¹ Mwaakha wo na yeeli wa mwene Dario, mweeri wo na siita, nihuku noopatjera wo mweeri, nuulumo naa Pwiya nihowa wa profeeta Ageu, wa n'hooleli oo Juda, Zorobabel, mwaana aa Sealtiel, ni wa n'hoole anamukutho Josue, mwaana aa Jozadaque, ni hiira: ² "Apwiya anakhotto yiirale tjo: "Athu ala aniira: Khinaakhala owakathi wo wiira niwe wala wiira niteke enupa ya Pwiya". ³ Vano nuulumo naa Pwiya nihowa wa profeeta Ageu, ni hiira: ⁴ "Waahala okhala owakathi yoola okhalaka enupa tjootekiya saana, enupeela enari yokuanyuwa tja? ⁵ Vano, Pwiya anakhotto hiira: "Nkhalihere ephiro tjinyu! ⁶ Nyuuva n'haala epyo tjintji, maasi n'hephale vakani; nyu n'naalya, khan'norupala, n'naavurya, khan'novona. N'naawara ekuwo, khan'niiliyala, ni namaliviya naaphuanya n'surukhu ahelaka epoolusu tjothaala!". ⁷ Apwiya anakhotto yiirale tjo: "Nkhalihere ephiro tjinyu! ⁸ N'wele mwaako, n'waane ethaapwa, ni nteke Enupaaka; vano enaahala okitjivela, ni Miivano kinaahala ottittimihiya!", Pwiya phiralyaawe. ⁹ "Nyuva n'naapheela tjinene, moone! n'nowaana vakaani vakaani, Mi nuvekhela vakani kihavavarissatja! Kontha essiyani?" Ala phimoolumo aa Pwiya aa anakhotto: "Kontha enupaaka eri yookwanyuwatja, nyuuva nkhala saana m'mawan'nyinyu. ¹⁰ Nlatto wo yeeyo, erimu enaathuka okame wa winyu, ni ethaya eyo enaathuka oruwerya waya. ¹¹ Kin'nowaana ohirupa epula ni m'mwaakoni, nlatto ethaka ni wo viinyu yophiyaru, wo makhura ni mwaha wo hepha wo nthayani, wa apinaatamu ni enama, ni wo miteko tjo m'matatani winyu!". ¹² Vano Zorobabel, mwaana a Jozadaque, nkhayi ni yoole ohala o poovo, ahin'wenla ntju na Pwiya, Muluku en'nyu, ni moolumo aprofeeta Ageu, kontha Pwiya, Muluku en'nyu, ahonruma. Athu ayo yahoova ohoolo wa Pwiya. ¹³ Vano Ageu, nanrumiya a Pwiya, huuluma nulumo na Pwiya wa apoovo ni hiira: "Mi kiri ni nyu!' Ala phimuulumo aa Pwiya!. ¹⁴ Vano, Pwiya honkwanya n'nepa wa n'hooleli oo Juda, Zorobabel, mwaana Sealtiel, ni n'nepa wa n'hooleli anamukutho Josue, mwaana aa Jozadaque, ni n'nepa wa yoole ahanle wa poovo, wo manan'na ayena yarwaale ovara enupa ya Pwiya aa nakhotto, Muluku en'nyu, ¹⁵ nihuku no ciriini na tjece mweeri wo siita, mwaakha wo na yeeli wa mwene Dario.