¹ Ngalelo langa Jesu waphuma endlini wayewuhlala edvute kwelwandle. ² Sicuku lesikhulu sebantfu sasondzela kuye samtungeletela, ngako-ke wase uyesuka kuso wangena esikebheni, lesicumbi sebantfu sona, sahlala elusentseni. ³ Jesu wase ubatjela tintfo letinyenti asebentisa imifanekiso, watsi kubo, "Bukani-ke, ngalelinye lilanga umlimi waya kuyohlanyela inhlanyelo. ⁴ Asahlanyela lenye inhlanyelo yawela ekhatsi endleleni, tinyoni tafika, tayidla yonke. ⁵ Lenye yawela emhlabatsini losemadvwaleni, lapho khona bekute umhlabatsi lomnyenti. Masinyane, yamila ngoba yayite umhlabatsi lowenele. ⁶ Kepha lilanga latsi ngekuphuma, lavele lashisa titfombo ngenca yekutsi betite timphandze letijulile, tabuna. ⁷ Lenye ihlanyelo yawela emanyeveni. Emanyeva akhula aminyetela titfombo. ⁸ Lenye inhlanyelo yawela emhlabatsini lovundzile yatsela titselo, lenye likhulu, lenye emashumi lasitfupha, lenye emashumi lamatsatfu. ⁹ Loyo lonetindlebe akeve. ¹⁰ Kwase kufika bafundzi baJesu batsi kuye ''ukhulumelani kuleticumbi tebantfu ngemifanekiso'' ¹¹ Jesu wabaphendvula watsi, Nine ninikiwe lwati lwetimfihlakalo tembuso welizulu, kodvwabona abakanikwa. ¹² Ngobe loko lonako uyawunikwa kube kunyenti, naloyo lote uyakwemukwa loko lokuncane lanako. ¹³ Kungako nje ngikhuluma kubo ngemifanekiso Noma babuka ababoni noma beva abevevisisi. ¹⁴ Kubo kugcwaliseka siprofetho sa-Isaya lesitsi 'ngekuva niyawukuva kodvwa ngeke nicondze kubona niyakubona kodvwa ngeke nabona. ¹⁵ Ngoba inhlitiyo yalesive seyaba lukhuni, netindlebe tabo tiva kamatima nemehlo abo sebawavalile; funa mhlawumbe ngemehlo abo babone nangetindlebe tabo beve nangetinhlitiyo tabo bacondze, baphendvuke, ngobe ngulapho-ke lapho ngiyawubaphilisa khona. ¹⁶ Kodvwa nine-ke nibusisiwe ngoba emehlo enu ayabona; netindlebe tenu tiyeva. ¹⁷ Ngicinisile ngitsi kini; Banyenti baprofethi nebantfu labafisa kubona loku lenikubonako kodvwa abazange bakubone. Futsi bafisa kuva loku lenikuvako kodvwa abazange bakuve. ¹⁸ Lalelani-ke kutsi umfanekiso ngemhlanyeli usho kutsini. ¹⁹ Bantfu batsi beva livi lembuso waNkulunkulu kodvwa bangete balicondza, bafikelwe sitsa, sibemuke loko lokuhlanyelwe etinhlitiyweni tabo loko-ke, kusho inhlanyelo leyayihlanyelwe endleleni. ²⁰ Kuhlanyelwa kwenhlanyelo lesemhlabatsini losemadvwaleni; kusho labo labalivako livi lembuso balimukelemasinyane ngekujabula. ²¹ Kepha babete timphandze letijulile etinhlitiyweni tabo bahlala sikhashana nje. Kutsi kuangavela tinhlupheko nobe kuhlupheka ngenca yelivi bahlubuke masinyane. ²² Kuhlanyelwa kwenhlayelo; kusho kulabalivako livi lembuso, kodvwa tinhlupheko macondzana nemphilo yebunjinga kuyaye kuliminyetele livi lingase lisatsela titselo. ²³ Lena leyayihlanyelwe emlabatsini luvundzile ifanekisa loyo lolivako livi alicondze bese utsela titelo; lomunye ngelikhulu, lomunye ngemashumi lasitfupha, nalomunye ngemashumi lamatsatfu.'' ²⁴ Jesu waphindze wabeka lomunye umfanekiso watsi; Umbuso welizulu ufana nendvodza leyahamba yayawuhlanyela inhlanyelo lenhle ensimini yayo. ²⁵ Kepha ebusuku bantfu sebalele bonkhe, sitsa sayo safika sahlanyela inhlanyelo yelukhulemkhatsini walamabele, sesuka lapho sahamba. ²⁶ Latsi kube likhule likhaba litsele titselo, kwase kubonakala nelolukhula . ²⁷ Tisebenti talendvondza teta kuyo tatsi, ''Mnumzane njengoba wawuhlanele inhlanyelo lenhle ensimini yakho pho lolukhula lubuyaphi ²⁸ ''Lendvodza yaphendvula yatsi,'' Loko kwentiwa sitsa'' Letisebenti tabuya kuye tatsi; ''Pho uyafuna yini siluzuphune lolukhula." ²⁹ Lendvodza yabaphendvula yatsi; ''Cha, ngoba nitawutsi nizuphuna lukhula kantsi senizuphuna nalamabele. ³⁰ Yekelani nje kukhule kokubili kuze kuvunwe. Nasekusikhatsi sekuvuna kuvunwe, nasekuvunwa ngitawutjela labavunako kutsi cala bazuphune lukhula kucala balubophe ticumbi kuze litawushiswa, bese-ke nibutsela emabele esiteni sami.'' ³¹ Jesu waphindze wabatfulela lomunye umfanekiso, watsi,'' Umbuso welizulu ufanana nenhlavu yendlulamitsi leyatsatfwa ngulenye indvodza yayoyihlanyela ensimini yayo. ³² Yona yincane kakhulu kodvwa naseyikulile iba yinkhulu kunato tonkhe letinye tihlahla kudzimate kufike netinyoni temoya takhele tidleke tato emagaleni aso.'' ³³ waphindze wabatjela lomunye umfanekiso watsi;''Umbuso welizulu ufanana nembiliso leyatsatfw ngumfati wayibhica netinkomishi letine temphuphu kwabila konkhe.'' ³⁴ Konkhe loku Jesu wakukhuluma ngemifanekiso eticukwini tebantfu ngaphandle kwemifanekiso, kute lakukhuluma kuso. ³⁵ Abentela kutsi kugcwaliseke loko lokwakhulunywa ngumProfethi kutsi, ''Ngiyawuvula umlomo wami ngikhulume ngemifanekiso, ngiphumisele lokufihlakele seloku kwasekelwa umhlaba.'' ³⁶ Jesu wesuka lapho watishiya ticumbi, wangena endlini. Bafundzi bakhe beta kuye befika batsi; ''Ase usichazele lomfanekiso ngelikhula ensimi kutsi usho kutsini.'' ³⁷ Jesu wabaphendvula watsi, lona lowahlanyela inhlanyelo lenhle yiNdvodzana yeMuntfu. ³⁸ Insimi ngulomhlaba, inhlanyelo lenhle bantfwana bembuso. Kepha lukhula bantfwana baLomubi, ³⁹ kantsi-ke sitsa lesahlanyela lokubi nguSathane. Kuvuna kusho siphetfo salesikhatsi, bavuni-ke tingilosi. ⁴⁰ Ngako-ke njengoba lukhula lwabutfwa lwashiswau, kuyawuba njalo nasekupheleni kwelive. ⁴¹ Indvodzana yeMuntfu iyawutfumela tingilosi temuso wayo tiyewubutsa tonkhe tintfo letibanga kona nabo bonkhe benti balokubi embusweni wayo. ⁴² Tiyawubalahla emlilweni lowesabekako, lapho bayawukhala kudzimate kugedletele ematinyo. ⁴³ Lapho bantfu labalungile baNkulunkulu bayawukhanya embusweni weYise. ''Lona lonendlebe yekuva akeve.'' ⁴⁴ '' Umbuso welizulu ufanana nemcebo lofihlwe ensimi. Kwenteka i ndvodza yawutfola, wabuye yawugcibedzela. Yajabula kangangekutsi yahamba yayawutsengisa ngako konkhe leyayinako yancandzeka yayawutsenga leyo nsimi. ⁴⁵ Futsi, umbuso welizulu ufanana nemtsengi labefuna ematje laligugu lelikhulu. ⁴⁶ Watsi kube alitfole linye lalayo labekadule kakhulu, wase uyahamba uyawutsengisa ngako konkhe lanako wabuyela wayawulitenga.'' ⁴⁷ Futsi umbuso welizulu ufanana nelinetha lelwafakwa elwandle, labutsa lonkhe lihlobo letinhlanti. ⁴⁸ Latsi naseligcwele, badwebi balidvonsela elusentseni lwelwandle bahlala phansi, behlukanisa letihlanti. Letinhle batifaka etitjeni kwatsi letimbi futsi letingenanzuzo batilahla. ⁴⁹ Kuyawuba njalo ekupheleni kwelive, kuyawuphuma tingilosi tikhiphe lababi emkhatsini walabalungile. ⁵⁰ Tibajikijele emlilweni lowesabekako, lapho bantfu bayawukhala bagedletelise ematinyo. ⁵¹ Jesu wababuta watsi;''Nikuve kahle yini konkhe loku.'' Baphendvula batsi; ''Yebo, sikuvile'' Wase utsi kubo, ⁵² ''Ngako-ke wonkhe umfundzisi wemtsetfo loba ngumfundzisi embusweni welizulu, unjengemnikati wemuti lokhipha engcebeni yakhe nalokudzala.'' ⁵³ Watsi Jesu nasacedzile ngalemifanekiso wasuka kueyo ndzawo. ⁵⁴ Wabuyela edolobheni lakubo. Wabafundzisa esinagogeni labo, bamangala badzimate batsi; ''Lomuntfu wakutfolaphi lokuhlakanipha lokungaka nasemisebentini yemandla. ⁵⁵ Akusiyo yini indvodzana yembati le? Unina akusiye yini lona lokutsiwa nguMariya? Bomnakabo akusibo yini boJakobe, naJosefa, naSimoni, naJudasi? ⁵⁶ Bodzadzewabo akusibo yini laba labahlala natsi. pho-ke lona ukutsatsaphi konkhe loku?'' ⁵⁷ Bakhubeka ngaye. Kepha Jesu watsi;''umprofethi uhlonishwa nome ngukuphi, ngaphandle kwasendzawenini yakubo nakubantfu bakubo.'' ⁵⁸ Akazange ayente immangaliso leminyeti lapho ngenca yekungakholwa kwabo.