¹ Ê bi ra ma Ikonio ma Paulu ku ku Banabé letxa ane dosu ny ngêza zurê, sô ane fa whã mora ma yô nkênu zurê ku gêgu kêlê. ² Mazi zurê ku na ta mesê wha, komesa ka ndjinga ntê ane zintxi ma ane bila kontê ane ná amon. ³ Asyé ane tá nha yô ria, ka fa ku porê Sun, ma Ê ta ka ra vonté pegason ku vonté Rê, desa ma sinali ku kua ma ê ta ka zi ka sa punda Paulu ku Banabé. ⁴ Sô masi motxi poson tá patxiru: whã dosú nkênu ku zurê sô otô ku sigirô. ⁵ Zintxi ku zurê tua patxi ku sefi ane, kolê ku vonté zi mali sô ka ra ane sigirô ku buru: ⁶ Ola ane ta kua é, ane fuzi ba poson Likaônia, Lista ku Debi ku turu kiba fêgêjá. ⁷ Ane plega lumba Dêssu nha. ⁸ Ane bê whã ome tasóru ny Listra, sê fôsa opé lezaru jina ê nansê rê ma ê na nda wha. ⁹ Ome é é ndê Paulu ka fa. Paulu sumba whê pê sô ê bê ma ê tia ku afé pa ê whogó. ¹⁰ Sô Paulu fé ku fosa: Lata pê opé ô ndja. Asyé ome é sata sô komesa ka nda. ¹¹ Ola yô nkênu bê kua ma Paulu zi, ane lata fogô ane fa ny lungua ane Likaôni: ane dêssu bi atê non mora ane ome. ¹² Ane sama Banabé Zeu sô Paulu dy Ermis, punda elê sô ta ka fa. ¹³ A sefi ngêza Zeu ma ngêza tá whê posó, ane biku buê ku glinara whê puton. Êlê ku yô nkênu ta mesê saklifika. ¹⁴ Mazi ola sigirô Paulu ku Banabé, ndê kua é ane fonó kabisi ane sô ba katxi yô nkênu seru, ngita. ¹⁵ Sô fa: Ane ome ra kuay ma sê seka zi kua é ra! Non turu sa ome mora sê. Non bi ku lekaru buaru pa sê fuzi fô ane kua mali é sô pa sê bila ra Dêssu vivu ku zi osé ku tia, mionga ku turu kua ku sa né. ¹⁶ Ná-kulu Ê pimiti pa turu nkênu tia ká nda ny modja ane plopi. ¹⁷ Ku turu kua é Ê na Desé mé sê seseminha, ka zi buaru wha, Ê ra sê suba fô osé sô ku ola ma turu pó ka ra mé, sia kosó sê ku mé ku gosô. ¹⁸ Ku lumba é mé Paulu ku Banabé na ta poy ndja yô nkênu dy saklifika. ¹⁹ Sô whã dosú zurê Antiokia ku Ikónia bi konvesê ane nkênu. Ane ra Paulu ku buru lasté fô posón, ta kunda ma ê muê. ²⁰ Ane mêlu tá kondoké, ê lata sô letxa posó. Otô ria elê ku Banabé syê ba Debi. ²¹ Sô ola ane plega Vangéliu posó é sô zi yô mêlu tô ba Lista Ikónia ku Antiokia. ²² Ane tô sigi ka ra ane mêlu fosa ntê ka ra ane kosó pa ane ka veviá ku afe, Ane fa ane ma ku turu aflison sô non ka letxa Lenu Dessu. ²³ Sô tô pê ane patoru kara ngêza, pa ane ka fa lason ku jinzu ka kunfia ny Sun, ane ku kêlê. ²⁴ Sô ane lá Pisidia, vitxa Panfilia. ²⁵ Sô ane plega lumba ny Pergi sô dêsê ba Italia. ²⁶ Sô yngé ane zi viaji ba Antiokia, nga ma ta kunfia ny glasa Dêssu ra suvusu ku loké zi. ²⁷ Ola ane vitxa Antiokia sô zunta ngêza, ane fa turu kua ma Dêssu tá zi punda ane, sô mora ma póto afé biri ra zintxi. ²⁸ Ane ta yô ria ku ane mêlu.