¹ Jose ahokussiya wEgito. Potifar, nanteko aa Farao aari kapitau oguarta ni ngipcio, ahonthuma ni ma ismaelita yankussale won'wo. ² Pwiya ari ni Jose ni ahokhala othawali. Jose ahantjera okhala naa pwiyaawe eegiipcio. ³ Apwiyawe aale yahomoona wiira Pwiya aari ni yena ni Pwiya anareeriha wa yeele yapakaawe. ⁴ Jose ahoreriya wa hoolo wa pwiyaawe, yavarelaawe nteko. Potifar o honhela namahoolela owapuwani vale, ahonvahatjera wo wiira arattavenle wa yeele yaarinaawe. ⁵ Okhuma mahuku wan'vahalyaawe namahoolela oowan'nyawe ni wa yeele yaarinaawe. Pwiya horeeriha ethoko ya egipcio ole nlaatu wa Jose. Mareeriho aa Pwiya yaari wa tjithu tjooteene Potifar tjaarinaawe pwan'nyawe ni m'mattaniwawe. ⁶ Potifar ahonvahatjera wa tjithu tjooteene Jose. Yena khaarina yoopheela wuuuwela ohikhanle wo yoolya yaalyaawe. Jose aari nlopwana okuru ni oreeraa. ⁷ Yakhumenlale tho, anavirale mahuku, amwaara apwiyawe yanamphela Jose. Ayena ahiira: "Okirupane". ⁸ Massi yena hokhotta howiirela: "Nkiviriyane: apwiyaaka ahikutakuthie wa yeele epakaaka wapuwani vaa. Ayena ahokivahatjera tjoteene wo wiira kiwehawehe. ⁹ Khaavotho muulupale okivikana wapuwani. Ayena khakikottihale ethu, wa hikhanle nyuuva, kontha nyuuva mwa mwaara ayena. Ekelaka opaka ethu yohilokeela ni kikossaka wa hoolo wa Muluku? ¹⁰ Ayena yeera emuulumanaka Jose khula nihuku, yena akhottaka orrupa ni okhala naa yena. ¹¹ Nihuku nimotja, yena hophiya enupa yaavaraawe nteko ni khaavo aarivo nipuro nen'ne wa yaale yavara nteko nipuro n'ne. ¹² Ayena yahonvara ekuwo tjawe ni ahiira: "Okirupane". Yena, horula ekuwotjawe hahiyera m'matatani waya, ahofonyuaa ni ahothiawela ota. ¹³ Okathi woonalyaaya wiira yena anowaahiyera ekuwo tjawe m'matatani waya ni hothiawela ota, ¹⁴ ahomwiihana nlopwana owapuwani vaavale ni ahomwiirela: "Ohoona, Potifar non'waana n'hebreuula wo wiira aniruwanatje vaa. Yena noowa wo wiira arupe nimii mi phantjeraaka okhuwela. ¹⁵ Wakin'walyaawe kikhuwelaka, paakihiyeraawe ekuwotjawe n'ya, phaathyawelaawe ota". ¹⁶ Ayena pahiyaaya ekuwo tjawe wakhiviru waya mpaka wawaalyaaya apwiyaawe wapuwani vale. ¹⁷ Phaahimeryaaya moolumo ala: "Nanteko mwin'wanalen'nyu lava waale oniveeha. ¹⁸ Okathi wakhuwenlyaaka, yena phukihiyeraka ekuwo tjawe ni phathiawelaawe ota". ¹⁹ Vano, okathi win'walyaaya apwiyaawe tjohimiya n'nye naa mwaarawe: "Nanteko en'nyuuyo phikiirihalyaawe". Potifar ahoviruwa. ²⁰ Apwiyaawe Jose yahonthukela, nipuro naakhala athukeliyaka ananthukiya aMwene. Yena hokhala nkhatteya. ²¹ Pwiya ari ni Jose ni anokupaleela yena ni ahokhala anvaha emani wa yoole assunka ananthukiya. ²² Phimaana namaakhalenla yoole ahonvahatjera Jose wo wiira Jose arattavenle ananthukiya akhuaawe. Wakhula ethu yaakhumenla, Jose phavahatjeriya yoteene eyo. ²³ Ole akhalenla khakutakuthieela ethu wa yeele yaarattavenlawe kontha Pwiya ari ni Jose. Wakhula ethu yankaawe, Pwiya ananreeriha.