¹ Un disidi plô ami mé ku ami na ka bila bi anté nansê ôtlôvê ni silkunstânsia dolórozas fa. ² Xi un kauza nansê dôlô, kênguê ku pô ka anima ani xi na sa nguê ku tava ku disgôstô plô ami fa? ³ Un sklêvê di modu sé pla ke, ola kun ga vijitá nansê ami na ka sa ku disgôstô plô nguê ku ka poja fé ami ta ku gôstô. Un ga kunfia ku gôstô mu ê sa isé mé ke a di tudu nansê. ⁴ Maji un sklêvê nansê aflison nglangi ku angustia di kloson, i ku yô di awa wê. Ami na mêsé kausá nansê dôlô fa; ni vê disé, un tava ka mêsé ku nansê ka konsé kê mijida di amolê kun tê plô nansê. ⁵ Kwa kwali nguê kausá dôlô, ê na kausá ami tan fa, maji ni sêtu minjida, tudu nansê, pla na sa glosu muntu fa. ⁶ Punison di nguê sé plô muntu sa sufisentxi. ⁷ Miolê, ni invêji di punison, sêla bô podé i konforté, pa ê pô na sa klagadu di yô disgôstô fa. ⁸ Anton, nga enkoraja nansê a aflimá mansa nguê amolê di nansê ê plô êlê. ⁹ Isé zô sa mutivu ku fé mu sklêvê, pa un poji izamina nansê bila komplédê xi nansê sa obidientxi ni tudu kwa. ¹⁰ Xi nansê podá kwali kwali nguê tembêtê nga pôdá nguê sê. Ixi kun pôdá, xi ê sa kun pôdá kuwali kwali kwa, sa punda un pôdé plovia nansê ni plêsensa di Klistu, ¹¹ pa demonó na nganá fa. Maji non na sa inguinorantxi di planu dinen fa. ¹² Uwa pôtó bili da mu plô Sumu ôla kun ba poson di Troadi pan plégá vangeli di Klistu. ¹³ Anton axem, suplitu mu na tinha paji fa, punda ami na bê manu mu Titu fa. Anton un desinen i un bila a Macedónia. ¹⁴ Maji, glasa sa dadu a Dêsu, ku ni Klistu sémlpé ka guia non ni tliunfu. Plô ômé di non, Êlê ka wanga doxi aroma di sêbê dê ni tudu luguê. ¹⁵ Só só non sa pla Dêsu doxi plefumi di Klistu, tantu ni ômé dinen isé ku sa salvu mô dinen isé ku inen sa ka pêdê. ¹⁶ Pla inen ka sa pêdê, ê sa uwa aroma di motxi pla motxi. Pla inen sé ku sa salvu, ê sa uwa aroma di vida pla vida. Kênguê sa diguinu di kwa sé? ¹⁷ Maji non na sa mô yô nguê ku ka bêndê palavla di Dêsu plô unganu. Ni inêji disé, ku mutivu vêdê, non ka fla ni Klistu, kuma mandamentu di Dêsu, ni wê di Dêsu.