¹ Na ida kubi na yisa mmala tigbulange, a sunna Ugalili, ada nan nya ligan Yahudiya ukafinu kurawa urdu. ² Ligozi gbardang dofinghe, a shizino nin ghinu kikane. ³ Afarisiyawa da kitime, idumunzun ghe, nbellinghe, "Uduka nyinna nworo unit ko uwani me nan nya nimon ille na uwane tawa?" ⁴ Yisa kauwa a woro, "Na anun wa yene ubellu ninyyerte ba, nworu ame ulle na awa ke nani nin gankilime nin uwani? ⁵ Akuru a woro, 'Bara nanere unit ba cinnu ucif me nin nna me a munu nin nwani me, anwabe ba da so finawa firuma? ⁶ Nin ndu mbun na awabari ba, finawa firuum bara nani, imon ule na Kutellẹ munu, na umon wa kosu ba." ⁷ Inugh woroghe, "Ani iyari ntta Musa wa bellin nari tiniza awani bite inyerte nworu ilugma bite nmala anin ko ghe?" ⁸ A belle nani, "Bara ngbas niibinai minere Musa wa sun muunu iko awani mine, nin nburne na nanere wandi ba. ⁹ Meng bellin munu, vat ulle na ko uwani me andi na kulapi nzina ba amini ndi yira uumon, asu kulapin nzina, unit ule na adi yira uwani ule na ina ko ghe asu uzina." ¹⁰ Nono kadura belle Yisa ku, "Andi nanere ubellen ngankilime nin nwani, na ucaun isu ilugma ba." ¹¹ Yisa woro nani, "Na koghari ba yinnu ninle uduursuze ba, se allenge cas na ina yinin nani iseru unin. ¹² Bara amon duku iwa machu nani sa tinanilime mine. Amon tutun annitari wa gbaru nani. Amon asa inughere ta atimine ku bara kipin tigo Kutellẹ. Ame ulle na adini su seru ulle udursuze, na a seru unin." ¹³ Iwa da nin nono nibebene kitime anan tarda nani acara me na ti mine ati nlira, nono katwa me kpada nani. ¹⁴ Yisa woro, "Sunan nono nibebene, na iwa wantin nani udak kiti nighe ba, kipin tigo Kutellẹ di kin nimuwsu minere." ¹⁵ A tarda nani acara me, a tunna anya kitene. ¹⁶ Umon unit da kitin Yisa a woro, "Unan dursuzu kiti, iyapin imon iciniari mma su nnan se ulai un sali ligangha?" ¹⁷ Yisa woroghe, "In yaghari nta uminin ntirini ubelen nimon igegeme? Unit urumari cas di gegeme, nan nya nani andi udi nin su use ulai nsali ligang, dorto uuduke." ¹⁸ Unite woroghe, "Uyeme uduka?" Yisa woro, "Yenje nwa mollu unit yenje uwa nozo nin na wani, namon yenje uwa su likiri, yenje uwa su kinu, ¹⁹ gyantina ucif fe nin nafi ne unin ti usu nnan kupo fe nafo litife." ²⁰ Kwanyane woroghe, "Ilenge imone vat nna su. Iyaghari kuru iduyi?" ²¹ Yisa woroghe, "Andi udi nin su use ukulu, can, lewe imon ilenge na udimun, uni nikimon, uma se imon nacara kitene. Kani unin dak, udofi ni." ²² Na kwanyane nlanza imon ilenge na Yisa nbelle, anya nin tinana nayi, bara awa di nin nimon nacara gbardang. ²³ Yisa woro nnono katwa me, "Mbellin minu kidegene, udin konu unan nimon nacara ghana kitene kani. ²⁴ Nkuru nbellin minu, nworu uman nimon nacara piru kipin tigo Kutellẹ, ukatin nin shew kurakomi piru ligalon nalira." ²⁵ Na nono katwa me nlanza nani, umamaki kifo nani kang i woro, "Ani ghari wasa ase utucue?" ²⁶ Yisa yene nani aworo, "Kiti na nanit udin konu, kiti Kutellẹ vat nimon in suari." ²⁷ Biturus ttunna akpana a woroghe, "Yene, tina sun imon vat ti dofin fi. Ani iyaghari arik ba se?" ²⁸ Yisa woro nani, "Mbbellin minu kidegene, anughe na ina dofini, nan nmaru upese na gono Kutellẹ ma so kutet tigo me, anung wang ma so na tet likure nin na ba, isu ushara nnonon Israila likure nin naba. ²⁹ Vat nlenge na a suna nilari, nuana nilime, nuana nishono, ucif, una, nono sa kumen bara lisanin, ama seru mmari akalt likure a ulai un sa ligang. ³⁰ Nan nya nnani gbardang na idi anan cizunu nene mada so anan kidung, a gbardang na idi anan kidung maso anan bun.