¹ Sô xefi saserdoti fa: ane kué sa axié mé? ² Sô ê fa: Home, manu ktu táta, ndê: Dêsu re gloia plasê da táta non Abron, mê ta Mezopotâmia, antiji de bi ta Harã; ³ Farê: Xiê fô tia ô, tia de ane familia ô, bi tia ma nga ba musa ô. ⁴ Sô ê xiê fô tia Kaldeu, ba ta ni tia Harã. Ala ma táta rê muê, ê ba tia, mê sa né aié. ⁵ Dêsu na jié leda néwã kua nha wa; maji Ê jié plomesa de dé likêza, antiji pê tê na. ⁶ Sô Dêsu fa axi: Ximentxi ô ka ba nda ni ôtô tia, ane ka ba manha ane, ka ba béta ane kuana kuin sentu anu. ⁷ Naso ma ane ka ba xivi, Aun ka ba julga ane, (Dêsu fa).Ma kué ka ra ane ka xiê, ba xivi un ni luguéé. ⁸ Ê dê pactu de sirkusizo; Ê jera Izak, sirkunsidé naké ria, sô Izak jera jakó, jakó jera ane kuiné dôsu patriarka. ⁹ Ane patriarka, ta ku inveja Juzé, bendê ra Egito; Maji Dêsu ta kuê. ¹⁰ Tô livlé de turu afliso, dê glasa ku sabedoria ni uê Faraó, alê ejiptu; Pê govenarô ni ejiptu, ku turu kai rê. ¹¹ Fome létxa tia de Egito ku Kannã, meme afliso; Tata na tê mé mé wa. ¹² Maji Jakó ndê egito tê sereal, ê manda ane na rê banha pimêlu vê. ¹³ Ku ji dôsu vê, Jozé bê ma ane mosu é sa namo rê, Faraó turu bê ane namo rê. ¹⁴ Jozé manda sama táta rê Jakó, ku turu familia rê, sambari kuin nguê. ¹⁵ Jakó ba Egito, muê nha; ane tata non turu; ¹⁶ A bé ku ane Siken, ba tia ane nha ni kóbo Abrón, ku txó lêlu ane kopua tia mon ane na Emor ni Siken. ¹⁷ Ala mê xiga tempo ma Dêsu ta fa Abrón, pôvô bila motxi pê Egito. ¹⁸ A lata ôtô alê ku na ta konsê Jozé wa. ¹⁹ Ixié ku koso rê suzu komesa ka maltrata ane táta non, ka ji pa ane zeta ane na ane pênha, pa ane na vévia wa. ²⁰ Ni tempo xi za Muzeji nansê, ê sa wã nguêbuaru uê Desu, têsi mêji ê ta kai ane táta rê. ²¹ Ala ma mandê bêrê, na Faraó tué békuê kai rê ba kia mora na rê. ²² Ane xina Muzeji turu sabedoria egipsio; Ê tia pôrê ni lumba rê, ni ane kua mê ka ji. ²³ Ala mê ji kuana kuin anu, ê ta mêsê ba lêlê manu rê ku ane na Israel. ²⁴ Ê bê wã ane guêrê ka padisê mon ejipsio, ê mata ejipsio é ta. ²⁵ Ê kunda ma ane manu rê ka ta ma Dêsu ka ba liberta ane plovia mon rê; maji ane na kompeendê wa. ²⁶ Tê ôtô ria, ane ta ka péza, ane bê, ê da ane konsê, fa: Sê sa lumon, kua sê sê ka ji ôtô mali ra? ²⁷ Sô ixi ku ta ka mêsê ji ôtô mali empuré fa: nguê pê ô xefi ku zuxi diba non? ²⁸ Bô té mêsê mata un mora mazó mô mata Ejipsio? ²⁹ Sô ala mê ndê kué Muzeji bêrê ni tia Midiã, ligué mê ji dosu na né. ³⁰ Ê ta nha kuana kuin anu, wã anzu sumu ba lêlê ni dezertu, ni monti Sinai. ^{31 32} Muzeji, mê bê ane kuéé, ê gôgô ku vizo é; ê tô saiá txô pê pia kué buaru, ê ndê wã kua ka fé: Un sa Dêsu de ane tata ô, Dêsu de Abron, Dêsu Izaki, Dêsu Jakó. Muzeji mendu, na mêsê pié wa. ³³ Sô Desu fa rê: txia sapatu mô sa kuê opé, punda luguê mô sê ka pê opé sa wã tia santa. ³⁴ Un sê ka bê padisê ma pôvô un sa né ni ejitu, Un dê zémé ane, un dêsê pa livla ane; Anto bi nga manda ô ba ejitu. ³⁵ Muzeji ixi, ma ane ta zeta fa: Nguê ji ô xefi ku zuxi, Dêsu manda ô mora xefi libertarô, ni mon anzu ku ta uêrê ni sarsa. ³⁶ Ê txia ane ni Ejitu ala mê ji milagri, ku xinali ni tia Ejitu, ni mionga bôru, ni dezertu, jina kuana kuin anu. ³⁷ Ixié sa Muzeji ku fa ane na Israel: Sumu, Dêsu sê, ka lata wã pofeta da sê ni katxi ane lumon rê, wã pofeta mora un. ³⁸ Ixié ku ta nguêza pôvô ni dezertu ku anzu ku ta fa ni monti Sinai, ku ane tata non; ane ixi ku resebê palava vira, pa ane ra non; ³⁹ Ane kuaxi ma ane tata non zeta de ndê; ane zeté, coso ane bila da egitu; ⁴⁰ Ane fa Arão: Ji ôtô dêsu da non, punda Muzeji ixi ku bé ku non lonji tia Ejitu, non na ta kua ku da kuê wa. ⁴¹ Ni tempo xi za ane ji wã bezeru, ji fesa da idulu, tô ngôgô ku kuaxi ma ane ji. ⁴² Dêsu bila kontla ane, pê ane xivi exersitu de ose, mora mê sa eskreveru ni livo Pofeta: Sê ka pia mê kai Israel, sê oferesê un xitu muêru, ku sakrifisio ni dezertu kuarenta anu? ⁴³ Sê tua da sê guêza Moloki tu tetembu DêsuRenfã, ku turu kuaxi ma sê ji pa sê adora; kué mé ma nga ba kôlê ku sê ba londji Babilônia. ⁴⁴ Ane antipasaru, ta ku nguêza ri testemunhu ni dezertu, axi mora Dêsu fa ku Muzeji, pê ji mora mê ta bê. ⁴⁵ Mora ma ane tata non tua kuéé, bé ku Juzué mora ane tua poxi gentiu ma Dêsu txia ni uê antipasru ane atê ria Davi. ⁴⁶ Dêsu gôgô ku kué, tô pindji pa ane ngolo luguê ri kai Dêsu de Jako. ⁴⁷ Salomon ji wã kai ré. ⁴⁸ Maji Dêsu na ka ta kai djiru mon home wa, mora pofeta fa: ⁴⁹ Ose sa trono un, tia sa lugué opé un ka sa né; kali kai ma sê dji ra un?, Sumu fa; Kali lugué nga reposa né? ⁵⁰ Sê na ta ma turu kué un jié ku mon un wa? ⁵¹ Sê, obstinado insirkunsizu re koso ku ôria! Sê ku semple ka bi kontla Supitu Santu! Mora tata sê sa, sa mora sê tambe sa! ⁵² Kali pofeta tata sê na pesegui wa? Ane mata turu ane ixi ta ka anunsia seru ma justu s|e ka bi, aié sê mé tô mateta; ⁵³ Sê ku ta resebê lei de patxi anzu, maji sê na lôkê wa. ⁵⁴ Ma ane ndê áne kué sô, ane tua leva pê koso, ta ka muê dentxi kontlé. ⁵⁵ Maji êlê, xiaru ku supitu santu, lata uêrê pia ose, ê bê glora Dêsu, ku jizu ku ta direita Dêsu. ⁵⁶ Ê fa: Sê ka bê ose biriru, Na Home, ku sa direita Dêsu. ⁵⁷ Maji ane, ka nguita ku fosa, tapa ôria ane, ka kôlê zuntu mema rê; ⁵⁸ Txié fô poso, dê ku buru, nguê ku bê kuéé pê kabixi rê opé wã mosu ka sáma Saulu. ⁵⁹ Ane ra Estêvão ku buru, ê ta ka nguita fa: Jizu recebê supiyu un. ⁶⁰ Ê pê zunta so, ka nguita ku fôsa: Sumu, na kupa ane ku pekaru é wa. Ê fa kué sô, ê muê