¹ Napenepo wenango wafalisi na wanembi wadabuda ku Djerusalema kwenda kuna Djeso ese wadati: ² "Thangweranyi wapfunzi wako wanaphwaza mukho wawadikoni? Nazvinezvi iwo hawasambi manja iyawo wangada kurja". ³ Djeso adadaira futi adawabvunza: "Ese imwe, thangweranyi munaphwaza mutemo wa Mulungu nakuda kwa mikho iyanu? ⁴ Thangwe Mulungu analanga: 'Kuza bambo wako na mai wako,' futi 'Weneule kuti ananga kunyangala baba kana mai watche tchadiko anadzafa'. ⁵ Apo imwe munalanga: 'Weneule kuti anabvunza baba watche kana mai watche: 'Kulikwense kubatsira kuti kunadikana kutambira Kunaine nditcho tchintchino nkupereka kuna Mulungu', ⁶ mumunhu wenei hadikani kuti akuze baba watche'. Nazvinezvi, imwe amusenzesi masoko iya Mulungu nakuda kwa Mikho iyanu. ⁷ Wakukutu! Zvamuche adalanga muprofiti Izaia pamusana panu patche adati: ⁸ 'Mbumba iyi Inandikuza namulomo, apo irikutali na Ine. ⁹ Iwo wanandikuza mahala, thangwe wanapfunzisa mitemo iyawanhu"'. ¹⁰ Napenepo Iye adadaidza mbumba kuna Iye ese adaibvunza: "Ibvani futi ibvisisani: ¹¹ hapalibe kuti tchinapinda na pamulomo tchinaswipiza munhu. Kunza kwa izvi, zvinabuda na pamulomo, izvi ndizvo zvinaswipiza munhu". ¹² Napenepo wapfunzi wadauya ese wadalanga kuna Djeso: "Mulikudziwa kuti wafalisi wagala wakukonzeka pawo wabva kulanga Kwanu?" ¹³ Djeso adadaira ese adati: "Tchense tchirimwa kuti Baba Wangu Wakudzaulu alibe kusima anadzazula. ¹⁴ Wasiyeni woga; iwo ndiwo nkwei mapofu. Angati phofu mubodzi anakwewa linango phofu, wense wanadzagwa mudjenje". ¹⁵ Pedro adadaira ese adati kuna Djeso: "Thumbudzulani mutsazaniso uyu". ¹⁶ Djeso adati: "Hamusati mabvisisa? ¹⁷ Hamuwoni kuti zvense kuti zvinapinda napamulomo zvinaenda mutchipfu ese, pezesere, zvinabudusiwa? ¹⁸ Apo zvinhu zvinabuda napamolomo zvinabuda mumoyo. Izvi ndizvo kuti zvinaswipiza munhu. ¹⁹ Thangwe moyo unafunga nzeru zakunyangala, kuulaya, ukwachula, umhombo, kuba, umboo wakuphwata, na kutuka. ²⁰ Izvi ndizvo zvinhu kuti zvinaswipiza munhu. Apo kurja manja iyadaswipa hazviswipizi munhu". ²¹ Napenepo Djeso adabuda penepo ese adaenda kumitunhu iya luwani iya Tiro na Sidom. ²² Ese mukadzi mubodzi muKenani adauya mutunhu weneyo, atchikuwa: "Itani ntsisi kuna ine, Tchangamire, mwana waDavidi; mwana wangu abatiwa na dimoni". ²³ Apo Djeso halibe kumudaira enango masoko. Wapfunzi Watche wadauya ese Wadamukumbbira, watchiti: "Mugonekeni, thangwe iye alikukhuwa kumasule kwathu". ²⁴ Apo Djeso adadaira ese adati: "Ine handiribe kutumiwa kunza kwamabira iyakutsaika munyumba mwa Iziraeli". ²⁵ Napenepo iye adauya ese adagodama pamberi paIye, atchiti: "Tchangamire, ndibatsireni". ²⁶ Iye adadaira ese adati: "Azvina kubeka kutola pawu zawana ese mutchithusira titchinja". ²⁷ Iye adati: "Ande, Tchangamire, apo kana titchinja tchaito tinarjawo misuwa inagwisa wenekatchiro". ²⁸ Napenep Djeso adadaira ese adamuti: "Mukadzi, kukuru nkutenda kwako! Ngazviitike izvi ninga kudakwako". Ese mwana watche adalapiwa panguwa eneyo. ²⁹ Djeso adabuda mbuto eneyo ese adaeda ku bala la Galilea. Kumasere Iye adakwira mubango futi adagala kweneko. ³⁰ Mbumba ikuru idauya kuna Iye; wanhu wadauyisa zvirema, mapofu, zvimumu na zvibundukutu, futi nawenango watenda. Iwo wakapangiziwa mumwendo iya Djeso, ese Iye akawalapa. ³¹ Napenepo mbumba ikachamisika pawo wanhu wakawona zvimumu zvitchilanga, zvibundukutu zviwomesiwa, zvirema zvitchifamba mapofu iyatchiwona. Iwo wense wadakuza Mulungu wa Iziraeli. ³² Djeso adadaidza kuna Iye wapfunzi watche ese adati: "Ine ndinantsisi na mbumba iyi, thangwe iyo ikulambirira Naine ntsiku zitatu ese hawalibe zvinhu kuti warje. Ine handidi kuti ndiwaendese nkkabe kurja, kuitira kuti iwo wanadzagwa munjira". ³³ Wapfunzi Wadamubvunza: "Tingawonepi mapawu iyanakwana ense mbumba ikurui, pambuto iyaruserei?" ³⁴ Djeso Adawati: "Muna mapawu mangasi?" Iwo wadadaira: "Manomwe, na katsomba kabodzi". ³⁵ Napenepo Djeso adabvunza mbumba kuti igale pantsi. ³⁶ Iye adatola mapawu manomweyo nakantsombako, futi, patche adapeza kuzinamatira; ese wapfunzi wadazvigowa kuna mbumba. ³⁷ Wanhu wense wadarja watchikhuta. Futi iwo wadalongedza mathengu manomwe iyamaphisi iyazvakurja kuti zvidasara. ³⁸ Wenewale kuti wadarja wakali zvikwi zvinai zvawamuna, kunza kwa wakadzi na wana. ³⁹ Napenepo Djeso adazigoneka mbumbazo, adapinda mumwadiya ese adaenda kumutunhu wa Magadani.