ . Hinontarai we himpau hinontarai torawau pamora hiroha hisane hahera hioru tutu wewe sanyawa wau. Kamang Nehanti ria Raweinapa ³⁴ . Hinontarai wehindoaho Allai wawa hioru hintaraho Yesusi sonara hinontarai sadukipa hioru Aihihi hioru, me hinda hiroha kuira. ³⁵ . Interi hioru ehi hinontarai Mananu Agama, sautang taweri naria muna me sainto, ³⁶ . Wewanyau pa awena, tato kamang nehanti tiriai raweina kamang ehaneto Kamang nehanti tiriai raweina kamang ehaneto kanang we Musai kiokong Allaipa ? ³⁷ . Kong interi Yesusi tito me sainto, “Mintoruwo minasaneho Allai ro minasanewau rarong pa, kong rom inane haseng pa, kong we misane tatuata ro minandyukerang pa. ³⁸ . Raneimo, kanan baba peina kong we retenang peina. ³⁹ . Me we koiru peino, wakeito pirari kosiri wawei riotu topeno, “Mintorowo minasaneho hinontarai parariape minasaneho minane tarai minanembaupa” ⁴⁰ . Ro tato kanang woiru rane, tato kanang ehawau wo wata ti kanang koiru rane huru kong weraung ro woming baba pa hioru. Autang we Mesiasi ⁴¹ . Interi ranemo hinontarai we hindoaho Allai wawau hiora, hingkikuira, Yesusi sautang we hioru, ⁴² . “Minasane tatuata topeno, Mateiti Kristusi ? Interi matei Ne Romawa yampei ? Hintato wei me hirainto, “Romawa Daud”. ⁴³ . Tito we hioru me sainto, “Topeampa menaneno, Daud ruainunung, Hiaweiwe, “Babaiho” me sainto, ⁴⁴ . Mamurang tito nou babaiho pau, “Muhoiro warau Sowatang, Kea-o Yong Nemu we Hanengka hiou hioru wane hindama hintuang ro oemwawa Wau ? Mazmur 110:1 ⁴⁵ . Tei Daudti hihau Kristus parariape” Babaiho” heromaneye ? ⁴⁶ . Hioru ehi ria tito waweri tatopeha mana weiwa kong, harawaweito eha himbe mambiri we hirauntan Nein aria munawa.