¹ Amango amalaga kuderha ebyo binwa, Yesu agenda n'abigirizwa bage olwindi lunda ye Kidroni, haliri obusani, ahanjayo, yewe n'a bigirizwa bage. ² Yuda wamuhanaga aliyinj'ahola hantu, bulala Yesu nabigirizwa bage bagendaga bashimanana aho buli mango. ³ Buzinda Yuda ery'ab'amalerha echigusho ch'enfola miherho, n'okurhuma abantu emwa bakulu b'ehano na Bafarisayo, bayinja n'emyenge, n'orhurhi, n'emifumboro. ⁴ Yesu, ameny'oku ebyali kwanene kuba oku yewe byahikire abashegerera, n'okubabwira: Nde mwalonza? ⁵ Nabo bamushuza: Yesu we Nazareti. Yesu ababwira: Nyono. Na Yuda wamuhanaga aliri nabo. ⁶ Amango Yesu ababwiraga, nyono, bagaluk'enyuma n'okuchikuba okudaho. ⁷ Ashuba babaza obwa kabiri: Nde mwalonza? Nabo bamushubiza: Yesu we Nazareti. ⁸ Yesu ababwira: Nababwirire oku nyono, na nkaba nyono, muleke abala bachigendere. ⁹ Ababwira ebi, l' emyazi yaderhwaga eyunjula, ndahezaga n'omuguma omu ba wampaga. ¹⁰ Simoni Petero waligwerh'akere akarhola ach'okurhwiri kw'omukozi w 'omudahahwa mukulu. Oyo mukozi ayirikwagwa Malukusu. ¹¹ Yesu abwira Petero: Galula akere kawe omu luba. Nka ntakwanene okunywa eyi ngumbu Darha ampaga mpu nywe? ¹² Echigusho ch'enfola miherho, murhambo na bakarani b'Abayuda bafarha Yesu n'okumushweka. ¹³ Bamuheka burhanzi emwa Anna, bulala aliri eshezala wa Kayafa. Oyo aliri Mudahwa Mukulu mw' ago mango. ¹⁴ N'oyu Kayafa aliri yolala wahaga Abayuda ehano: Kulikwenyungu omuntu muguma okufira olubaga. ¹⁵ Simoni Petero n'owundi mwigirizwa bakulikira Yesu. Oyuundi mwigiriza alimenyikene n'omudahwa mukulu, anja omu nju haguma na Yesu enju y'omudahwa mukulu. ¹⁶ Aliko Petero abera enyuma y'olunvi, owundi mwigiriza walimenyikene n'omudahwa mukulu, ahuluk' ababwira olanga olunvi, naye ahira Petero omu nju. ¹⁷ Haho, omwambalikazi, mulanzi , abwira Petero nawe orhali mwigiriza woyo muntu? Aderha ntali yewe. ¹⁸ Abakozi na bakarani baliryahola balichanire omuliro bulala emboho yaliriho, balemanga bakaluka. Petero aliri haguma nabo akaluka. ¹⁹ Omudahwa mukulu abaza Yesu okubilolere abigirizwa bage n'okunyigirizo zage. ²⁰ Yesu amushubiza: naderhaga okubwalagale omw'igulu, nayigirizize omu bishagala, n'omu kanyamuzinda aha aBayuhadi boshi bakazagi buganana, ntacho naderhere omu kubisha. ²¹ Chirhumire wambaza? Obazeb'okubi nabwirire abalemaga bayunva, lolaga obola bayinji echi naderhere. ²² Kweyo myazi, muguma omu bakarani waliryaho ashurha Yesu echigalo, aderha nkantyo kubashubiza omukulu wa badahwa? ²³ Yesu amushubiza: akaba naderhe kubi onyereke ebi naderhere kubi, n'akaba naderhere bwinja, bichi wanshurhire? ²⁴ Anna amurhuma bamushwekwer'emwa kayafa, Mudahwa Mukulu. ²⁵ Simoni Petero aliri ahol'akaluka, bamubwira: nawe kw'orhali w'omu bigirizwa bage? Ahakana, aderha: Ntali yewe. ²⁶ Muguma w'omu bakozi bw' Omudahwa Mukulu, eshe w'ola muntu Petero achag'okurhwiri aderha: Ka ntakubwene haguma naye omu busani ? ²⁷ Petero ashubihakana. Hanaho uluhazi lwabika. ²⁸ Baheka Yesu emwa Kayafa omu karubanda: lyaliri esezi, barhajaga oku karubanda, baleke okuchizingisa yi bagala okulya Pasaka. ²⁹ Pilato ahuluka aj'emunda baliri, aderha: bichi mulegere k'oyu muntu? ³⁰ Bamushubiza: Nkarhaliri muntu mubi, rhurhankakulerhereye. ³¹ Kw'ebyola Pilato aderhaga: Mumurhole mwenyine, mumuchire olubanja nk'oku erhegeko lyenyu linaderhere. Abayahudi bamubwira: Rhurhayemererwe okuyirha omuntu. ³² Okwola koshi, likuhikirira omwazi Yesu aderhaga, amango ayerekanaga lufu luchi afamwo. ³³ Pilato ashubigaluka omu karubanda, ahamagala Yesu, amubwira: k'oli Mwami w'Abayahudi? ³⁴ Yesu amushubiza: k'okola kurhengere omu woyo, erhi bandi bakubwirere enyanya zani? ³⁵ Pilato ashubiza: Ka nyono ndi Muyahudi? Bene benyu n'abakulu b'Abadahwa bakunderhere: bichi wajirire? ³⁶ Yesu ashubiza: Obwami bwani burhali bw'enogulu. Obwami bwani buchibaga bw'egulu, abakozi bani bakandwirire li ntahanwa n'Abayahudi. Aliko Obwami bwani burhali bw'eno. ³⁷ Pilato amubwira: kusiga oli Mwami? Yesu ashubiza: wakuderhere, Ndi mwami. Naburhagwa na nayinja omw'igulu li mpamiriza Okuli.Ngasi yeshi oba w'okuli ayunva omulenge gwani. ³⁸ Pilato amubwira: Okuli chiri chichi? Amala kuderha ntyo, ashubihuluka aj'emw'Abayahudi ababwira: Nta chibi chiro ne chiguma namubwenekwo. ³⁹ Aliko, Mwakomere okubona namushwekulira omuntu muguma oku lusiku lukulu lwa Pasaka, ka mulonzeze mbashwekulire Omwami w'Abayahudi? ⁴⁰ Kandi boshi bayama: Nanga arhali yewe chi Baraba. Oyo Baraba aliri munizi.