¹ Kinin kipin tigo Kutellẹ masin unan kunen, ulenge na anuzu nin kwui dinding adi piziru anan katwa kunen me. ² Na immala tijuana katwa we ko uyeme unit liyirinn me fisulai, a ta nani kunene. ³ A kuru nuzu tutung kubi ni koro itat a yene among anan katwa yissing nkasua sa katwa. ⁴ A do kiti mine a woro, 'Anan wang, can kunene, imon ilenge nan yene idi dort mma ni minu, inughe tunna inya udu katwa we. ⁵ Akuru a nuzu kubi nikoro kutocin nin nikoro kuti tutung, asa nan ghinu nane wang. ⁶ Tutun akuru anuzu kubi nikoro likure nin firum ase amon yissinn sa katwa. A woro nani, 'Iyaghari nta iyissin kikane uworu kwui dinding sa katwa' ⁷ I woroghe, 'Na umong in yira nari katwa ba.' A woro nani, 'Anun, wang, can nan nya kunene.' ⁸ Na kuleleng nda unan kunene woro nnan yenju katwa we, 'Yicila anan katwa we uni nani uduk mine, cizinu kitin nnan dak kidunghe umalzin nin nan burnun dake.' ⁹ Anan katwa we na ini yira nin nikoro likure nin firum da, ko uyeme mine sere fisule. ¹⁰ Na anan burnun cizunu katwa we nda, i cisso inung ma seru gbarandan, inung wang ko uyema sere fisuule. ¹¹ Na isese uduk mine, igbondulo kitene nnan kunene. ¹² I woro, 'Anan katwa kidughe nta fikoro firumari cas katwawe, nani umini nna nane irume nan ghirik, arike nna ti juju nidowe bite nan nya liyirin nin gbagbai nwui.' ¹³ Unnare unan kunene kpana a woro nmong mine, 'Udondong, N nta minu kulapi ba. Naa tini su nan ghinu nan nya fisule ba? ¹⁴ Seren imon ilenge na nnare di inmine inyai ulanzun mmmang nighari nni anan yiru kidunghe irume nan ghinu. ¹⁵ Na meng di nin likara nworu nsu imong ilenge na idi nin sue nin tamani nighe ba? Sa iyizi fe tifi uti lalapi bara na men di gegeme? ¹⁶ Bara nani anan kidung bada so anan cizunu, anan cizunu so anan." ¹⁷ Kubi na Yisa wa cinu ucindu Urshalima, awa yiru nono katwa me likure nin nan wabe ninghe, libau we a woro nani, ¹⁸ "Yenen ti din cinu udu Urshalima, ima nakpi usaun nnit nacara ndidya nin nan ninyerte kutin nlira. Ima sughe ushara nkul ¹⁹ ima nakpi ghe nacara na awurmi bara inan sughe liyakiti ishuru ghe, inin kotun ghe kitene kuca. Nan nya liyiri lin tatte ima fiughe." ²⁰ Una nnonnon |Zabede da kitin Yisa ligowe nin na saun ne. A tumuno nbunme aniin tiringhe imongmon. ²¹ Yisa woro ghe, "Iyaghari udi nin su we?" A woro ghe, "Yinna nono nighe nibe se uso, unit urum ncara ulime fe, a unan be ncara ugul fe, nan nya kipin tigo fe." ²² Yisa kpana a woro, "Na uyiru imon ilenge na udin tirue ba. Anung wa sa isone nan nya kakkuk kanga na meng din cinu usonue?" Inung woro ghe, "Ti wa sa ti (sono)." ²³ A woro nani, "Kakkuk nin uma sonu. Amma ubelleng nso ncara ulime sa ncara ugule ning na unanghari na ma noi ba, uunna lenge na ucif nigghari nshirya." ²⁴ Na kagisin nono katwa likure nlanza, ayi nana nani kang nin nuana ni be. ²⁵ Yisa yicila nani kitime a woro, "Iyiru ago nnawurmi din dursuani tigo, adidya mine tutung durso nani akara. ²⁶ Amma na uma yitu nani nan nya mine ba. Uma na so ulenge na adi nin su ayita udya nan nya mine uma so ghe gbas aso kucin mine. ²⁷ A ulenge na adi nin su ayita unan bun mine uma so ghe gbas a so kucin mine. ²⁸ |N|afo na asaun nnitt na dak isu ghe licin ba, nani ame su nari licin, anin kuru ani ulai me imon kusere nanit gbardang." ²⁹ Na iwa nuzu nan nyan Jericho, ligozi nanit gbardang dofinghe. ³⁰ Ise aduu aba sosin kupo libau. Na i lanza Yisa din cinu ukatu, ita ntet i woro, "Cikilari, usaun Dauda, lanza nkune kune bite." ³¹ Amma ligozie Kpada nani, i woro nnani i min tik. Nani ina kpina ughantinu tiwui mine i woro, "Cikilarri, usaun Dauda lanza nkune kune bit." ³² Yisa tunna ayisina ayicila nani a woro, "Iyaghari idin pizuru nsu minu?" ³³ I woro ghe, "Cikilari, iyizi bite pun." ³⁴ Yisa tunna, nkune kune kifo ghe nin ghinu, a dudo iyizii mine. Dedei ise uyenu kiti i dofin ghe.