¹ Jesu watsi kube acedze kufundzisa, watsi kubafundzi bakhe. ² Njengoba nati kutsi sekusele emalanga lamabili kutsi kube nguMkhosi weliPhasika, iNdvodzana yeMuntfu itawunikelwa kuze ibetselwe esiphambanweni.'' ³ Baphristi labakhulu netibondza temaJuda babutsana esigodlweni sakaKhayafase, umPhristi Lomkhulu, ⁴ bakha lisu lekubamba Jesu ngebucili bambulale. ⁵ Kepha batsi, ''kufanele singakwenti ngesikhatsi semkhosi ngoba bantfu bangahle bente siphitsiphitsi'' ⁶ Watsi Jesu aseseBhetani endlini yaSimoni labenebulephelo, ⁷ kwefika umfati kuye aphetse sigujana lesasakhiwe ngelitje lembiza, sigcwele emafutsa langemakha ladule kakhulu, wawatsela enhloko yaJesu, asadla. ⁸ Kepha bafundzi nabakubona loku batfukutsela batsi, ''kumoselwani? ⁹ Ngobe lamakha ngabe atsengisiwe ngemali lenkhulu, kwanikwa labamphofu'' ¹⁰ Kepha Jesu akwati loko, watsi kubo, '' Nimhluphelani lomfati? Ngobe wente umsebenti lomuhle kimi. ¹¹ Ngobe labamphofu nihlala nabo onkhe emalanga, kepha mine anihlali nami onkhe emalanga. ¹² Ngekutsela lamakha kimi ungilungisele lithuna. ¹³ Ngicinisile, ngitsi kini, lapho khona kuyawushunyayelwa liVangeli emhlabeni wonkhe kuyawukhuluywa ngalesento sakhe kube sikhumbuto ngaye. ¹⁴ Kwesuka lomunye webafundzi laba-12 longu Judasi Skariyothe, uya kubaphristi labakhulu ¹⁵ , wefike watsi, '' Nitanginikani nanginganikela loJesu?'' base bamnika tinhlavu telisiva letingema-30. ¹⁶ Kusukela ngalelo langa Judasi wacala kufuna litfuba lekunikela Jesu kubo. ¹⁷ Ngelilanga lekucala leMkhosi Wesinkhwa Lesingenambiliso bafundzi beta kuJesu batsi; ''Ungatsandza sikulungiselele kuphi Sidlo seliPhasika?'' ¹⁸ Watsi kubo,'' Hambani niye kumuntfu lotsite edolobheni, nifike nimtjele nitsi, Umfundzisi utsi, '' Sikhatsi sami sesifikile, mine nebafundzi bami siyeta sitawudlela liPhasika endlini yakho'' ¹⁹ Bafundzi-ke benta njengobe Jesu abebatjelile, befike balungisa sidlo seliPhasika. ²⁰ Kusihlwa Jesu nebafundzi bakhe labali-12 bahlala badla. ²¹ Batsi basadla Jesu watsi kubo,'' Ngicinisile ngitsi kini lomunye wenu utangitsengisa'' ²² Bafundzi badzabuka kakhulu bacala babutana bodvwa, kutsi kutoba ngubani?'' ²³ Jesu waphendvula watsi; '' Lowo lofaka sandla kanye nami esitjeni sinye nguye lotangitsengisa. Indvodzana yeMuntfu itawufa kambe, njengobe kubhaliwe ngayo, kepha maye kulowo muntfu, ²⁴ iNdvodzana yemuntfu letawutsengiswa nguye! bekuyawuba ncono kulowo muntfu kube fane akatalwanga!'' ²⁵ Judas wabuta '' kungabe ngimi yin Mfundzisi?'' Jesu wamphendvula watsi,''yebo usho kahle'' ²⁶ Batsi basandla, Jesu watsatsa sinkhwa, wasibusisa, wasihlephula wasinika bafundzi, watsi '' Tsatsani nidle, loku ngumtimba wami'' ²⁷ Wase utsatsa indzebe uyabonga wabanika watsi, '' Natsani kuyo nonkhe ²⁸ ngobe loku kuyingati yami yesivumelwano, lecitselwe labanyenti kube kutsetselelwa kwetono. ²⁹ kepha ngitsi kini. kusukela lamuhla angisayiwunatsa kulesitselo semvini, kuyawundzimate kufike lelo langa lengiyakusinatsa ngalo nani sesisisha embusweni waBabe,'' ³⁰ Batsi sebacedze kuhlabela liculo lekubonga, baphuma baya eNtsabeni Yemincumo. ³¹ Jesu watsi kubo; ''Nonkhe nitangihlamuka kulobusuku, ngobe umBhalo utsi, ''Ngitawushaya ngibulale umelusi umhlambi wetimvu uhlakateke. ³² Kepha emvakwekuvuka kwami ekufeni ngiyawuhamba kucala kunani kuya eGalile.'' ³³ Phetro watsi kuye; '' Noma bangakushiya bonkhe, kepha mine ngeke ngikushiye!'' ³⁴ Jesu watsi kuye,'' Ngicinisile ngitsi kuwe; Kulobusuku balamuhla lichudze litsawutsi likhala, utabe sewungiphike katsatfu'' ³⁵ Phetro waphendvula watsi; '' noma ngingaze ngife nawe, ngingeke ngikuphike!'' Nalaba labanye bafundzi basho njalo. ³⁶ Jesu wahamba nebafundzi bakhe, waze wefika eGetsemane, watsi kubo,'' salani la, mine ngisaya kuyawuthandaza lapha'' ³⁷ Watsatsa Phetro nemadvodzana lamabili aZebedi wacala kufikelwa ngumunyu nelusizi, ³⁸ watsi kubo; '' Umphemfumulo wami ulusizi kuze kube ngusekufeni. Salani la nilindze kanye nami.'' ³⁹ Yena wachubeka libangana wawa phansi nebuso, athandaza atsi; '' Babe nakungenteka, yendlulisa kimi lendzebe yelusizi. kepha hhayi ngekufisa kwami, kodvwa kuye ngentsandvo yakho'' ⁴⁰ Wabuyela kubafundzi bakhe wabakhandza balele, watsi kuPhetro ''Beningeke yini yini nilindze kanye nami li-awa libe linye nje? ⁴¹ Lindzani nithandaze kuze ningetikungena ekulingweni! Umoya uyavuma kodvwa inyama ibutsakatsaka.'' ⁴² Waphindze wahamba futsi kwesibili wathandaza atsi; '' Babe nangabe lendzebe ingeke yendlule kimi ngingakayinatsi akwenteke intsandvo yakho!'' ⁴³ Waphindze futsi wabuya wabakhandza balele, ngobe emehlo abo abesindvwa butfongo. ⁴⁴ Waphindze wabashiya futsi wahamba wayawuthandaza kwesitsatfu asho wona lawo mavi. ⁴⁵ Jesu wefika kubafundzi bakhe watsi; ''Nisalele namanje, niyaphumula? Bukani-ke sikhatsi sesisondzele, iNdvodzana yemuntfu seyinikelwe etandleni tetoni. ⁴⁶ Sukumani sambe! Bukani, lona longitsengisako sewusondzele'' ⁴⁷ Watsi asakhuluma loko, kwefika Judas labengulomunye walababeli-12, anesicuku lesikhulu sebantfu, sihlome ngenkemba netindvuku kanye netibondza temaJuda. ⁴⁸ Lona labemtsengisa abevumelene nabo watsi ''Lendvodza lengitawuyanga, ngiyo-ke lena leniyifunako. Nibobamba yona!'' ⁴⁹ Wefika ku Jesu masinyane watsi; ''E, Mfundzisi '' Wamanga. ⁵⁰ Jesu watsi kuye '' Mngami, yena loko lokute la'' base bayamdvumele bambamba. ⁵¹ Lomunye walaba bebahamba naJesu wakhipha inkemba yakhe, wahhumbula indlebe yesigcili semPristi Lomkhulu, yalahleka phansi. ⁵² Jesu watsi kuye '' Buyisela inkemba yakho emgodleni wayo, ngobe bonkhe labaphatsa inkemba bayawufa ngenkemba. ⁵³ Ucabanga kutsi bengingete ngacela yini mine kuBabe angehlisele tinkhulungwane letingetulu kweli-12 tetingilosi?'' ⁵⁴ Pho ke ingagcwaliseka kanjani imibhalo letsi kumele kube njalo?'' ⁵⁵ Ngaleso sikhatsi Jesu watsi eticukwini; ''Bekudzingeke ngani kutsi nite netinkemba kanye netindvuku kutengibopha shangatsi ngisigebengu? Bengihleti nani onkhe emalanga ngifundzisa, kodwa anizange seningibophe. ⁵⁶ Kodvwa konkhe loku kwenteke kutsi kugcwaliseke loko lokwabhalwa baprofethi emibhalweni '' bafundzi bakhe bamshiya khona lapho babaleka. ⁵⁷ Ngako labo lababebophe Jesu bamyisa kuKhayafase, umPristi Lomkhulu, lapho kwakuhlangene khona bafundzi bemtsetfo netibondza. ⁵⁸ Kepha Phetro bekamlandzela khashane, waze wangena esibuyeni sendlu yemPristi Lomkhulu. Wefike wahlala inebalindzi, afuna kubona kutsi sigcino kutawuba yini. ⁵⁹ Bapristi labakhulu neLiqoqo lonkhe baphenyisisa Jesu bafuna bufakazi lobungemanga, khona batewumlahla ngelicala lekufa. ⁶⁰ Kodwa abazange babutfole ngisho nabunye, kwala nome bofakazi labanyenti bemacebo sebetama kubuveta. Ekugcineni kweta ngembili emadvodza lamabili, ⁶¹ afike atsi; ''Lendvodza yatsi; Mine ngingalibhidlita lelithempeli laNkulunkulu ngibuye ngilakhe ngemalanga lamatsatfu''' ⁶² UmPhristi Lomkhulu wasukuma watsi kuJesu; '' Akukho yini longatiphendvuulela ngako kuloku labakubeke licala ngako?'' ⁶³ kodwa Jesu wabindza. Waphindze wakhuluma umPristi Lomkhulu watsi kuye; ''Egameni laNkulunkulu sengiyakufungisa-ke manje kutsi sitjele nawunguKristu, indvodzana yaNkulunkulu. ⁶⁴ Jesu waphendvula; ''Usho kona. Noko ngitsi kini; 'kusukela manje seniyakuyibona iNdvodzana yemuntfu ihleti ngesekudla saLonemandla ita ngemafu asezulwini.'' ⁶⁵ Nasasho loku, umPristi Lomkhulu wadzabula tingubo takhe;''Vele sewuhlambalatile asisabudzingi lobunye bufakazi seniyivile inkhulumo yakhe lehlambalatako! ⁶⁶ Nine nitsini-ke? Baphendvula batsi;''kufanele afe'' ⁶⁷ Base bamkhafulela ngematse ebusweni, bamhlukumeta kamatima bammukula ⁶⁸ batsi ''Phrofetha Kristu, usitjele kutsi ngubani lokushayile. ⁶⁹ Phetro bekahleti ngephandle esibuyeni. Kweta intfombatana leyayisisebenti yafika yatsi; ''Nawe bewunaye lomGalile longuJesu'' ⁷⁰ kodvwa wakuphika embikwabo bonkhe watsi; ''Angikwati loku lokhuluma ngako.'' ⁷¹ Watsi nakaya emphundvwini, lenye intfombatane yambona, yatsi, ''lendvodza ngiyo labeyina Jesu wase Nazaretha'' ⁷² Waphindze wamphika afunga, atsi,'' angimati lomuntfu. ⁷³ Emvakwesikhashana lamadvodza labeme ecelene kwa Phetro, ''wena ungulomunye wabo nekukhuluma kwakho kuyatisho nje.'' ⁷⁴ Phetro wacala kuticalekisa nekufunga kutsi,'' angimati lomuntfu.'' asasho njalo lakhala lichudze. ⁷⁵ Phetro wakhumbula emavi lashiwo nguJesu, nakatsi, '' Lingakakhali lichundze utongphika katsatfu, wase uphumela ngephandle wakhala kabuhlungu.