¹ Ná mbê, nga sisika ané kua é ra sê pa sê na zi pekaru wa. Mazi si nkênu zi peka, non tê wã advogaru zuntu Tata, Jizu Klixtu, zustu. ² Ê ka dipá pekaru non, sô ê na sá di non sô wa mazi ra turu mundu têlu. ³ Non ta ma non té, si non lôkê kua ma Ê ka manda non. ⁴ Nkênu si ku ka fa: "Hun ta Desú", mazi ku na ka lôkê kua ma Ê ka fa wa ê sa whã sirigarô, sô véré na sa né wa. ⁵ Mazi ku ka lôkê lumba rê, véré mé ma amôlê Desú seka luzi nkênu é. Punda kua ê, non ta ma non sa Né. ⁶ Nkênu si ku ka fa ma ê sa ni Desú tê kanda mora ma Jizu Klixtu ndá turu. ⁷ Migu, ná sêka sisika whã kua ma nsêka manda novu wa, mazi whã kua ma Hun manda na kulú ma sê ta kuê na komésu. Kua ma Hun manda na kulú sa lumba ma sê ndê. ⁸ Sô ma, hun sisika ra sê whã kua kua ma Hun manda nóvu, ku sa veré ni Klixtu sô ku sê, punda kulú sa pasaru, sô kandja veré seka luzi za. ⁹ Nkênu si ku ka fa ma ê sa ni kandja sô ka kontlê na amon rê, sá kulú andá. ¹⁰ Nkênu ku ka gogô ku ná amón rê sa ny kandja, sô né na tê tempu pa ê ra topi wa. ¹¹ Mazi nkênu si ku ka kontlê ná amón rê sa ni kulú sô ê ka nda né ê na ta nga ma ê seka bé wa punda kulú segé whê. ¹² Nambê, hun sisika ra sê punda pekaru sê Ê poré punda ná rê. ¹³ Tata ngá sisika ra sê punda sê ta nkênu si ku sa na kulú. Masivi, hun sisika ra sê punda sê vensê numigu. Nambê hun sisika ra sê punda sê ta Tata. ¹⁴ Ané Tata hun sisika ra sê bi ta nkênu ku sa na komesu ané jóvé hun sisika ra sê punda sê sa fotxi sô lumbá Desú sa ku sê sô sê vensê numigu ¹⁵ Na gôgô ku mundú, nê kua ku sá nê wa. Si nkênu ka gôgô ku mundu amôlê Tata na sá nê wa. ¹⁶ Punda turu kua ku sa mundú, sá vonté kany, vonté wê, ku kua tlaza vira, ê na sa dy Tata wa mazi di mundu. ¹⁷ Mundu ku vonté rê ka passa. Mazi nkênu ku ka zi vonté Desú ka ta atê atê ¹⁸ Nambê yé sa utimú olá. Mora ma sê ndê ma antiklixtu ka bi, ayé me yô antiklixtu sa lataru, punda nón ta ma yé sa utimú olá. ¹⁹ Ané sié katxi non mazi ané na tá ri non wa. Punda si ané ka sá ri non ané ka tu ku non, mazi ané siê ka musa ma ané na sa ri non wa. ²⁰ Mazi sê tê porê ku ka bi ri Santu, só turu sê ta véré. ²¹ Hun sisika ra sê na punda sê satia ra véré wa mazi punda sê tê sô punda né wa siriga na ka bi ri véré wa. ²² Nkênu kutxi ku ka siriga si ê na sa Ysi ku ka nega ma Jizu sa Klixtu wa? Yha antiklixtu, ku ka nega Tata ku Ná. ²³ Turu nkênu si ku ka ta Ná , na tê Tata wa; nkênu si ku ka ta Ná tê Tata turu. ²⁴ Ra sê ka tua kuiraru pa sê ta ku kua ma sê ndê na ndô.Si sê ta ku kua ma sê ndê na ndô, sê turu ka tá ku Ná ku Tata. ²⁵ Yé sa plomesa ma Ê zi non: Vira atê atê. ²⁶ Hun sisika ané kua é ra ané nkênu si ku ka mêsê la ôtô nga ku sê ra véré. ²⁷ Sô ra sê porê rê ku sa ni sê, sô sê na ka whará pa nkênu sina sê wa. Mazi ma porê rê ka sina sê ku turu kua, sô ê sa véré ê na sa siriga wa mora ma ê ka sina sê, tá Né. ²⁸ Ayé ané na hun, ta Né ra ola Ê ka sê ka zi kua non ka tê yô kunfiansa sô non na ka tô sa ku tuzan katá rê ola ma Ê ka bi wa. ²⁹ Si sê ta ma Ê sa zustu, sê ta ma tutu nkênu ku ka zi zustusa sa nansêru Dê.