1 Nomba pakupwa kwe sabata, ulo bwakucila pabushiku ubwantanshi ubwa mulungu, Maliya magdalena na maliya umbi balishile mukumone nshishi. 2 Moneni kwali icikukuma icikulu, ico malaika wakwa Shikulu alikile ukufuma ku mulu, alishile kunkulushyapo ibwe, nokwikalapo. 3 Ukumoneka kwakwe kwali nge nkuba, ichakufwala cakwe calibutile nge mfula yakubuta. 4 Abakulinda balitutumine ku mwenso nokuba ngabantu abafwile. 5 Malaika alilandile nabanakashi nokubeba ati ''mwitina, pantu nebo ndishibile ukwebati mukofwaya Yesu, uwatanikilwe. 6 Talipano, lelo alimine, ngefyo alandile. Iseni mumone apo bamulalike shikulu. 7 Kabiyeni muyekweba abasambi bakwe, ''alibukile kubafwa. moneni akomitangilila ku Galile. Kulya eko mukoya kumumona'' 8 Abanakashi balifumine bwangu kunshishi no mwenso nensansa ishingi, balibutukile ukuuya mukweba abasambi. 9 Moneni, Yesu alibakumenye nokubebati ''mwapoleni,'' Abanakashi balishile, balikatile kumakasa yakwe nokumushinshimuna. 10 Elo Yesu alilandile kuli bena ati, ''mwitina. Kabiyeni muyekweba banyinane bayeku Galile. Kulya eko bakaya kumona.'' 11 Nomba ulo abanakashi balikuya, moneni bamo abapali bakalinda balile mumusumba nokweba bashimapepo bakalamba fyonse finti ifyo ifyacitikile. 12 Ulo bashimapepo bakalamba bakumene nabakalamba nokulanshanya nabo uyo mulandu, balipele indalama ishiingi kubashilika, 13 nokubebati, ''landeni kuli bambi, abasambi ba kwa Yesu balishilre ubushiku, nokwiba umubili wakwe ulo twasendeme. 14 Ngecebo ici cifike mumatwi yakwa cilolo, tukamunasha nokufumya amasakamiko yonse kuli mwebo.'' 15 Eco abashilika balibulile indalama nokucita ifyo babebele. Icebo ici calyanene monse mu na Yuda nokutwalilila ukufika na lelo. 16 Lelo abasambi ikumi naumo balile ku Galile, kulipili ulo Yesu abasontelele. 17 Ulo bamumwene, balimunshishimwine, lelo bamo balimutwishikile. 18 Yesu alishile kuli bena nokulanda nabo ati, ''Amaka yonse yalipelwe kuli nebo mumulu napesonde.'' 19 Eco kabiyeni muye kulenga abanko shonse ukubabasambi. mulekubabatisha mwishina lyakwa Tata, ilya Mwana, nelya Mupashi wa Mushilo. 20 Mulekubasambilisha ukulama fyonse ifyo namyebele. Moneni, nakulaba namwebo, lyonse mpanka nakumpela yanshita.''