¹ Nthukumane, ntakaneelatje, elapo yohituthuwa. ² Wahinaaya ekettelo wantja ovareliya nteko, nihuku nihinaaya ovira toko mikhutta, wahinaaya owa wariyari winyu oviruwa ni otjatja waa Pwiya, wahinaaya nihuku nootjatja aa Pwiya owa wariyari winyu. ³ Mwaarueele aaPwiya, yaale owiiyeviha onlaponi anin'wenla ekettelo tjaya! Nrueele essariya! Nrueele wiiyeviha ni pooti nkhikitjeriyaka nihuku nooviruwa naa Pwiya! ⁴ Gaza naahala othamiya, ni Asquelom nohala okhalihiya muuthakoni! Anaahala owoomola Asdode meetiiya, Anaahala wahononatja aEcrom! ⁵ Ratta mayantjoko onkurukuru epahari, elapo tjo maquereteu! Pwiya huuhimyani nyuu, Canaa, elapo yomafilisteu. Kinaahala wuukwanyulani mpaka wahinkhalaaya wariyari winyu nthu ohaala!. ⁶ Vano, nkurukuru wo pahari onkela okhala maapuro ohakheliya, ethaya yamakamputji ni matjitji opwittiwithi. ⁷ Nttethe wowattamenla epahari on'hala okhala wa yaale oohala wa enupa ya Juda, an'hakhela epwittipwithi tjaya. Apoovo aya ankela orupaati wiiripelaka, m'manupani tja Asquelom, ni Pwiya, Muluku en'nyu, naahala warattavenla ni naahala olokihera otjaaliya waya. ⁸ Kihinwa opatjapatjiya naaMoabe ni matarawo waathu oo Amom okathi waapatjalyaaya Apoovo aka ni atuphelaka wa mwin'nanoni. ⁹ Phimaana, toko Mi tjinkhalaaka", ala phimoolumo aa Pwiya anakhotto, Muluku oIsrael, "Moabe n'hala okhala toko Sodoma, no apoovo oo Amom toko Gomorra; nipuro nomalasi ohiloka loka ni ehime yootjara maakha, yookwanyuliya wo mahuku oteene! Maasi ohala aa poovo Aka anaahala owin'nyera, vano oohala onlaponi waka naahala okusa elapo ayeeyo!". ¹⁰ En'hala wiirania oo Moabe ni Amom nlaattu wowikukhuliha waya, nipuro naapatjalyaaya ni yaaruwanaka apoovo aa Pwiya anakhotto! ¹¹ Vano, ayena yamoove Pwiya, Yena nkowaatarawa waa Muluku ontuniyani. Oteene waya ankonkokhorela, mapuro oteene, mapuro oteene owattamenla epahari! ¹² Nyu meetiiope, mwinkela ottenliya niikatana Aka, ¹³ ni ntata naa Muluku nikoowana onkela ntjuwa ni waakwnyula maAssiria. Vano, Ninive nkela okhala mapuro othamiya, owum'ma tjinene toko muuthakoni. ¹⁴ Vano, enama tjinkoomumula won'wo, enama tjooteene onlaponi, okhuma enuni tjom'maatjini ni mpaka enama tjookhalana miiwa, tjinkela omumula watjulu waya. Matju aya ankela okhumela m'matjanelani, ni yeele entjarihela en'hala okhala wa nkhora waya; ni eviiga tjaya tjomiri tjoohemiya tjin'hala oheliya. ¹⁵ Phiicitatiila yootteeliya ekhanle ehoovaka ni yiirale wanrimani waya: "Athi mi, khiivotho ekina yolikana". Ehokhala yootutusa, nipuro tjinkhala enama tjowoopiha tjilyaka! Wakuta nthu novira vaavale nkela otarawa ni maturi ni ethoonyatjaka womatarawo.