¹ Abraao aahaakussa athiyana akhwaawe; ntjinanaya yiihaniya Quetura. ² Ayena yaahon'yara Zinra, Jocsa, Meda, Midia Isbaque ni Sua. ³ Jocsa yaari athumwaane Seba ni Deda. Atthu oAssurim, Letusim ni Leumim naari nloko naDeda. ⁴ Asaana aMidia yaari Efa, Efer, Hanoque, Abida ni Elda. Ooteene yaari maloko aQuetura. ⁵ Abraao aahonvaha Isaque tjitthu tjooteene tjaarinaawe. ⁶ Wiiraawe nari nkumi, aahaavaha tjitthu asaana aassimweettyaawe ni aahaaveleeliha elapo ekwaawe, ottayi wiisaque, mwaamwanawe. ⁸ Mahuku yaakhalalyaawe Abraao phaala: Eyaakha emiya wosapiini nathanu. ⁷ Abraao aakhwale nuuluvalale, niikumi yintji, ni n'nepaawe waari naasimutjaawe akhwale khalayi. ⁹ Abraao aahosikhiya naasaanaawe Isaque i Ismael, n'nikhukuni Macpela, ematta yaEfrom, mwaana Zoar, waattamenla oManre. ¹⁰ Abraao aanoothuma nipuron'no naasaana omaheteu. Yena aassikhiye naamwaarawe Sara. ¹¹ Nakhwaleene, Nluku aahonreeriha Isaque, mwaamwanawe, ni Isaque aahokhala waattamenla oBeer-Laai-Roi. ¹² Alaphaamutji aIsmael, mwaana Abraao, yooyo Agar, nanteko aSara, an'yaralyaawe ni Abraao. ¹³ Alaphayaari matjina aasaana aIsmael, phanka tjiyariyaaya: Nebaiote, owantjeriya ni Ismael, Quedar, Abdeel, Mibsao, ¹⁴ Misma, Duma, Massa ¹⁵ Hadade, Tema, Jetur, Nafis ni Quedema. ¹⁶ Alapayaari asaana aIsmael ni matjinaaya, yaavahiye nmaparassa ni mapuro yaakhalaaya; ahooleli khuumi neeli phanka nmalokoniwaya. ¹⁷ Eyaakha tjaakhalalyaawe Ismael phin'nha: emiya wotalaathiini nasaapa. ¹⁸ Ayenatja yaakhala okhuma Havila npaka Sur, waattamenla weegito, nphantte woAssiria. Ayenatja khayaakhala ninrettele ntthu ninkhwaawe. ¹⁹ Isaque phimiteko tjaavaralyaawe, mwaana aAbraao. Abraao yaari athumwaane Isaque, ²⁰ ni yoola aarina eyaakha arupayini waathelalyaawe amwaarawe Rebeca, mwaana Betuel, arameu oPada-ara, ni mwanrokorawe Labao. ²¹ Isaque aahovekela waaPwiya mwaha waamwaarawe, kontha khayaayara ni aPwiya yaahomwiiwa mavekelwaawe; ni amwaarawe Rebeca yaahorupala. ²² Asaana yaanawaattakana nmirimaniwaya, ni yena aahiira: Enpheela okiiraneela essiyani? Ni aahorwaa waakoha aPwiya. ²³ Apwiya yaahomwiirela: Tjihaavo elapo piili nmirimaniwinhu, ni miphwinko miili tjinaahala okawanyaa nmirimaniwinhu. Nphwinko n'motja on'hala okhala woolipa ovirikana nkhwaawe, muulupale naahala onkhavihera mwankaani. ²⁴ Waphiyalyaaya owakathi wooyara, nmirimaniwaya yaari mavatta. ²⁵ Owantjeriya aayariye niikharari tjintji niirutthu yomapuruuru. Ni aahiihaniya Esau. ²⁶ Woottharenlana, aahoyariya mwaamun'nawe, navarenlale ekotjokotjo ya Esau. Ni aahovahiya ntjina naJaco. Isaque aarina eyaakha suthwiini amwaarawe owakathi waayaralyaaya. ²⁷ Asaana yaahuunuwatja, ni Esau aari namatotha onama, nmwiini, vano, Jaco aari nlopwana oomaala ni aakhala n'heemani. ²⁸ Isaque aananfenta Esau, kontha yena aanaakhuura enama tjiiva mwaamwanwe, Rebeca anfenta Jaco. ²⁹ Nihuku phin'no, Jaco aahaapyaatja, Esau wahokolyaalyaawe nmwiini, ootteetthyaatja niitala. ³⁰ Vano, Esau aahomwiirela Jaco: Okimeele eyoolyeeyo, sontte. Okivola etala. Phimaana yena aahiihaniya Edom. ³¹ Jaco aahiirea: Okitumihereke eyuulupalyaa tooko. ³² Esau aahomwaakhula: Kihanle okhwa. Wantjeriyawaka oyariya orina ntekoni? ³³ Ni Jaco aahaakulela: Oluphele tooko. Vano, Esau aaholuphela ni, weenan'na yeeyo, aahotumiha eyuulupalyaawe. ³⁴ Jaco aahonvaha ephaawu muulupalyaawe. Yena aaholya ni aahovurya, vano, aahovuwa ni aahotthara nttalaawe. Tjitjon'mo, Esau aahotanhifu eyuulupalyaawe.