अध्याय 17
1
सोब दिही वी गिया ताहा ईशुई पेत्र, याकोव आन याकोवा पावहु योहान ईयाहान आरी हादी लेदो आन तो तियाहान उचा डोगावे हुना जागाम लीगियो.
2
तिहीतियाहां हुवुर तिया रूप वादला गियो, तिया मुंय दिहा हास चमका लाग्यो आन तिया पोतडे उजवाडाहोच उजले वी गियें.
3
ताहा तो मोशे आन एलीया इयाहा आरी गोठ्या केअता तियाहान देख्यो.
4
ताहा पेत्रांय ईशुल आख्या, आने प्रभु, आपू इहिज रेवनु कोतो हारो हाय, मोरजी हायता आय इही तीन मांडवा बनावेहे, एक तोय खातोरे, एक मोशे खातोर, एक एलिया खातो.
5
पेत्र तिया आरी गोठया केअतलो, ओतामुज खुवृज उनला वादलाय तियाहावे सांय की देवी आन तिया वादलामेने आवाज आलो " ओ मा मोयालो पायरो हाय इवाकी आय खवुज खुश हाय, इया तुमा उनाया"
6
ईशु आरी आथा ते चेला इ गोठ उनाया ताहा ते खुव वीड़ गेहेला तियाखातार तारतीवे उवडू पोडी गेहला.
7
ताहा ईशु तियाहाही आवीन तियाहान आयाहांन आथलीन आख्याहे उठा! विवाहा मां.
8
तियाहाय उसावीन वेअयो, ताहा तियाहान एखलो ईशुज देखया, विहरो केडोज देखालो नाहीं.
9
जाहा ईशु आन तिया चेला डोवावेने निचे उतीन आवताला, ताहा ईशुई तियाहान हुकुम दिइन आख्यो जांवलूग माअहां पायरे मोअलामेन फाचे जीवतो विड्न नाय उठी तांवजुगु तुमाहाय डोगावे जो काम देख्यो, तोंअ केंडाजलुज आखहा मा.
10
फाचे तिया चेलाहांय तियाल फुच्यो, " एलियावे अलो आवां जोजे एहेंकी शास्त्री काहाल आखताहा?
11
ताहा तियाय तियाहान आख्यो, एलियो आवी आन वादोंज हुदरावी इ खेरो हाय.
12
आय तुमाहान आहुं का एलियो आललो हाय, पेन तियाहांय ओअख्या नाहा, तिवाहान जेहेकी लाग्यो तेहेकी तिवाहांय तियाल तारास देदो, एहेंकीज माअा पोयराल वी ते तारास दी, तोंअ तो वेही.
13
ताहां तीवाहाय होमजी लेदो का तियांय आमाहान वाप्तिस्मा देनारा योहान वोद्दल इ आखलो हाय.
14
जाहां ईशु आन तिया चेला, खुवुज लोक आशा तिही आला, ताहां एक माअद्दु ईशुही आवीन, पागे पोडीन आखील लाग्यो.
15
ओ गुरू, माअ पोयरावे दया केअ, तियाल मिरग्यो बी आवहे, ताहा तोअ खुवुज तकलीत केअहे एक सारखो आगीम आन पांअयाम टूटी पोडे..
16
आय तियाल तोअ चेलाहाही ली आलालो, पेन झ्याल तेअ हारो नाहां की सेक्या.
17
ईशुई आख्यो, ओविश्वास नांय केअनारा आन उलटी पिठी लोकाहाय, आय तुमा आरी कोतेलुग रींव ? कोतेलुग आय इ बहू? तियाल मांअ इहीली आवा.
18
ईशुई तिया पोयराम आयो तिया पुताल कडक रितीकी धमकाव्या, ताहां तोअ पुत तियाहामेने निगी गियो आन तुरूतुज तोंअ पोयरों हारो वी गिया.
19
ताहा ईशु चेला हाकाज तियाही आवीन फुचताहा, आमा आमा तियामेने पुत काहाल काडी नाय सेक्या.
20
ताहा तियाय तियाहान आख्यो, तुमा विश्वासाम नावला हाय तियाल, आंय तुमाहान खेरोज आखंहृ तुमाहाम राई दाना ओहडो विश्वास रेतो, ता, तुमा झ्या डोगाल आखीसेकता. इहीने होरकीन तिही जो, एहेकी आखतांज डोगो होरकी जातो, तुमा खातार काय वी नांय वे एहेकी वेअनारोंज नाय.
21
तेवीवी प्रार्थना आन उपास केअया वाची इया जाती निंगतो नाहा.
22
जाहां ईशु आन तिया चेला गालील प्रांताम आला नाहा तो तियाहान आखा लाग्यो माअहां पोयराल लोकाहा आधाम तिड़ दी.
23
तेअ लोक तियाल मांय टाकी आन तिसरे दिही तोअ जीवतो विइन उठी तांहा चेला सुवून निरास वी गिया.
24
जाहां ईशु आन तिया चेला कफणहुम सेहेराम आवी ताहां मंदीरा कर पट्टी वसुल केअनारा लोक आला. ते पेत्राहीं आवीन फुचताहां तुमा गुरू कर-पट्टी वसुल नाहा देतो का?
25
तियांय तियाहान आख्या हा देहे फांचे पेत्र कोअमे आवीन ती गोठ आखनारो आथो तिया आगलाज ईशुई आख्यो, शिमोन तुल केहेकी लागहे ? तोरतीपेने राजा लोक कर पट्टी केडापेने लेताहां तियांय पोयराहा बने लेताहा का विहिराहा वेने ?
26
जाहा तियांय आख्यो पारकाहा वेने " ताहा ईशुई तियांल आख्या पोयरे तां सुटेजं री गिये.
27
तेवीवी आपु तियाहांन ठोकरावजी नाव इयाखातार तु फगारा तेडीपे जायन पांअयाम गोलाय टाकजे आन पेकालो मासो लागी, तोअ तिन तिया मुंब उगडीन वेअजे, तिया मुंयाम तुल चांदी रोडो रूपया मिली. तोअ लिइन मांअ आज तोअ खातार तियाहान दि देजे.