¹ Ratta ecittatti yohithuna ethu! Ecittatti ehopwapwaneela! ² Khayin'wale ntju naa Muluku wala khaathunale win'wa ohimeeriya waa Pwiya. Khatjinaakhuluvela aa Pwiya ni khanomwaattamenla Muluku aya. ³ Ahoolelyayaayo akharamu ankhuwa wariyari waya! Anamaphuka milatto tjaya ari amwiitji oohiyu ahin'hiya ethu wo wiira eliye owitjisuru! ⁴ Maprofeeta aya alopwana ohin'wenla ni ahintharya! Anamukutho aya anaatarawa eri yeettakattiifu ni anahanyuriha ekettelo. ⁵ Pwiya tho sariya wariyari waya. Yena khanovara yoohisariya. Okhula owitjisu, Yena navahenra esariya Awe. Yena khin'hala ovithiya wowoonia, pooti ohitjuwela ohinasariya. ⁶ Mi kihokwanyula elapo, elipihero tjaya tjiri tjokwanyuwatja. Kihokwanyulatja ephiro tjaya, wo wiira hikhale nthu noviratho. Ecittatti tjaya tjihokwanyuliya, wo wiira hikhale pinaatamu nohala okhalatho. ⁷ Mi kiniira: "Wekhueeli we Onaahala okoova. Othune ohimeeriya wiira ohikhale wun'nyeelihiyaka wapuwani waa wa yeele enupuwelaaka wuupanka". Maasi ayena yaari okutakuthya wiira ehatjule owitjisu woteene ahononaka mitekotjaya. ⁸ Phimaana, okanriihe", Pwiya phiirale tjo, "mpaka nihuku ninkelaaka Mi ovuwa kivahera osaahiti. Kontha tjimphelaaka vaa ori othukumaniha elapo yoteene, waathukumaniha mamwene ni wawiihera oviruwa Wawaka, otjatja Waka woteene, wo manan'na yaayo onkelaaya elapo yoteene opahiya ni mooro wooviruwa Wawaka. ⁹ Kinaahala waavaha mattere oreera apoovo, wiira yiihane oteene waya ntjina naa Pwiya wiira Akivarele aneemelaleene, makhata ni makhata. ¹⁰ Ohiya muro wo wEtiopia, wa yaale Ankikokhorela, aPoovo aka ovavaryaatja, anaahala owaana ofeerta okhanle Waawaka. ¹¹ Nihuku nihinkela okhala ehaaya wo miteko tjinyu tjipaka len'nyu nkithekelaka, va Wankelaaka wuukumihani wa yaale yiikukulihale ni kontha we khun'hala woonela wo manan'na oohiloka wa mwaakoni Waka weettakattiifu. ¹² Mi kinaahala wuuhiya toko poovo owiiyeviha ni othaaleliya, ni we onkothyawenla mwa ntjina na Pwiya. ¹³ Oohala owIsrael khankela ovaratho ethu yohisariya walaani wuuluma tjithu tjowoothiya, ni khanin'hala okhumenla nlimi nowootha mwaano wawe; ayena ankela olihera ni ankela orupaathi, ni khaavo nkela waatutusa". ¹⁴ Wiipe, mwaana oSiao! Okhuwele, Israel! Otteliye ni othape ni nrima wotheene, mwaana oJerusalem! ¹⁵ Pwiya hokumiha nttarusso; Yena haarihela ota awananiaa oteene! Pwiya mwene owIsrael eriyari n'nyu. Nyuuva khan'nohalo woova yoonyala! ¹⁶ Nihuku nen'ne n'naahala omwiirela Jerusalem: "Ohoove, Siao. Ohitjotjeehe matata aayo. ¹⁷ Pwiya, Muluku en'nyu, ri eriyari aa, okuru opheela owoopola. Yena naahala wuuthapela ni, nuutteeliya, namaaliha wo Nifento nawe. Yena Naahala otteliya ni weeyova ni naahala okhuwela nuutteeliya, ¹⁸ toko nihuku nosukuhuulu yoreerela. Kinaahala okumiha mahuviho aa ni akinowaanatho ehaaya. ¹⁹ Kinaahala waatafiti wa yaale oteene yaale anuuhuvihani. Okathi yoole kinaahala owoopola owuntakya ni wathukumaniha ohuvihiya. Kinaahala okumiha ehaaya tja ni kinawuuvaha nttittimiho etuniya yoteene. ²⁰ Ni, okathi yoole, Kinaaweettiherani; okathi yoole, Mi kinawuuthukumanihani nkhayi. Kinkela opanaka wo wiira elapo tjoteene tjo ntuniyani tjuuhicimye ni tjuuttittimihe, woonaka wiira athi Mi kuuvusale", Pwiya phiralyaawe.