¹ Paulu, apostulu dy Kistu Jizu ny vonté Dêsu ku akoru pomesa dy vira ki sa ny Kistu Jizu. ² Ra Timotu ná amaru, gasa mixikogi ku pagi dy Dêsu Tata ku Kistu Jizu, Sun nón. ³ Ãn ra Dêsu gasa ra nkênu ma ãn ka xivi gina nana ku whã kuxensa limpuru punda nga lebua semple dy Ô ny lason un, suku ku pomonha. ⁴ An lembua dy ané aua whê mésé, zó mbê ô pa un sia ku alegia. ⁵ Ãn lembua dy afé veré ku vevia pumêlu ny gina Loidy sô ku mama ô Eunisy sun sa konvensêru ma afé ka ta ku ô. ⁶ Punda kuê é nga sama ô atenso pa ô rekonhesê don Dêsu ku sa ô pêru ku mó. ⁷ Punda Dêsu na da non supitu mendu wha, mazi pôrê ku amolê sô ku disiplina. ⁸ Anto na ka tê vegonha dy sêsemunha ny Sun non, né dy ãn Paulu pézu rê, Da kua é zunta ku ãn ni padisê vangelu ku porê dy Dêsu. ⁹ Ê sava non sô sama non mora santu, né mora obra non wha, mazi mora popi planu ku gasa rê mé da non ny Kistu Jizu, antigi tempu tê komesa. ¹⁰ sô aié savaso Dêsu bi musa punda Savarô non Kistu Jizu ku bi da non, ku baga motxi sô bi ku kandja vira atê atê punda vangelu. ¹¹ Punda kua é ãn sa koiêru pegarô, apostulu ku mesé. ¹² Punda kua é ãn turu padisê ané kuê é. Mazi ãn na sa ku vegonha wha punda ãn konsê nkênu un ma kêlê né, sô ãn sa setu mê tê porê pa ê lôkê kua ma un kunfia né naria é. ¹³ Mantê mora dy lumbua buaru dy ndê un, ma sê ndê ku afé ku amolê ku sa ny Kistu Jizu. ¹⁴ Depozitu buaru ku Dêsu kunfia ny ô, lokê ny supitu Santu ku ka vevia ny non. ¹⁵ Bô ta ma turu nkênu ku ka vevia ny Azia lega un sô ny gupu é sa Figelu ku Hermogeny. ¹⁶ Ku Sun ka ra sê mixikodji pa familia Onezifuru, sô yô vê anima un, ê na tia vegunha ny pezu wha. ¹⁷ Mora kua é ola ma un tava Roma ê ngo un dy mora ku kuiraru sô ê bê un. ¹⁸ Sun ka pimity pa ê bê mixikodji dy patxi dy Dêsu naria é. Sô bô ta bua foga wha yô mora ma ê zura un ny Efezu.