¹ Oyandikire malayika w'Eshengero y'e Sardi: Talag'ebiderherwe n'olala ogwerhe myuka mushanvu ya Nyamuzinda na nyenyezi mushanvu; menyer'ebijiro byawe. Menyer'okw'ogwerh'ezino nka muntu ozene, nab'ofire. ² Ochimenye, oseze emisi omubiyorhere biri hofi okufa; bulala ntabonag'ebijiro byawe binja emalangambere ga Nyamuzinda wani. ³ Oyibuke gurhe wahabwaga n'oku yunva, n'okulanga, n'okuhungama. Aliko nkaba orhalolere bwinja, nji na yinja nka chishambo, orhakanameny'amangochi na kurhogerako. ⁴ Alik'ogwerhe bantu baguma omu Sardi barhazingisaga emishangi yabo; abo bayinji lamabagira haguma nani omu myambalo myeru, bulala ba kwanene. ⁵ Owanahime naye ayinji yambikwa emyambalo myeru; ntakana kul'ezino lyage omu chitabu ch'akalamo, nani nji na derh'ezino lyag'emalangambere ga Darha n'emalangambere gaba malayika bage. ⁶ Ogwerhe amarhwiri ayunve ebi Muka abwirir'Eshengero. ⁷ Oyandikire malayika w'Eshengero y'e Filadelfiya: Tal'ebiderherwe n'omu chesebwe, now'okuli, olal'ogwerh'efungulo za Daudi, olal'ochingula, na nta muntu wa kachinga, olal'ochinga na nta muntu wa kachingula. ⁸ Menyer'ebijiro byawe.Tala, bulal'ogwerh'obuhashe bugeke, n'okulang'omwazi gwani, orhanalahirag'ezino lyani, na heber'emalangambere gawe olunvi luchingwirwe, na nta muntu waka luchinga. ⁹ Tala, nakuha ku balala bw'omu chishagala cha Lyangombe, bala bachihamba mpu bali Bayahudi nabo barhali bowe, aliko banabesha; tala, nji na balerha, n'oku bafukamya oku magulu gawe, n'okumenya oku na nku sima. ¹⁰ Bulala walangir'omwazi na kulekeraga, nani nji na kulanga nawe omu mango gw'okurhangulwa nji gayinja okw'igulu lyoshi, omu kurhangul'abantu bw'omw'igulu. ¹¹ Na yinjire duba.Gwarha bwinja echogwerhe, hakajir'omuntu wa kunyeg'eshungwe lyawe. ¹² Owanahime, na mujira nkingi omw'Eshengero ya Nyamuzinda wani, arha kanachirhengamo, na muyandika kw'ezino lya Nyamuzinda wani, n'ezino ly'olugo lwa Nyamuzinda, Yerusalemu muhyahya orhenga empingu emwa Nyamuzinda wani, n'ezino lyani lihyahya. ¹³ Ogwerhe amarhwiri ayunve oku Muka abwirir'Eshengero! ¹⁴ Yandikira malayika w'Eshengero y'e Laodikiya: Tal'okwaderhere Amina, omu hamirizi mushinganyanya na mwimana, omurhondero gw'okulema kwa Nyamuzinda: ¹⁵ Menyer'ebijiro byawe. Nyinji okw'orhaba mboho changu chuka. Wakabere mboho changwa chuka! ¹⁶ Aliko, bulala wabere wabi bembere, orhanali mboho changwa chuka, nkala na kushala omu bunu bwani. ¹⁷ Bulala wa ma derha: Ndi mugale, na ngalire, na nta cho ndagirirekwo, na bulal'orhamenyer'okoli muhanya, mubulirwa, mukene, muhurha na butambara, ¹⁸ na makuhanula oyinj'ongulir'ehoro ya kwizizwe n'omuliro, y'oshubiba mugale, n'okuba n'emyambalo y'omweru, ona yambise n'eshoni z'obutambara bwawe zirhabonekaga, n'obufumu bw'okushig'amesho gawe, y'obona. ¹⁹ Nyono, abansima ba nkalihira. Ba nampana, ohungame. ²⁰ Tala, oku lunvi, n'okulukongorha. hakajira owayunv'omulenge gwani n'oku chingul'olunvi, na naja omu mwage, n'okulya haguma naye, naye haguma nani. ²¹ Owanahime, na muha ayikale oku ntebe yani, haguma nani, nka kulala nani na himaga na nkala nyikere haguma na Darha oku ntebe yage. ²² Ogwerhe amarhwiri ayunve oku Muka abwirir'Eshengero.