¹ Peru apostulu Jizu Klistu, nga manda ane melu ma Dessu koyê, ku ka vivê londji tia rê whangaru fô tia Pontu, Galasia, kapadósia, Azia ku Bitínia. ² Koiêru ny vonté Dêssu Tata labaru ku Supitu Santu pa sê zi vonté Jizu Klistu, ku sangi Rê ma Ê lukua. Pa gasa ka sa ku sê sô ma paji sê ka sa motxi. ³ Ra ben Dêssu ku Tata non Jizu Klistu. Ma misikoji Rê ngai ra non wha novu nansê ma speransa ka vevia punda resurison Jizu Klistu katxi motxi. ⁴ Ra whã lederu ku na ka muê wha na ka ra ná-wha ku na ka pendê wha, Ê sa lokêru ny osé ra sê. ⁵ Ny porê Dessu sê sa lokeru ku afé ra savason ku sa plontu pa a bê ny litimo tempu ⁶ Sa ku ngosô ra kua é sa plisizu pa sê ka sintxi afligiro ku yô póva. ⁷ pa afé sê masi buaru dokê olô ku ka sa povovaru ny fôgo. Kua é ka kolê pa afé sê ka ra vungu, ku gloia ku porê ny revelason Jizu Klistu. ⁸ Embora sê na Bê wha, sê ka amé. Sê na Bê ayé wha, mazi sê kêlê Né sô sa ku ngostô fogá wha ku legela ku gloia. ⁹ Sê seka ganha luklu dy afé sê, ku savason alima sê. ¹⁰ Ane pofeta ngolo ku vonté pa ane bê savason é, ma ane ta fa né ku gasa ku ká sa ri sê. ¹¹ Ane ta ka ngoló tá tempu ku ola masi séru ma Supitu Klistu ka musa ku tá né ma ane ta fá naria dy aflison Klistu ku turu gloia ku ka bi sô Êlê. ¹² Ma a tá fa ma ane na tá ka sivi ane mé wha mazi ra sê ola ê ta ka fa di kua ma a sê ka fa ayé ra ane nkênu ku ta ka plega vanjelhu, ny Supitu Santu ma a manda fô osé kua ma atê anzu mé ta ka mesê tá. ¹³ Sô koseta ntê sê pa ê zi. Ka sa supetu ny kua ma sê ka ta. Sa ku kunfiansa setu ny glasa ma sy sê ka bi kuê ny kua ma Jizu Klistu ka zi ta. ¹⁴ Mora ná ku ka zi kua ma ka mandé na zi ku vonté ma sê ta ka lêlê ola sê na tá kua wha. ¹⁵ Mazi mora Ngê si ku sama sê ku sa Santu, ma sê turu ka sa Santu ny turu mora vivê sê. ¹⁶ Punda ê sa sisikaru, sa santu punda un sa santu. ¹⁷ Sô sy sê ka sama di, Tata, nkênu sy ku ka zi zugamentu sê vonté di mora ma kara nkênu nda ku lispetu turu tempu ma sê sa ynge. ¹⁸ Sê ta ma ê na sa ku plata ne olô, kua ku ka potó ma kopua sê kuê ny mora mali ma sê ka vevia né ma sê sina di tata sê. ¹⁹ Mazi, ku sangi buaru dy Klistu, mora whã ombô sê defetu sê méka. ²⁰ A koyê Klistu na a zi mundu, mazi ayé ny útimu tempu é a fa sê Êlê. ²¹ Punda Êlê ma sê ka kêlê ny Dessu, Nkênu si ma Dessu kora ny motxi ku nkênu si ma Ê ra gloia rê dy mora ma afé sê ku kunfiansa sê ká sa ny Dessu. ²² Sê bila alima sê puru ny kua ma sê ka zi véré ku vonté buaru ku amolê tata sê finjimentu sô sê ka ama otô ku kosó limpo, bo dji alima ô puru ny obdencia veré ny Supitu. ²³ Sê tô nansê, na sa di simentxi potoru wha, mazi di simentxi buaru ny katxi arra dy lumba Dessu ku ka vevia atê atê. ²⁴ Punda turu kany sa mora iku, sô turu gloia rê sa mora flóli iku. Iku ka kuta, flóli rê ka kiê. ²⁵ Mazi lumba Sun ka vevia atê atê. Yé sa lumba vangélhu ma a tá fa sê.