¹ Sô na tempu siza, alê Elodi manha whã dõsú nkenu ngeza pa ê matrata ané. ² Sô ê mata Txagu, ná amón Zon ku supára. ³ Ma ê pia ma kué é bua ra ane Zurê, ê ngoló manha Perú turu kua-é kôlê na ria mpó sê fomentu. ⁴ Ola ê manha Péru, ê pê pezu sô pê kuana ngupu dy kuana soré dy vigié ngoló bikuê ra povô katxi Pasukua. ⁵ Sô Péru ba ta whã pezu sô ngeza ta ka fa lason ra Dessu ré ku turu vonté. ⁶ Nsuku-é mé ola Elodi tá ka plezenté, Péru ta ka dumi katxi dôsú soré, pezu ku dôsú lêngê, sô whê póto, nguara tá ka zongó pezu. ⁷ Sô anzu Sun bi séru, sô whã kandja yêrê letu pezu. Anzu é batê mbandji Péru, koré sô fa: lata séru. Sô lengê é kiê fô mon rê. ⁸ Anzu fé: pê kábisi ku ngasó ku sapatu. Péru zi kua-é. Anzu fé: pê kapa lêlê Un. ⁹ Péru lêlê anzu sô siê. Ê na tá ta si kua ma anzu seka zi sa setu wha. Ê kunda ma ê ta ka sonha. ¹⁰ Sô ola ma ê pasa pumbêlu tô pasa sêgundu nguara, ane vitxa puton félu ku ka ra rá posson, ku biri ra ane sô, ane siê desê whã lua, sô anzu desé seru. ¹¹ Ola Peru kiê kuê sô, ê fa: Ayé ntá veré ma Sun manda anzu Rê ku libla Un ny mon Elodi ku turu kua ma zurê ta mesê. ¹² Ola ê bi ta kua-é ê ba kai Maia mama Zon, ma subli-nome sa Maku, ngá ma yô kliston tá zuntaru ka fa lason. ¹³ Ola ê batê póto, whã ná kia ma a ka sama Ludi siê ba kundji. ¹⁴ Ola ê bi ta vózu Péru ê sia ku gostô ma ê kesê biri póto. Pa ê zi kua é, ê kolê ba sala, ba viza ma Peru ta ndjaru, póto. ¹⁵ Sô ané fé: bô sa dôdô, sô ê komesá ka pufia. Sô ané fé: Ê sa anzu rê. ¹⁶ Mazi Péru ta ka batê póto sô, ola ané biri póto, ane bê sô babaka. ¹⁷ Ê zi ane sinali ku mon pa ane kaboka, ê tanga ané mora ma Sun txié fô pezu. Ê fa: Pa kua-é ra Txagu ku ane ná amon. Sô ê siê ba otô ngá. ¹⁸ Ola pomonha biri, nha ta ku yô demanda katxi soré dy kua ku ra ku Péru. ¹⁹ Sô ola ma Elódi ta ka ngolóé, ê na pô bê wha ê puta ane nguara sô manda ane pa ane maté. Elódi desê fô Zurê pê ba Sezarêa sô passa whã dôsu ria nha. ²⁰ Elódi ta satiaru ku an nkênu Tiru ku siron ma ane zunta ba kota rê sô bê apôio Blastu tabarô alê dy zura ane. Sô ane pindji paji, punda tia ane tá ka tua mé tia alê. ²¹ Sô whã ria, Elódi bisi kua bisi alê, ba ta son palaxu ka lumba ku ane. ²² Yô nkênu ngita: yé sa vogu whã dêsu, ê na sa dy whã ome wha! ²³ Ême whã anzu Sun firié punda ê na ra gloia ra Dêssu, sô ókoli mé, ê muê. ²⁴ Ku turu kua é lumbá Dessu ta ka kula sô tá ka whanga. ²⁵ Banabé ku Salu bi ki otô kua sissikaru: ba Jeruzalem ola ma ane tia ziru misson ane, bé ku Zon, ki tê subnome era Maku.