¹ Mora ma sê mengay kazaru, sê na toká ka lispeta ome sê, pa sy whã whã sa desobidiente wa y na kêlê ny lumba Dêssu wha sê ka nganha ane se lumbá mazi punda mora vivê sê. ² Pa ane bê mora vivê sê limpu ku lispetu. ³ Ma glavi sê na ka sa ny lua wha, mora ntê tesêru koró olô ku ka bisi luxu. ⁴ Mazi invêz kua é, ê ka sa lêtu kosón sê bisiru ku whã kabisi ku ná ka fonó wha ku sa supitu glavi man-Sun, ku sa buaru whê Dêssu. ⁵ Punda nakulu mengay lispetu tá ka bisi mora é. Ane ta ka kunfia Dessu sô tá ka lispeta ome ane. ⁶ Mora é mé ma Sara lispeta Abron sô samé dy sun, punda ê bila ná ane ka zi kua buaru sô na mendu ne whã kua ku ka bila sê ba memá wha. ⁷ Dy mora é mé sê ome kazaru, sê toká vivê ku mengay ma sê kaza kuê, pa sê tá ma mengay sa whã kua masi léve, sivi ane ku amolê mora nkênu ku tê patxi ku sê ny vira longô, pa lason sê na tlaza wha. ⁸ Sô turu sê ka tê whã mora pensa ka musa pena ku amolê sê findji, tê pena sa mansu, ⁹ Na paga mali ku mali wha na keta ku nkênu ku ka keta ku bô wha: mazi otô mora fa ben rê punda ra kua xié ma a sama sê, pa sê ka tua bensa mora kua ma bô lera. ¹⁰ Nkênu si ku mesê ama vira sô bê ria buaru toká fia lungua rê dy mali ku boka rê dy siriga. ¹¹ Fugi mali sô zi kua buaru. Ngolo paji sô ngolo bê. ¹² Whê Sun ka bê zustu sô oria Rê ka ndê kua ma ê ka pindji, mazi pólo Sun sa kontlê ane ku ka zi mali. ¹³ Nkênu kutxi ku ka zi sê mali, si sê ka ngoló zi ben! ¹⁴ Sô si sê parisê punda zustisa, a be sê buaru. Na mendu miasa ané ne pazumaru ¹⁵ Antiji, fika santu ku Klistu, mora Sun ny kosó sê semplé plontu ri kundji turu nkênu ku ka puta sê lazon ma sê ku kunfiá ny Dêssu. ¹⁶ Zi kua é sosegaru ku lispetu so ku kuxensa buaru dy dy mora ma nkênu ku ka fa mali sê sô ka keta ra vivê sê ku Klistu, ka fika ku vegonha. ¹⁷ Punda ê sa masi buaru padisê ka zi buaru, sy ê sa vonté Dêssu, dokê zi mali. ¹⁸ Punda Klistu turu padisê, ra pekaru whã uniku vê. Nkênu sy ku sa zustu parisê ra pekarô pa Ê bé ku sê ra Dêssu. Ê muê kany mazi Ê tô korá ny Supitu. ¹⁹ Ku Supitu, Ê ba plega ra supitu ku tá pezú. ²⁰ Ku fô mavaru ola Dêssu ta ku paxensa ka whara ria Nué, ma ê ta ka zi arka ola pokô ku sa naké nkênu ku savá katxi aua. ²¹ Yé sa fêgula butismu ku ka sava sê ayé, ê na sa labá súzu kany wha, mazi punda plomesa whã kuxensa buaru ra Dêssu ola ma Jizu tô kora. ²² Ku banda bá osé sô sa mon leton Dêssu Nkênu sy ma anzu ka lispeta ku turu porê osé.