¹ Ala thi nuulumo naa Pwiya niwaale wa Sofonias, mwaana aa Cuchi, mwaana aa Gedalias, mwaana aa Amarias, mwaana aa Ezequias, mahuku aa Josias, mwaana aa Amom, mwene oo Juda. ² "Kinaahala okwanyula yooteene yeele eri ntuniyani", Pwiya phiiralyaawe tjo: ³ "Kinawaakwanyula apinaatamu ni emana. Kinaahala winvakatja enuni, ehopa tjo mpahari ni tjoteene tjen'ye tjinthekiha. Kinamalamaliha pinaatamu ontiniyani muu", Pwiya phiralyaawe tjo. ⁴ Kinaahala owaatalela ntata wa Juda ni oteene yaale ankhala oJerusalem. Kinaahala waamalamaliha onipuro nen'na oteene yoole ohala aa Baal ni matjina athu yakokhorela milapa wariyari wanamukutho, ⁵ athu ayo ari watathani ni akokhorelale eruthu tjo malayikha; ni yaale anonkokhorela Pwiya ni elaphelaka wa Yena, ni hata elaphelaka wa Milcom. ⁶ Kinawaamalamaliha yaale ahiyale ontharenla Pwiya, ahinonrweela Yena wala ahinonkoha". ⁷ M'maale ohoole wa Pwiya Muluku, kontha Nihuku naya nihaattamela; Pwiya hothenkatja nkutho ni haattakattifiha yalattunlyaawe. ⁸ Ni onkela wirania, nihuku noovahiya nkutho wa Pwiya, kanaahala waattarussa mamwene ni assaana omamwene ni oteene yaale an'waara ekuwo tjookhuma elpo tjikina. ⁹ Nihuku nen'no kinaahala waattarussa oteene yaale ankokhorela milapa, ni antjariha enupa tja pwiyaaya wo nttevo ni wootha". ¹⁰ "Phinkela okhala nihuku nen'no", Pwiya phiirale, "wunla wotjukuliha on'hala oweela wa nkhora wo hopa, ottononela wo Epaairo Yophiyaaru ni onyakula tjinene woopwessakatjiya myaako. ¹¹ Nttononele, mayantjoko oo Mactes, kontha nakuciayante an'hala okhala oomalamala, ni oteene yaale amphima eprata ankela winvakatjiya. ¹² Ni onkela wiraniaa tjo, owakathi yoole, kinkela omweetteetta Jerusalem ni khanttiyero ni kinkela waattarussa alopwana owaahapala eviinyu ni yiiraka wanrimani waya: "Pwiya khampanka ethu, wala yoonyala hata yooreera". ¹³ Mihakhu tjaya tjinkela win'nyiya, ni enupa tjaya tjinkela okwanyuliya ni othamiya! An'hala oteka enupa, maasi khan'hala okhala mom'mo, anaahala waalatja eviinya, maasi khan'kela ovurya evinyu aya. ¹⁴ Nihuku nuulupale na Pwiya niri wakhiviru, niri wakhiviru wowaakuviaatja wene. Namalove onihuku naa Pwiya nin'hala okhala toko nakhotto m'motja nokhuwelaawe wotjukula. ¹⁵ Nihuku nen'no nin'hala okhala nowoopiha, notjukuliha ni nomahuviho; nihuku nonihukhumu, nihuku neewiriphi ni nooriipela, nihuku nomahutte ni ewiriphi yuulupale. ¹⁶ Nin'hala okhala nihuku nomapenka ni makhuweliyo onkhottoni tjikhotteliyaka ecittatti tjolipiheriya ni enupa tjoorekamatja. ¹⁷ Kinaahala owaana otjukula ntuniyani, vano, muinkoweetta toko athu ohoona, kontha n'honthekela Pwiya. Ephome n'nyu enkela omwaricia toko nthupi, ni marupo aya toko ekokhola. ¹⁸ Eprata aya wala ewooru ayakhatjin'hala okhuitiri owoopola nihuku nooviruwa aPwiya. Mooro wohatje wa Pwiya onaahala opaha etuniya yoteene, kontha omalamaliha onkelaawe owiiha Yena wa apinaatamu ontuniyani yuuluale.