¹ Sô zeta turu mali, turu siriga, fasu, whê sia ku fa mali otô. ² Mora ná pikina ku nansê novu ngolo letê puru dy supitu dy mora ma sê ka poy kula ny savason punda Êlê. ³ Sy sê dji pova ma Sun sa buaru. ⁴ Vitxa kota Rê ku sa buru vivu, ma punda whã kiba nkênu zeté, sô a koyê mora buaru ra Dessu. ⁵ Sê turu sa mora buru vivu, ma a zi kay supitu kuê, asyé pa sê sa wha saseroti santu. Ku ka sakifika supitu ma Dessu ka kundji punda Jizu Klistu. ⁶ Ê sa sisikaru: ya nga pê ny Sion whã buru ny kay buaru koyêru sô glavi. Ngê mesê kêlê Né na ka sá ku vengonha wha. ⁷ A ka gaba sê ku ka kêlê. Mazi: buru ma ane nkênu ku ka zi kay zetá, yê bila buru ngola. ⁸ Sô: Buru ma ka ra topi ku loxa ku firi. Ane ka ra topi lumba na ka liga lumba wha, punda ra kua é ane turu fô mandaru. ⁹ Mazi sê sa lasa ma a koyê, nkênu ku ka zi suvisu lênu povô Dessu, pa sê fa kua buaru Nkênu sy ku sama sê fô sisima poré ba kerari Rê ku ka luzi. ¹⁰ Sê ma nariá na fô povô wha mazi ayé sê sa povô Dessu. Sê ku na tá tua misikokoji wha, mazi ayé sê tua misikoji. ¹¹ Migu nga fa sê mora nkênu strangeiro ku sa yngé pa sê fuji vonté kany ku ka peza ku alima. ¹² Vivê buaru katxi zintxi, asyé si ane fa mali sê mora malivaru, ola ane ka bê kua buaru ma Ê ka zi visita. ¹³ Sujeitá turu autoridade punda amolê Sun, mora alê kuma sefi ngay. ¹⁴ Ô mora govenarô ma a manda ri samá nkênu ku ka zi mali atenson ra nkênu ki ka zi buaru lova. ¹⁵ Punda yé sa vonté Dessu punda ola bô ka zi buaru sa bô seka tapa boka lifiron ku malokô. ¹⁶ Mora povô livi na tua liberari sê mora whã diskupa ra mali wha, mazi ta mora nkênu ku seka sivi Dessu, ¹⁷ lispeta turu nkênu. Ama ná amon, mendu Dessu, lispeta alê. ¹⁸ Ane na kiá ta kosi pató sê, ku turu lispetu, na sa ra pató buaru sô wha mazi ku nkênu má fé turu. ¹⁹ Punda ê sa buaru sy nkênu ngueta dolô whã parisê sê lazon punda kuxensa ô ku Dessu. ²⁰ Sô kuay ma bô ka nganha si bô sujeta yô padisê é punda whã pekaru ma bô zi! Mazi si bô zi buaru, parisê, sa buaru whê Dêssu. ²¹ Ra kua é ma a sama sê, punda Klistu turu parisê ra sê, sô desa zemplu pa sê lêlê passu Rê. ²² Ê na zi pekaru wha, né siriga ku boka Rê. Ola a tlaté mali Ê na kudji ku mali wha. ²³ Ola Ê parisê Ê na miasa wha, mazi Ê ntlega Ré mé ra Nkênu sy ku ka zi zugamento zustu. ²⁴ Ê kega pekaru non ny kusú ku ongê Rê ra ola non ka muê ra pekaru sô asyé non ka vevia ra zustisa. Punda kitó Rê sô kula non. ²⁵ Punda turu sê tá mora ombô pendêru, mazi sê tô vutuka ra Pastoru ku nguara alima sê.