¹ Okathi yoole, Juda haahiya assun'nawe ni ahokhala ni nlopwana oo Adulao, iihaniya Hira. ² Vaavale, yen homphuanya mwaana ancananeu, ni iihaniya Sua. Yena honthela ni honrupana. ³ Yena ahorupala erukulu, ahonyara mwaana ni yahonvahatja ntjina naa Er. Ahorupalatho ni hon'yara mwaana ni ⁴ honvaha ntjina na Ona. ⁵ Ahon'yaratho mwaana ni honvaha ntjina na Sela. Waari oo Quezibe yena wayarenlyaawe. ⁶ Juda ahomphuanya nthiyana ompheelela mwaamwanawe ompatjera Er, ihaniya Tamar. ⁷ Er, mwaana opatjeriya ni Juda, ari ohiphiyeratja wa menthoni waa Pwiya ni Pwiya homwinva. ⁸ Juda homwiirela Ona: "Waarupane amwaara amulupalya, waavarele onteko weelamu wo wiira onvahe mwaana mulupalya". ⁹ Ona anatjuwela wiira mwankani oyo khaahala okhala awawe. Wakhula okathi waarupanaawe amwaara amulupalyaawe, ekhentji amwarisela vathi wo wiira haarupalihe anvahaka mwaana mulupalyaawe. ¹⁰ Yapankaaweele yaari ethu yoohiloka wa menthoni wa Pwiya ni Pwiya yahomwinva. ¹¹ Vano Juda homwiirela Tamar, amwara mwanawe: "Okhale toko nankhueli waathumwana mpaka Sela, mwaamwanaka, un'nuwe". Huupuwela: "Wo wiira hikhue ntoko assulupalyaawe". Tamar ahokhuma ni ahorwa okhala wathumwaane. ¹² Onavirale owakathi, mwaana aa Sua, amwaara aa Juda, ahokhua. Juda ahokhala amaalihiyaka ni ahorwa wa yaale yarattavenla epwittipwithi tjawe oo Timnate, yena nimpathaniaawe Hira, ndulamita. ¹³ Ahohimeeriya Tamar: "Ataataa owuuthelela anrwa oo Timnate okookassa epwittipwithi tjaya". ¹⁴ Yena ahorula ekuwo tjeenankhueli, ahikhuneela ni ahittiyenla ni nleeso nawe. Yena ahokhala onkomaka wankhora wo Enaim, waattamenla eparapaara yoo Tamnate. Ahoona wiira Sela ahun'nuwa, yena ari hinavahatjeria yena toko mwaarawe. ¹⁵ Okathi Juda wamonalyaaew, oniha wiira nluvi, nlattu wo wiikhuneela ekhove awe. ¹⁶ Yena ahorwa mpaka nipuro naaryaawe ni hiira: "Okithare, sontte, kuurupane", kontha khaatjuwela wiira mwaramwanawe, yena hiira: "N'nokela okivahani wo wiira nkirupane?" ¹⁷ Yena hiira: "Kinawuwiihera epuri yo mwintjitjini waka". Yena hiira: "N'naakikhuluveliha mpaka wan'halen'nyu okiwiihera?" ¹⁸ Yena phiiraawe: "Nkhuluvelihoni onkelaaka wuuvaha?" Yena phiiraawe: Nlutto naa, nkhoyaa ni kopoaa eri m'matataniwaa". Yena ahonvaha tja, ahorupa niyena ni ahorupala erukulu ya wawe. ¹⁹ Yena ahokhuma. Horula nleeso nawe ni phuwaraka ekhuwo tjenankhueli. ²⁰ Juda phawanihaawe epuro yo ntjitjini wawe anvhenrale mpathaniaawe ndulamita oole wo wiira akhale okhuluvelyaa m'matatani wa nthiyanoole, yena khaaphuanyale. ²¹ Vano, ndulamita ole ahakoha alopuana onipuro nen'ne: "Rivayi nthiyana onkomale mparaparani yoo Enaim?" Ayena yaahaakhulatja: "Konkomale nluvi vaa". ²² Yena ahohokoleela wa Juda ni homwiirela: "Akimphuanyale. Ni alopuana onipuro nen'ne yiirale konkomale nluvi vaa". ²³ Juda hiira: "On'hiyereke ekaruman'yo wo wiira nihikhale opattatja ehaaya. Kihowaaniha epuriila, khumphuanyale". ²⁴ Wiraniaale wiira, tjinavirale myeeri miraru, ahohimeeriya Juda: "Tamar, mwara mwanaa, horaruwa ri niirukulu". Juda hiira: "Mun'waane vaa wo wiira apahiye". ²⁵ Okathi wawihiyaawe, ahahimeerya atataawe ale nulumo n'na: "KIri niirukulu ya nlopuana mwaneene ekaruman'ya". Hiiratho: "N'nantjuwela, sontte, mwaneene ekaruman'ya: nlutto n'na, nkhiyi uula ni nkopoola". ²⁶ Juda ahotjuwelela ekaruman'ye ni hiira: "Yena nassariya okivikana mii, wooniaale wiira akinvahaleto Sela toko mwaarawe, mwaamwanaka". Yena khanrupanaletho. ²⁷ Ekhumenlale tjo, onaphiyale owakathi wooyara, kontha yaari mavatta m'mirimani m'mwe. ²⁸ Yakhumenlale wiira, okathi wayaraawe, mwaana m'motjooyo hokumihera mono ota ni parteroole hokussa efiiyu osheerya phinthukaka m'moononi wawe phiiraka: "Ola phipatjenre okhuma". ²⁹ Ahonvaratho ntatanawe n'no ni n'himaa phimatjenre okhuma. Aparteera ahiira: "Ovirikanihenleni!" Yena aavahiye Perez. ³⁰ Vano, n'himaawe hokhuma, aarina nkhoi woosheerya m'moononi wawe, yena iihaniye Zera.