1 Jesu wase ubitela ndzawonye bafundzi bakhe labalishumi nakubili wabanika emandla etukwemimoya lemibi, ekutsi bayikhiphe, newekuphilisa tonkhe tinhlobo tetifo nato tonkhe tinhlobo tekugula. 2 Nankha emabito ebaPhostoli lebebalishumi nambili. Wekucala, ngu Simoni(lametsa watsi nguPhetro), naAndreya umnakabo; Jakobe indvodzana yaZabedi, naJohane umnakabo; 3 Philiphu, naBhatalomewu; Tomase, naMatewu umtselisi; Jakobe umsa waAlfiyose, naThadiyose; 4 Simoni umZelothi, naJudasi Skariyothi lowamtsengisa. 5 Laba labalishumi nambili Jesu wabatfuma. Wabayala watsi, ''Ningayi noma ngukuphi lapha kuhlala khona betive, ningangeni nasemitini yemaSamariya. 6 Esikhundleni saloko hambani niye etimvini letilahlekile tendlu yakaIsrayeli; 7 Nisahamba, shumayelani nitsi, '' Umbuso welizulu sewusondzele.'' 8 Philisani labagulako, vusani labafile, nihlambulule labanebulephelo, khiphani emadimoni. Nemukeliswe mahhala, ngako ke nani phanini mahhala. 9 Ningaliphatsi ligolide, nesiliva, nelitfusi etipatjini enu. 10 Ningaphatsi ngisho nesikhwama sekuhamba eluhambeni lwenu, nelibhantji lelinye, netincabule, nentfonga, ngobe sisebenti sifanelwe kudla kwaso. 11 Nobe ngumuphi umuti nobe emakhaya leningena kuwo, tfolani loyo lofanele kuwo bese nihlala lapho nize nihambe. 12 Naningena kuleyondlu, nibobabingelela. 13 Nangabe leyondlu ifanele, yentani kutsi kuthula kwenu kuhlale kuyo. Kodvwa nangabe ayikafaneli, kuthula kwenu akubuyele kini. 15 14 Kulabo labanganemukeli nobe balalele livi lenu, nase nihamba kuleyondlu nobe lidolobha, tsintsitsani lutfuli etinyaweni tenu. Ngicinisile ngitsi kini, kuyawuba ncono eveni laseSodoma nelaseGomora ngelilanga lekwehlulela kunakulowo muti. 16 "Bukani, Nginitfuma njengetimvu emkhatsini wetimphisi, ngako ke hlakaniphani njengetinyoka, nibe mnene njengematuba. 17 Nicaphele bantfu! Bayawunibopha banimikise emabandleni emtsetfo, banibhambabule emasinagogeni abo. 18 Niyawumikiswa embikwababusi nemakhosi ngenca yami, kuze kube bufakazi kubo nakubetive. 19 Kepha nabanimangalele, ningahlupheki ngekutsi niyawutsini nekutsi nikusho njani ngobe nakufika leso sikhatsi, niyawunikwa lenifanele nikusho. 20 Ngobe akusini leniyawukuluma, kepha nguMoya weYihlo wasezulwini loyawukhuluma ngani. 21 Umuntfu uyawunikela umnakabo ekufeni, neyise umntfwanakhe. Bantfwana bayawuvukela batali babo babanikele kwekutsi babulawe. 22 Niyawutondvwa bantfu bonkhe ngenca yelibito lami. Kodvwa lokhutsatelako kuze kubesekupheleni, uyawusindziswa. 23 Nabanitingela kulelinye lidolobha, nibobalekela kulelinye, ngobe ngicinisile ngitsi kini, ningeke niwacedze onkhe emadolobha aka-Israyeli, iNdvodzana yemuntfu ingakabuyi. 24 Umfundzi akamkhulu kunemfundzisi wakhe, futsi kute inceku lengetulu kwenkhosi yayo. 25 Kumenele umfundzi kutsi afanane nemfundzisi wakhe, nenceku kutsi ifanane nenkhosi yayo. Nangabe inhloko yemuti bayibita ngekutsi nguBhelzebule, kakhulu kangakanani emalunga alowo muti ayawubitwa ngemagama lamabi kakhulu! 26 Ngako ke ningabesabi, ngobe kute lokumbonyiwe lokungayikwembulwa, nalokufihlakele lokungayikwatiwa. 27 Loku lenginitjela kona lapha ekusitsekeni kukhulumeni ebaleni, naloku lenikuva etindlebeni kumemeteleni yonkhe indzawo. 28 Ningesabi lababulala umtimba kodvwa babe bangeke bawubulale umphefumulo. Lokungenani, mesabeni yena lokwati kubulala umtimba nemphefumulo kokubili esihogweni. 29 Abatsengiswa yini boncedze lababili ngasenti? Noko kute nome munye longawa phansi afe ngaphandle kwekwati kweYihlo. 30 Kodvwa kini kubalwe ngisho netinwele tonkhe tenhloko yenu. 31 Ningesabi. Nibaluleke kakhulu kunaboncedze labanyenti. 32 Ngako ke wonkhe longivuma phambi kwebantfu, nami ngiyawumuvuma phambi kwaBabe losezulwini. 33 Kodvwa lowo longiphika phambi kwebantfu, nami ngiyawumphika phambi kwaBabe losezulwini. 34 ''Ningacabangi kutsi ngitele kuletsa kuthula emhlabeni. Angiketeli kuletsa kuthula kepha inkemba. 35 Ngitele kuphambanisa indvodzana neyise, indvodzakati nenina, malukatane neninatala. 36 Titsa temuntfu kuyawuba bendlu yakabo. 37 Lotsandza uyise nome unina kwengca mine, akangifaneli; nalotsandza indvodzana yakhe kwengca mine, akangifaneli. 38 Longetjasi siphambano sakhe angilandzele, akangifaneli. 39 Lotfola imphilo yakhe, uyawulahlekelwa ngiyo. Kepha lolahlekelwa yimphilo yakhe ngenca yami, uyakuyitfola. 40 Lonemukelako wemukela mine, nalowemukela mine wemukela loyo longitfumile. 41 Lowemukela umprofethi ngobe angumphrofethi uyakutfola umvuzo wemprofethi, nalomukela lolungile ngobe angulolungile, uyawemukela umvuzo walolungile. 42 Ngulowo nalowo lonatsisa abe munye kulaba labancane nome yinye nje inkomishi yemanti labandzako, ngobe angumfundzi wami, ngicinisile ngitsi kini, ngeke alahlekelwe ngumvuzo wakhe.''