¹ Mweeri wo nasaapa, ni wo nihuku ciriini na m'motja wo mweeri, nuulumo naa Pwiya nihowa wa profeeta Ageu, ni hiira: ² "Wan'himeerye n'hooleli oo Juda, Zorobabel, mwaana a Sealtiel, ni wa n'hooleli anamukutho Josue, mwaana aa Jozadaque; ni wa yoole hanle wa apoovo. Wiire: ³ Wa yaale ahanle wariyari winyu, tipani onaale enupeela warya waya wo khalayi? Ni vano n'noona tjani n'nava? Khinakhala eela toko yoohiithu wa menthoni winyu? ⁴ N'nava, vano, nkhale oolipa, Zorobabel! Ala phimuulumo aa Pwiya. Ni okhale oliipa, n'hooleli namukutho Josue, mwaana aa Jozadaque; ni nkhale olipa, athu oteene ontuniyani! Ala phimoolumo aa Pwiya: "Ni nvare nteko, kontha Mi kiri ninyu! Ala phimoolumo aa Pwiya anakhotto. ⁵ Wo makhuluveliho ari muwatanihani Mi apankalyaaka ni nyu okathi okhumalen'nyu wEgito, ni N'nepa aka onkhala wariyari winyu, n'hoove!. ⁶ Tjo phiniraawe Pwiya anakhotto: "Owakathi vakani ene, Mi toototho kinaahala othukumeliha erimu ni ethaya, epahari ni ethaya yo wum'ma! ⁷ Ni Mii kinaahala ottettemeliha wa khula elapo, ni wakula elapo Enaakiwaanela tjithu tjowaarya, ni kinaatjarihela enupa eela waarya!", Pwiya anakhotto phiniraawe. ⁸ Eparata ni ewooru tja Waka! Ala phi moolumo aa Pwiya aa nakhotto. ⁹ Waarya wo nua eela on'hala okhala mwintji oholo waya n'wo wovirikana tho okhuman'ne aya n'no, kinaavaha nrettele nipuro n'na! Pwiya anakhotto phiniiraawe. ¹⁰ Wa nihuku ciriini na tjace wo mweeri wo nakhentta, wo mwaakha wo nayeeli wa Dario, nuulumo naa Pwiya nihon'weela profeeta Ageu, ni hiira: ¹¹ "Apwiya anakhotto yiiraale tjo: Mwaakohe anamukutho mwaha wo Ekettelo, ni hiira: ¹² Wakhala nlopwana okussa enama yovaheriya aa Pwiya wa mphantti wo vestiidu awe ni, ni yooyo mphantti oyo okhunya ephau walaani yowoosiya, eviinyu wala makhura, wala wakuta n'nan'na wo yoolya, yeela eyolyeela enaakhala yeettakattiifu? Anamukutho ahaakhula yiiraka: "Mena". ¹³ Vano, Ageu hiira: "Akhala nthu ohiloka loka, nlattu wo nookhua, okwanya wa tjen'ya tjithu n'ya, n'naakhala onanaryaatja? Anamukutho ahakhula yiiraka: "Aayo, anaahala okhala onanaratja". ¹⁴ Phimaana, Ageu haakhula ni hiira: "Phiryaaya tjo athu aayo ni elapo eela ohoolo Waka!, phiniraawe Pwiya. Phitjitjaale tjo tjimpankiya aya tjithu nimatata aya: ayena ankivahaaya enkhala yonanara. ¹⁵ Phimaana, okhuma nihuku nen'na maka onrwa n'wo, nihinaaya otikitheriya nluku watjuwaya nluku, wa etempulo ya Pwiya, nttittimihe: ¹⁶ Wan'welesaawe nthu waamela, wo wiira akumihe ephielo ciriini yo thaka, tjaari khuumi paasi; hata wawaawe nthu wa namittittini, wo wiira arike ephimeliyo hanciini yo viinyu, tjaari ciriini paahi. ¹⁷ Kihohuvihani wa miteko tjoteene tjo m'matatani winyu ni huuci, maasi nyu khakihokoleelale' Pwiya phiniira. ¹⁸ Nttittimihe okhuma nihuku n'nava mpaka ohoolo, okhuma nihuku no ciriini na tjece wo mweeri wo nakhentta, okhuma nihuku nikhumaniyaaya etempulo ya Pwiya niheliyaaya. Nttittimihere yeela! ¹⁹ Tjihaavo epyo nlelo nkhupini? Evideera, efigueera, eremeera ni oliveera khatjimanle! Maasi, okhuma nihuku nen'na, Kinawureerihani!". ²⁰ Vano, nuulumo na Pwiya nhowa, ekwaha yo nayeeli, wa Ageu nihuku no ciriini na tjece wo mweeri ni hiira: ²¹ "On'himeerye n'hooleli o Juda, Zorobabel, ni wiire: "Kinaahala othukumeliha erimu ni ethaya. ²² Kinaahala okwanyula ehitje yo ma mwene ni kinakwanyula ekuru tjo ma mwene onlaponi! Kinaahala okuanyula ekaruage ni mayaweettiha; ekhavalo ni mayaweettiha anaahala omora, wakuta nthu nlatto wo katana ya mun'nawe'. ²³ Nihuku nen'ne, Pwiya anakhotto n'himya: kinawuukussa, Zorobabel, mwaana aa Sealtiel, toko nanteko aka, Pwiya niira. Mi kinawuuhela toko nlotto no Aneli aka, kontha ori thi we kuuthanlale, Pwiya anakhotto hiira".