¹ Sô ku ane kuéé ane maiêlu jizu bê, zuntu miônga ri Tibérias; ê plasê ra ane axi: ² Simon Peru ku Tomé( ka sama Dídimo), ku Natanael( ixi Kaná Galileia) ku ane ná Zebedeu, ôtô dôsu maiêlu rê ta zuntu. ³ Simon Peru fa: un sê ka ba tamba: Ane kundjié: non turu kabé ku bô. Ane bé, letxa vapó; suku é néwã kikê ane na tamba wa. ⁴ Pomonha ta ka biri za, Jizu ba paiá; Ane maiêlu Jizu na ta ta mê sa Jizu wa. ⁵ Sô jisu fa ane: Ane ná un, sê tê kua mé? Ane kundjié: Inga: ⁶ Ê fa ane: Pê lêrê mionga ôtô kiba vapô, sê ka bê. Ane zuga lêrê pê mionga, ane na tô ta mora ane ka ji wa punda iô kikê. ⁷ Maiêlu rê ixi mê ka ama, fa Peru: Sumu! Peru ndê mê sa Jisu, ê bixi kabixi(punda ê ta sê kabixi ongê) létxa mionga. ⁸ Sô ôtô ane maiêlu rê, bi ku kanuã(punda ê na ta lonje tia wa) ka bi ku lêrê kikê. ⁹ Ala ma ane xiga tia, fôgô ta ka iêrê za, ku wã kikê diba rê, maxi mpó. ¹⁰ Jizu fa ane: bi ku kikê ma sê sa kuê aié. ¹¹ Simon Peru, subi, saiá lêrê bi kuê diba, xiaru ku kuin tano sentu ku têsi kikê ngairu; lêrê na fóno wa. ¹² Jisu fara ane: bi mé. Néwã maiêlu rê na puté néwã kua wa: Gê mô sa? Ane ta mê sa Jisu. ¹³ Sô Jizu bi, tua mpó, ra ane; mora é mé ê ji ku kikê. ¹⁴ Ixié ji têsi vê ma jizu plasê ra maiêlu rê, jina ria mê lata fô motxi. ¹⁵ Ala ma ane ta méru za, Jizu fa Simon Peru: Simon ná Zon, bô ka ama un maxi dôkê ane ôtô? Ê kundjié: Êê, bô ta ma nga ama ô. Jizu faré: da mé ane kordeiru un. ¹⁶ Tô fé dôsu vê: Simon ná Zon, bô ka ama un? Ê fa: Êê, Jizu bô ta ma nga ama ô. Jizu fé: Tua konta ovelha un. ¹⁷ Fé têsi vê: Simon, na Zon, bô ka ama un? Tisteza tua Peru punda ixié ji têsi vê mê fé kué: Bô ka ama un? Ê fa: Jisu, bô ta turu kua, bô ta ma nga ama ô. Jisu kudjié fa: Da ovlha un mé. ¹⁸ Vére vére nga fa ô, ala ma ô ta masi jové, bô mé ta ka bixi ongê ô, ta ka ba lugé ixi ma ô mêsê; maji ala mô ka bila vé, bô ka sêndê mô, ôtô ngê ka bixi ô kabixi tô bé ku ô lugê ma ô mêsê. ¹⁹ Ê fa kué, pa Peru ta ma iô ngê ka ba gôgô ku Dêsu punda motxi rê. Mê fa kué sô, Jizu fa: Lêlê un mema. ²⁰ Peru bila, pia ma maiêlu ixi ma jizu ka ama fogaua ta ka lêlê mema, ixi ma ni ceia pê ntê rê pêtu Jizu, puté: jizu ngêi ka ba trai ô? ²¹ Ma Peru bê kué, Jizu fa: ngê é kua ka ba ra kuê? ²² Jizu faré: Xi un mêsê pê ta ingê atê nga bi, kua kué ka importa ô? Lêlê un méma. ²³ Ane ta ka lumba manu ku manu, ma miêlu jizu na ka muê wa. Ku turu kué Jizu na fa mê ka muê wa, Maji véré: kua kué ka impota ô xi mêsê pê ta ingê antê nga bi? ²⁴ Ixié sa maiêlu Jizu ku ka fa ri ane kué, sisika ane kué; Non ta ma kua mê fa sa véré. ²⁵ Ê tê iô kua anda ma Jizu ji, ma wã wã kuéé sa sisikaru, un ta ma né mundu na tua turu kua ku sa sisikaru wa. Amém.