¹ Lumba ta na kulu, Desu ta ka lumba, lumba sa Desu. ² Ê ta na kulu ku Desu. ³ A zi turu kua punda Êlê, sê elê ne whã ku ma a zi a na ka zié wha. ⁴ Vira ta né, Y vira ta kandja ome. ⁵ Só kandja ta ka luzi kosi kulu sô kulu na langa kotlê wha. ⁶ Ê ta ku whã ome ma Desu manda, nome rê sa Zon. ⁷ Ê bi mora sesêminha pa ê bi musa kandja, pa turu nkenu kelê né. ⁸ Ê na sa kandja wha mazi ê bi musa kandja. ⁹ Ê sa kandja véré ku ka luzi turu ome ku ka bi tia. ¹⁰ Ê ta tia a zi tia e tia foi ziru pâ elê ma tia té wha. ¹¹ Ê bi ra povô rê, povô rê na tué wha. ¹² Mazi turu nkenu ku tué tô kelê ni nome rê, Ê ra ané porê di sa ná Desu. ¹³ Mazi ané na nasê di sangui wha, ne vonté kani wha né vonté omé wha, mazi di Desu. ¹⁴ Lumba bila kane y vevia katxi nón y nón bê porê rê mora porê Uniko ná Tata. Siaru ku ngosô ku veré. ¹⁵ Zon ka fá rê tô nguita, fa: yé sa Nkênu si ma un fa ki sa bi pumbê un y ê sa masi rôkê un punda ê sa antizi un. ¹⁶ Punda ku porê rê turu nkênu ta ku ngosô figa wha. ¹⁷ Punda a ra alê punda Muzé mazi ngóso ku veré bi punda Jizu klistu. ¹⁸ Né whã nkênu na ka tô bê Desu, Uniku ku sa Desu, ku ta kotá bandji Tata, ku sa Nkênu si ku fá. ¹⁹ Yé sa sesteminha Zon, olá ané Zurê manda ba Jiruzalé sa saseroti ku levita ba puté: Nguêi bô sa! ²⁰ Ê fa ané biriru ê na nega wha, ê kofesa: Na sa Klistu wha. ²¹ Sô ané puté: Antó nguê bô sa! Bô sa Elia! Sô Ê kundji: na sa wha. Sô ané fa: Bô sa ná lekaru! Ê kundji: ynga. ²² Sô ane fa ané. Fa nón nguei bô sa pa nón ba fa nkenu si ku manda nón. Kuai bô ka fa di bô mé! ²³ Ê fa: Un sa vogi nkenu si ku ka nguita ni whã nga sê né whã kua né. Dêtê mon dja Sun, mora Izaia ná lekaru fá. ²⁴ Nkênu si ma a manda sa farizeu. ²⁵ Sô ê puta ane: ra kua bô ka bi butiza, si bô na sa klistu né Elia né plofeta! ²⁶ Zon kundji ané fá: Nga butiza ku aua. Punda whã Nkênu sa sa katxi sê ma sê na ta wha. ²⁷ Yé sa isi ku ka bi sô an, Nkênu si ma na sa buaru di yuê kóro sapatu rê wha, ²⁸ Kua é ra ni Betanha ni otô kiba Zuron nga ma Zon ta ka butiza né. ²⁹ Otô ria Zón bê Jizu ka bi lelê sô fa: yé sa koderu Desu ku ka txia pekaru tia. ³⁰ Elê sô un ta ka fa: Ma Ê ka bi sô an y ê sa masi rokê un y ê ta tia pumbelu un. ³¹ Na tá té wha, Masi pa Ê musa Israeli un tê ki bi butiza ku aua. ³² Zón tanga nkenu mora me sa. Un bê supitu ka tuka fô osé mora pombi bi ndja nsosi Rê. ³³ Na ta té wha: Nkenu si ku manda un butiza ku aua fara un: Nkenu si ma bô bê supitu ka tuka diba nsosi Rê, yé ku ka butiza ku supitu santu. ³⁴ mbê, to fa né ma yé sô sa Ná Dêsu. ³⁵ Otô dia Zón tô ta nha ku dosu melu rê: ³⁶ Ola ma ê bê Jizu ka pasa ê faré: yé sa Ombô Desu. ³⁷ Sô dosu melú ndê kua ma Zón fá ane pasa ka lelê Jizu. ³⁸ Ola Jizu vutuka ma Ê bê ane ka lelê Ê fa ane! Kua sê mesê! Ane kundji: Rabi, ma a ka fa mése! Andji Bô ka ta né! ³⁹ Ê fa ané: Bi pa sê pié. Ané bé bê nga ma Jizu ka ta né, Ané ta kuê dié punda ê ta kundji kuine ola. ⁴⁰ André ná mon Simon Peru, sá whã ku ta ka ndê Zon ka fa sô lelê Jizu. ⁴¹ Sô ê bê pumbelu námon rê Simon sô faré: Nón bê Mesia (Ma ka fa Klistu). ⁴² Sô ê bé kuê ba lelê Jizu. Ka pié Jizu faré: Bô sa Simon ná Zon. Nome ô ka sa sefa (ku sa Peru). ⁴³ Otô dia ola Jizu ba Galilea Ê bê Filipe sô ê faré: Lelê Un: ⁴⁴ Filipi ta ka ta Betzara, poson André ku Peru. ⁴⁵ Filipi bê Natanhali sô faré: Nkenu si ma alê Muzé ku na lekaru sisika non Bê: Jizu ná Zozé Nazaré. ⁴⁶ Natanheli puta: Nazaré ka pô bi ku kua buaru! Filipi kundji. Bi pié. ⁴⁷ Jizu bê Natanheli ka bi lelê ê fa vira rê: ya wha israelita ku na tê netxó mali wha! ⁴⁸ Sô Natanheli puté: Andji Bô ta uné! Jizu kundji, Antiji ma Filipi sama ô Un bê ô ola bô ta kosi pó figu. ⁴⁹ Natanheli kundji: Mese, Bô sa Ná Desu! Bô sa Alê Israeli! ⁵⁰ Sô Jizu faré: Punda nfa ô ma Mbê ô kosi pó figu, bô kelê! Bô ka bi bê kua masi gairu dokê yé. ⁵¹ Kua nga fa sê veré ma sê ka bi bê osé biriru ku anzu Desu ka sa subi ka desê diba Ná ome.