¹ Jesu abephuma ethemphelini abesahamba. Bafundzi bakhe beta kuye batemkhombisa takhiyo telithempeli. ² Kepha waphendvula watsi, ''Angitsi niyakubona konkhe loku? Ngicinisile nginitjela ngitsi, kute ngisho nalinye litje leliyawusala lihleti etikwalelinye lingakahhihlitelwa phasi.'' ³ Watsi Jesu asehleti eNtsabeni Yemincumo, bafundzi bete kuye ngasense, batsi: '''Sitjele, kutsi letintfo tiyakwenteka nini? Kuyawuba yini timphawu tekubuya kwakho nesekuphela kwetikhatsi?'' ⁴ Jesu waphendvula watsi kubo, ''Caphelani kutsi kubete umuntfu lonedukisako. ⁵ Ngobe bantfu labanyenti bayawuta ngelibito lami, befike batsi, ' NginguKhristu,' bedukise labanyenti. ⁶ Niyawuva ngetimphi nangemahemuhemu etimphi. Caphelani ningetfuki, ngobe letintfo timele tenteke; kepha sigcino stabe singekefiki. i. ⁷ Ngobe sive siyawuvukela lesinye sive, nembuso uyawuvukela lomunye umbuso. Kuyakuba nendlala nekutamatama kwemhlaba tindzawo ngetindzawo. ⁸ Konkhe loku kukucala kwemihelo. ⁹ Lapho-ke bayawuninikela etinhluphekweni banibulale. Niyawutondvwa tive tonkhe ngenca yelibito lami. ¹⁰ Ngakoke labanyenti bayawukhubeka, batsengisane bodvwana batondzane. ¹¹ Kuyawuvela baprofethi bemanga labanyenti bedukise bantfu labanyenti. ¹² Njengobo kungabi namtsetfo kutakwandza, lutsandvo lwalabaningi lutawubandza. ¹³ Kodvwa lowo loyawubambelela kuze kube ngusekupheleni uyawusindziswa. ¹⁴ LeliVangeli lembuso litawushunyayelwa emhlabeni wonkhe kuze kube bufakazi etiveni tonkhe. Bese-ke kuyefika kuphela. ¹⁵ ''Ngako-ke nanibona sinengisoncitsakalo, lakhuluma ngaso umphrofethi Danyela, sime endzaweni lengcwelel'' (lofundzako akacondze), ¹⁶ ''Labo labaseJudiya ababalekele etintsabeni, ¹⁷ loyo losetikwendlu angabe asehla kuyawutsatsa lutfo lolusendlini yakhe, ¹⁸ nalowo losensimini angabuyeli endlini kuyawutsatsa lijazi lakhe. ¹⁹ Kepha maye kulabayuwube banebantfwana nakulabayawube bamunyisa tinswane ngalawo malanga! ²⁰ Thandazani kutsi kubaleka kwenu kungabi kusebusika nome ngeliSabatha. ²¹ Ngobe lapho kuyawuba khona kuhlupheka lokukhulu, lokungazange sekube khona kusukela ekucaleni kwemhlaba kute kube ngunyalo, cha, futsi akuseyiwuba khona. ²² Kube lawo malanga akafinyetwanga kute inyama lebe itawu sindziswa. Kepha ngenca yalabakhetsiwe lamalanga ayawufinyetwa. ²³ Ngako ke uma kukhona lotsi kini, 'Bukani, nangu Kristu!' nome, 'Nanguya Khristu!' ningakukholwa! ²⁴ Ngobe bokhristumbumbulu, nebaphrofethi bemanga batawufika bakhombise tibonakaliso letinkhulu netimangaliso, kuze kudukiswe, nakunekwenteka, nalabakhetsiwe. ²⁵ Bukani-ke, senginitjele ngaphambi kwesikhatsi. ²⁶ Ngako ke, nabatsi kini,' Bukani, usehlane, ' ningaphumi niye enhlane. Noma, 'Bukani, usemakamelweni, 'ningakukholwa loko. ²⁷ Ngobe Njengembane umanyata kusuka emphumalanga kuya enshonalanga, kuyawubanjalo kufika kweNdvodzana yemuntfu. ²⁸ Noma kuphi lakufe khona silwane, ngulapho emangce atawuhlangana khona. ²⁹ Kodvwa masinyane nje emvakwetinhlupheko talawo malanga, ''lilanga liyawubamnyama, Inyanga ingete yakhanyisa, tinkhanyeti titakuwa tisuka esibhakabhakeni, nemandla emazulu atawutanyatanyiswa. ³⁰ Ngako sibonakaliso seNdvodzana yeMuntfu sitawubonakala esibhakabhakeni, Tonkhe tive temhlaba tiyawukhala. Tiyawubona iNdvodzana yeMuntfu ita ngemafu ivela esibhakabhakeni ngemandla nangenkhatimulo lenkhulu. ³¹ Iyawutfumela tingilosi tayo ngemsindvo lomkhulu welicilongo, tiyawubutsanisa ndzawonye labakhetsiwe bayo emimoyeni yomine, kusukela emkhawulweni lomunye welizulu kuya kulomnye. ³² "Fundzani sifundvo esihlahleni semkhiwa. Kusuka nje lapho ligala laso litsamba nemacembe aso ahluma, niyati kutsi lihlobo selidvutane. ³³ Kanjalo futsi, nanitibona tonkhe letintfo, kufuna nati kutsi sewusondzele, kulo mbamba lisango. ³⁴ Ngicinisile ngitsi kini, Lesitukulwane ngeke sendlule kuze kube konkhe loku sekwentekile. ³⁵ Lizulu nemhlaba kutakwendlula kodvwa emavi ami ona ngeke endlule. ³⁶ Kepha macondzana nalelolanga nelihora kute lowatiko, ngisho netingelosi telizulu, naNdvodzana, kepha nguBabe kuphela. ³⁷ Njengoba abenjalo emalanga aNowa, kuyawubanjalo nekufika kwendvodzana yemuntfu. ³⁸ Njengemalanga lebengembili kwazamcolo, bantfu bebadla banatsa, bashada bendzisa kwate kwaba lilanga lapho Nowa angena emkhunjini, ³⁹ Abatange bati kwaze kwaba lilanga lakhona zamcolo afika wabatsatsa bonkhe-ngakake kuyawubanjalo nekufika nendvodzana yemuntfu. ⁴⁰ Ngako emadvodza lamabili ayobe asensimini- yinye iyawutsatfwa, lenye itawushiywa. ⁴¹ Bafati lababili bayawube basila- munye uyawutsatfwa, lomnye ashiywe. ⁴² Ngako hlalani nilidzile, ngobe anilwati lisuku inkhosi yenu leyawufika ngalo. ⁴³ Kepha yatini loku, kwekutsi kube umnikati wendlu bekati kutsi sikhatsi sini sebusuku lisela lelitawuka ngaso, abeyogadza, abengayuvuma kutsi igcekezwe lendlu yakhe. ⁴⁴ Ngako ke nani nimele nihlale nilungele, ngobe indvodzana yemuntfu iyawufika ngelihora leningakalibheki '' ⁴⁵ Pho ngubani losisebenti lesitsembekile nalesihlakaniphile inkhosi yaso lesimise phetu kwendlu yayo kute ibanike kudla ngesikhatsi lesifanele? ⁴⁶ Sibusisiwe leso sisebenti inkhosi yaso leyosikhandza senta loko nayifika. ⁴⁷ Ngicinisile ngitsi lenkhosi iyawusimisa ngetulu kwako konkhe lenako. ⁴⁸ Kepha nangabe sisebenti lesibi sitsi enhlitiyweni yaso, ' Inkhosi yami isabambekile; ⁴⁹ bese icala kushaya letisebenti lekanye nato, bese iyadla iyanatsa netidzakwa, ⁵⁰ ngaloko inkhosi yaleso sisebenti iyafika ngelilanga lesisebenti lesingakayibheki nangelihora lesingalati. ⁵¹ Inkhosi yaso iyawusijuba ticucu bese imbeka endzaweni kanye nebatentisi, lapho kuyawuba nekukhala kanye nekugedletela kwematinyo