¹ Panguwa eneyo, Herodi, mukulu mukulu, adabva masoko pamusana pa Djeso. ² Iye adati kuna wanyamubasa watche: "Uyu ndiye Juwau, Munyiki; iye adamuka kuwanyakufa, nazvinezvi ntsimba zenezi zirikusenza Kunaiye". ³ Thangwe Herodi akadamubata, atchimusunga futi atchimuiga muperezo, nathangwe la Herodiasi, mukadzi wamubale watcche Filipi, ⁴ thangwe Juwau akadamubvunza: "Hazvina kutenderh kuti umutote ninga mukadzi wako". ⁵ Herodi akadatumira kuti wamuulaye, apo iye adartcha mbumba, thangwe wakamukhodza ninga muprofiti. ⁶ Apo, palo phwando la Herodi lidaswika, wana wa Herodiasi adazvswa pakati pawa nyakudaidziwa ese zvidafantsisa Herodi. ⁷ Paphindulo, iye adamuthembesa nakudumbira kuti angamupasa iye tchinhu tchatche iye anakumbiratcho. ⁸ Pakupeza kupfunzisiwa na mai watche, iye adati: "Ndipaseni pano, mundiro, musolo wa Juwau, Munyiki". ⁹ Mukulu mukulu adatsurukwala nakukumbira watche, apo, nakuda kwakudumbira watche futi nakuda kwawense kuti wakalipo patchiswuswulo na iye, wadatumira kuti izvi zvinadikana kuitika. ¹⁰ Iye adatuma masodja, wabodzibodziwo wadamuulaya Juwau muperezo. ¹¹ Napenepo musolo watche wadauwisa mundiro ese wadamupasa mutsikanayo ese iye adauendesa kuna mai watche. ¹² Napenepo mwuwiriyo wadaufutchira. Pakupeza izvi, iwo wadaenda ese wadaerenga kuna Djeso. ¹³ Patche Djeso adabva zvikadaitikazvo, adabuda penepo, mumwadiya, kumbuto iyatcheega. Pakubva izvi, mbumba Idamutewera namwendo, itchibudira mumaluwani. ¹⁴ Napenepo Djeso adatchitha, adawona mbumba ikuru, adagala nantsisi naiyo ese adawomesa watenda watche. ¹⁵ Pako kumaulo kudaswika, wapfunzi wadauya kuna Iye ese wadati: "Iyi ndimbuto iyarusere ese ntsiku iyadipera. Gonekani mbumbai, kuitira kuti iwo wakwanise kwenda kumaluwani ese wagule zvakurja zvawo". ¹⁶ Apo Djeso adawabvunza: "Iwo hawasi kudakwenda, wapaseni zvinhu kuti warje". ¹⁷ Iwo Wadamudaira: "Ife tina mapawu matchanu pano na ntsomba ziwiri". ¹⁸ Djeso adati: "Wuisani kuna Ine". ¹⁹ Napenepo Djeso adabvunza mbumba kuti igale wadoko wadoko. Iye adabata mapawu matchanu na nantsomba ziwiri ese, atchilingisa mudzaulu, adazinamatira, adabedula mapawu, adazipasa kuna wapfunzi futi wapfunzi wadapasa kuna mbumba. ²⁰ Wense wadarja ese wadakhuta. Napenepo iwo wadalongedza maphisi iyazvakurja iyazvakusala: iyadadzala matengu kumi namairi. ²¹ Wenewale kuti wadarja wakaswika zvikwi zvichanu zvawamuna, kunza kwawakadzi na wana. ²² Tchiripo ripotcho Iye adaita kuti wapfunzi wapinde mumwadiya kuti waende kumberi Kwatche kukundu linango, patche akagoneka mbumba. ²³ Patche adapeza kubvunza mbumba kuti iyende zvayo, Iye adakwira bango ega kuti anamate. Pako kudadoka, Iye akali kweneko ega. ²⁴ Apo mwadiya ukali kutali napantsi futi duze nakunza kwakuwonererha nathangwe lamaphopoma, thangwe mhepo ikafuliza sososo naiwo. ²⁵ Pakulindira katchinai nausiku, Djeso adafadzera kuna iwo, atchifamba padzaulu pabala. ²⁶ Pawo wapfunzi Wadamuwona atchifamba padzaulu pabala, wadagala wakurtcha ese wadati: "Ndi tchiphoko!" Futi iwo wadakuwa nakurtcha. ²⁷ Apo Djeso adawabvunza tchiripo ripotcho: "Chingani! Ndine Ine! Lekani kurtcha". ²⁸ Pedro Adamudaira: "Tchangamire, mungati Ndimwe, ndibvumireni kuti ndiuye kuna imwe na padzaulu pamadzi". ²⁹ Djeso adati: "Uya!" Nadyali Pedro adabuda mumwadiya ese adafamba napadzaulu pamadzi kuti aende kuna Djeso. ³⁰ Apo, patche Pedro adawona mhepo, adartcha; futi, atchitanga kuloloma, adakuwa: "Tchangamire, ndiponeseni!". ³¹ Djeso tchiriporipotcho atasamula boko, adabata Pedro ese adamubvunza: "Iwe, kuti unakutenda kudoko, thangweranyi udaita nhukwala?" ³² Napenepo, Patche Djeso na Pedro wadapinda mumwadiya, mhepo idaema kufuliza. ³³ Wapfunzi mumwadiya wadatenda Djeso futi wadati: "Tchadiko Imwe ndimwe Mwana wa Mulungu". ³⁴ Pawo wadapeza kuyambuka, wadaswika dziko, la Genezare. ³⁵ Pawo wanhu wakweneko wadadziwa Djeso, wadatumira masoko kuna zense mbuto zatchikalisano ese wawawisa kuna Iye wense kuti wakakonziwa. ³⁶ Iwo Wadamukumbira kuti wakuye budu languwo Zatche, futi wense kuti wadakuya wadalapiwa.