¹ Yahovola etala nlaponi, ovika yoopatjera, yaakhumenlale okathi wa Abraao. Phimaana Isaque aahorwa mpaka wa Abimeleque, mwene omafilisteu, oGerar. ² Pwiya ahonkhumenla ni hiira: "Ohiphiye wegito, okhale elapo Enkelaaka wuuthonyihera. ³ Okhale elapo yeela, Kinaahala okhala ni we ni kinawuureeriha; kinaahala ovaha nikhoto naa nooteene ethayeela, kinaaha opanka yeele enkhuluvelihalyaaka thumwana Abraao. ⁴ Kinaaha wintjera nikhoto naa ntoko ethontto tjo wiirimu, kinaahala waavaha elapoeela yooteene. Nikhoto naa ninaahala oreerihiya elapo tjoteene. ⁵ Kinaahala opanka yeeyo, kontha Abraao hin'wenla ntju naka ni hossunka ekettelo tjaka, moolumo aka, Ekano tjaka ni ekettelo tjaka". ⁶ Isaque ahokhala oGerar. ⁷ Okathi alopwana onipuro n'ne wankohalyaaya mwaha waa mwaarawe, yena akhulale: "Nrokoraka". Kontha anomoova ohimya wiira: "Amwarka". Yena anowithupuwelela: "Alopwana onipuro n'na yaapheela okinva wo wiira akunsse Rebeca, kontha yena ari oreera". ⁸ Isaque hokhala vaavale okathi muintji. Ni wiiraniaale wiira Abimeleque, mwene omafilisteu, ahoweha watjanelani ni ahomoona Isaque anvaravaraka Rebeca, amwaarawe. ⁹ Abimeleque ahomwiihana Isaque ni hiira: "Onoonania wiira ala amwaaraa. Vano, owaaka wiira: "Nrokoraka?" Isaque haakhula: "Kontha kanomoova winviya nlatto waawawe". ¹⁰ Abimeleque hiira: "Opankenleni eyo nihiivano? Anarupaniye amwaaraayo, keera wanaahala oniwiihera nlatto". ¹¹ Vano Abimeleque ahowiirela apoovo ale wiira: "Wa yoole nkela onkwanya nlopwana oola hata amwarawe ala, naahala winviya". ¹² Isaque ahalatja elapo yeele ni, mwaakha yooyo, ahohepha ventji tjinene, kontha Pwiya ahonreeriha. ¹³ Nlopwana ole ahothatjiri ni ahokhalana mihakhu tjintji mpaka okhala thatjiri. ¹⁴ Kontha ahaana epwittipwithi tjintji, ni ananteko entji, mpaka ophiyera okathi mafilisteu wantjera omoonela nttima. ¹⁵ Phimaana, mafilisteu yahottiyenlatja ehime tjooteene tjaathipiye nananteko okathi wa Abraao, athumwana. ¹⁶ Vano Abimeleque hiira: "Okhume muu, kontha othtjiri onivikanatho hiivano". ¹⁷ Ni Isaque ahokhuma vaavale, ahokhala ncerecere woo Gerar, nipuro okhanlyaawe. ¹⁸ Isaque ahothipatho ehime tjo maatji tjapankiye okathi wa Abraao, athumwaane, mafilisteu tjavuhenlyaaya, nakhuale Abraao. Isaque hiihana ehime n'ye matjina yaale athumwaane yaavahalyaaya. ¹⁹ Okathi ananteko aa Isaque wathipalyaya, yaahophuanya nipuro yaweelaaya maatji. ²⁰ Amakamputji oo Gerar yaahatjera waanyakulihana amakmpuji aa Isaque, yiiraka: "Matji ala awihu". Phimaana, Isaque ahovaha ehimeele ntjina naa Esaque, kontha yahonyakilihana nlattu wa yeele. ²¹ Yaahothipatja ehime ekina, wahonyakulihaniya tho nlattu wa yeele; phimaana, yaahovahiya ntjina noo Sitna. ²² Ahokhuma vaavale ni ahothipa tho ekina, khayanyakuliheraniye. Vano phaavahaave ntjina noo Reobote, ahiira: "Pwiya vano vaa n'honivaha nipuro, ninathatjiri nlaponi". ²³ Isaque ahokhuma vaavale orwa oo Berseba. ²⁴ Pwiya ahon'wela ohiyu yoole ni hiira: "Mi Kimuluku aa Abraao, athumwana. Ohoove, kontha Kiri niwee ni kinawuureeriha ni kinaahala wintjiviha nikhoto naa, nlattu wa Nanteko aka Abraao". ²⁵ Isaque ahoteka vaavale altare ni ahokhuwela ntjina naa Pwiya. Vaavale yena atteka etenda weeyo, anantekoaawe yaahothipa ehime. ²⁶ Vano Abimeleque ahokhuma oo Gerar ni Auzete, mpathaniaawe, ni Ficol, n'hooleli anakhotto, wo wiira emphuanye. ²⁷ Isaque howiirela: "Owenleni vaa, ni okitafitale manan'na oohiloka ni okoomola eriyari winyu?". ²⁸ Ni ahakhulatja: "Nihoona wiira Pwiya ri niwe. Vano ninomoonela wiira nihaana nin'wananaka, wee ni hiivano. Phimaana, onaathuna win'wananatja ni wee: ²⁹ Wee khun'hala onipanka yootakhala, toko hiivano tjihukuanyaleehu, nihootafiti saaneene ni nuuhiyaka okhuama saana. Khueeli, wee ooreerihiya ni Pwiya". ³⁰ Vano Isaque ahavahatja eyoolya, ni ayena yaaholyatja ni yaahovuryatja. ³¹ Ni yahovuwatja owitjissuru ni yaholaphelana nthu ninkhuaawe. Isaque ahaaleehatja ni ayena ahokhumatja saana. ³² Nihuku nen'ne, ananteko aa Isaque yaahowa ni yahon'himeeryatja mwaha wo hime yaathipalyaaya. Ni ahomwiirelatja: "Nihophuanya maatji". ³³ Ni hovaha ntjina ehime eele Seba, phimaana ecitatiile eniihaniyaaya Berseba mpaka mahuku olelo. ³⁴ Okathi Esau waarinaawe eyaakha arupayini, ahonthela Judite, mwaana aa Beeri, oo heteu, ni Basemate, mwaana aa Elom, oo Heteu. ³⁵ Ayena yaahowaana otjukula mwin'nepani wa Isaque ni Rebeca.