¹ Kasuatan ni’itu nu reiy’pe’ e nendo wangko’ Paskah muleiy, Yesus si mete’u mouw, kaa e nedo-Na e mina’ayo mouw kaa mesesoro’ wia eng kaoatan yi’i mea waki si Ama’. Masuat tanu Nisia si reiy’ mena’ meupusela se murid-murid-Na tuana mouw en teakan Nisia si meupusela nisea i ka’ayo witu eng kesampetanna. ² Nisea se kasuatan mekaan mewali-wali, wo si Iblis si timena’ mola e rencana witu nate ni Yudas Iskariot, urang ni Simon, kaa mewewilesela Nisia. ³ Yesus si mete’u, kaa si Ama’-Na si simarakanola e reiy’ sa mina’asa wia-Nisia wo kaa Nisia si waki si Empung o meiy wo mareng wia si Empung. ⁴ Laa o tumo’orouw si Yesus wo lumengatla eng karaiy-Na. Sia medo esa nga kisi’ roko’ lenan wo ma’akesla nyi’a witu rereenan-Na, ⁵ kamurian Sia tumoa’la rano witu e nesa baki, wo muleiy moas e ne’a ne murid-murid-Na laa o misu’ nyi’a ampit e roko’ neiy i wa’akes witu rereenan-Na i ti’i. ⁶ Takar i ka’ayo mola Sia wia si Simon Petrus. Pokeiy ni Petrus wia-Nisia : “ Tuhan, Nikoo koo ma’oas e ne’aku?” ⁷ Wingkot ni Yesus wia nisia : “ Sapa em pasiwon-Ku, reiy’ kete’uannu en teakan, ta’an nikoo koo laa mangartila nyi’a kamurian.” ⁸ Pokeiy ni Petrus wia-Nisia : “ Nikoo koo reiy’ laa moas e ne’aku i ka’ayo reiy’ si niakaran.” Wingkot ni Yesus : “ Sawona’ Niaku ku reiy’ moasla nikoo, nikoo koo reiy’ maka’ato weteng wia Niaku.” ⁹ Pokeiy ni Simon Petrus wia-Nisia : “ Tuhan, te’a i te e ne’aku, ta’an kangkasi e lawas wo eng kokongku!” ¹⁰ Pokeiy ni Yesus wia nisia : “ Seiy i te si limele’ mouw, sia si reiy’ mouw mete’u moas en touna kasi ta’an i te moas e ne’ana, karengan nisia si weresi mouw e minapekasana. Nikoo kangkasi koo weresi mouw, ta’an i te reiy’ waya.” ¹¹ Karengan Nisia si mete’u, seiy si laa sumarakan Nisia. Kaa ni’itu Sia lumila’: “ Reiy’ e waya nikouw weresi.” ¹² Nu reiy’ mouw Sia minoasla e ne’a nea, Sia makela e labung-Na wo mareng sumeup witu en tampa-Na. Laa o Sia lumila’ wia nisea : “ Mangarti ku’a re’en kouw sapa en siniwo-Ku mola wia nikoo?” ¹³ 13 Nikouw kouw matotor Niaku Guru wo Tuhan, wo em pokeiymu ni’i tu en timoro, karengan memang Niaku mouw si Guru wo Tuhan. ¹⁴ 14 Jadi sawona’ Niaku moasla e ne’amu, Niaku nyi’a mouw si Tuhan wo Gurumu, takar nikouw tu’un lewo’ sa reiy’ mo’asala e ne’a miouw; ¹⁵ 15 karengan Niaku ku minee mola e nesa patoka’an wia nikouw, rio kouw kangkasi kouw sumiwola masuat tanu en siniwo-Ku mola wia nikouw. ¹⁶ Niaku lumila’me wia nikoo : Kaulitna siesa hamba si reiy’ lumantouwla eng kerakek ni tuangna, ka’apa tu’u siesa tou neiy i toke wia si timoke nisia. ¹⁷ Sawona’ kouw mete’u em baya nyi’a yi’i, takar ma’aruiyola kouw, sa kouw tumuanala nyi’a. ¹⁸ Reiy’ en tanume nikouw nu waya Niaku lumila’. Niaku ku mete’u, seiy si pineleng-Ku mouw. Ta’an lewo’ sa reiy’ mouw lekep e nats yi’i : Tou si kimaan e roti-Ku, si minangkatouw en tu’umirna wia Niaku. ¹⁹ 19 Niaku ku lumila’la nyi’a wia nikoo teakan i te kangkasi nu reiy’pe’ eng kapualitan i ti’i minamuali, rio sa eng kapualitan i ti’i mamuali, nikouw kouw ma’eman, kaa Niaku mouw Sia. ²⁰ Niaku lumila’me wia nikoo: Kaulitna seiy i te si sumungkulela sitou neiy Ku i toke, sia si simungkulola Niaku, sia si simungkul Nisia si timoke Niaku.” ²¹ Si Yesus nu limila’ mola en tuana Sia si kasa mina’arip, laa o sumairi: “Niaku lumila’me wia nikoo, kaulitna siesa tou witu e nelet miouw si laa sumarakan Niaku.” ²² Murid-murid i ti’i se metetu’usan siesa wia se walina, nisea se meware-wareng sa seiy si papokeiy-Nala. ²³ Siesa witu e nelet ne murid ni Yesus, sia i ti’i si murid neiy i koupus-Na, timebe tawi wia-Nisia, witu esa nga weka lele’os-Na. ²⁴ Wia si murid i ti’i Simon Petrus si minee tanda wo lumila’ : “ Wueiyela seiy si pemaksud-Nala!” ²⁵ Murid si rimuber en tawi ni Yesus i ti’i limenge wo lumila’ wia-Nisia : “ Tuhan, seiy ku’a re’en sia i ti’i?” ²⁶ Wingkot ni Yesus : “ Sia mouw i ti’i, e wia nisia Niaku laa meela e roti, Niaku nu simosouwola nyi’a.” Sia nu limila’ mola tuana Sia medo roti, sumosouwla nyi’a wo meela nyi’a wia si Yudas, urang ni Simon Iskariot. ²⁷ Wo si Yudas nu minedo mola e roti i ti’i, sia si sinelaran ni Iblis. Takar si Yesus limila’ wia nisia: “Sapa e laa pesesiwonnu, makarenganouw siwonola.” ²⁸ Ta’an reiy’la siesa tou tu’un witu e nelet nea se rimuber mekaan i ti’i se mangarti, sapa e maksud ni Yesus limila’la e ni’itu wia si Yudas. ²⁹ Karengan si Yudas si timiboiy eng kas wawean se mapokeiyla, kaa Yesus si mareo nisia tumeles sapa-sapa em pemandungen kaa em peraya’an i ti’i, ka’apa mewewee sapa-sapa wia se tou miskin. ³⁰ Yudas si simungkulela e roti i ti’i laa o makarengan minea. Witu en toro ni’itu nendo e wengi mouw. ³¹ Yudas nu minea mouw, lumila’ mouw si Yesus: “Teakan si Oki’ ni Tou si neiy lo’orela wo si Empung si lo’orela witu Nisia. ³² Sawona’ si Empung si lo’orela witu Nisia, Empung si laa lumo’orela Nisia kangkasi witu en tetou-Na, wo makarengan laa lumo’orela Nisia. ³³ Heiy urang-urang-Ku, e noki’ mokan kasi e nedo Niaku wia mewali-wali nikouw. Nikouw kouw laa sumero Niaku, wo en tanu neiy Ku mouw i lila’la wia se tou-tou Yahudi: Waki tampa Niaku minea, reiy’ wona’ kouw meiy, tuanakan tu’u Niaku lumila’la nyi’a teakan i te kangkasi wia nikouw. ³⁴ Niaku ku mineela em perenta weru wia nikouw, nyi’a i ti’i rio kouw me’upusala; masuat tanu Niaku mineupusola nikouw tuanakan kangkasi kouw lewo’ sa reiy’ me’upusala. ³⁵ Ampit en tuana se tou se laa mete’u, kaa nikouw mouw kouw murid-murid-Ku, nyi’a i ti’i sawona’ nikouw me’upusala.” ³⁶ Simon Petrus si limila’ wia si Yesus: “Tuhan, wisa ku’a re’en em pela’an-Nu?” Wingkot ni Yesus: “Waki tampa pela’an-Ku, nikoo koo reiy’ mamuali kumi’itla Niaku teakan, ta’an ee sangari nikoo koo laa kumi’itla Niaku.” ³⁷ Pokeiy ni Petrus wia-Nisia: “Tuhan, ka’a niaku ku reiy’ mamuali kumi’itla Nikoo teakan? Niaku ku laa meela e nyawaku wia-Nikoo!” ³⁸ Wingkot ni Yesus: “Nyawamu e laa i weemula Niaku? Kaulitna Niaku lumila’me wia nikoo: Nu reiy’pe’ se ko’oko’ kimukuk, nikoo koo simangkalouw Niaku maka telu.”